'An kashe mataimakin Abubakar Shekau'
Shalkwatar tsaro ta Najeriya ta tabbatarwa BBC cewa dakarun tsaron kasar sun kashe mutum na biyu mai girman mukami a kungiyar Jama'atu Ahlis Sunnah lid Da'awati wal Jihad da aka fi sani da suna Boko Haram a farkon wannan watan.
Rundunar tsaron ta ce ta kashe Momodu Bama ne a wani ba-ta-kashi da aka yi, yayin dakile wani hari da 'yan kungiyar ta kai, a karamar hukumar Bama ta jihar Borno.
Wata sanarwa da kakakin JTF a jihar Borno, Laftanar Kanar Sagir Musa ya fitar, ta ce Momodu Bama wanda ake yiwa lakabi da Abu Sa'ad, shi ne mataimakin Imam Abubakar Shekau.
A baya, gwamnatin Najeriya ta dauki alkawarin bada tukwicin dalan Amurka dubu ashirin da biyar ga duk wanda ya taimaka da bayannan da za su taimaka wajen damke Momodu Bama.
