'Yan wasan Atletico Madrid sun iso Najeriya
Asalin hoton, Athletico/Twitter
Kungiyar kwallon kafa ta Atletico Madrid ta Spaniya ta isa Najeiya domin karawa da tawagar kwallon kasar ta Super Eagles.
A ranar Litinin ne da daddare 'yan wasan na Atletico, wadanda su ne zakarun Turai na Europa League, suka isa birnin Uyo na jihar Akwa Ibom.
Za a yi wasan na sada zumunci ne ranar Talata da misalin karfe 6:00 agogon Najeriya a wani bangare na shirye-shiryen da kasar ke yi domin tunkurar gasar cin kofin duniya.
'Yan wasan da Athletico ta taho da su sun hada da:
Oblak, Werner, Juanfran, Sergi, Montero, Solano, Jota, Rafa Muñoz, Thomas, Gabi, Vitolo, Toni Moya, Agüero, Olabe, Mikel Carro, Joaquín, Torres, Correa, Gameiro da kuma Borja.
Akwai dai manyan 'yan kwallonsu irinsu Diego Costa da Griezmann da ba a taho da su ba domin wasan, wanda za a yi ranar Talata a filin wasa na Godswill Akpabio.
Najeriya na yin atisaye a birnin na Uyo, inda a nan ne ta yi wasannin share fagen shigarta cin kofin duniya, domin tunkarar Rasha 2018 da za a fara a watan gobe.
Super Eagles tana rukuni guda da Argentina, da Croatia da kuma Iceland a gasar ta cin kofin duniya.
Wannan labari ne na dauke da bayanai da X suka bayar. Muna neman amincewarku kafin mu dora muka, saboda nuna iya dauke da wasu bayanai da aka iya adanawa. Watakila kana za ka so ka karanta X da tsarin bayanan da za a adana da da tsarin sirri kafin ka amince. Idan kana son ganin wannan bayani ka zabi ‘amince sannan ka ci gaba’.
Karshen labarin da aka sa a X
