Obama ya soke ganawarsa da Putin
Shugaba Barack Obama ya soke tattaunawar da ya shirya yi tsakaninsa da Shugaban kasar Rasha, Vladimir Putin a Moscow cikin wata mai zuwa.
Ana ganin wannan mataki a matsayin maida martani ga shawarar da gwamnatin Rasha ta yanke, na bada mafaka ga tsohon jami'in leken asirin Amurka Edward Snowden.
To sai dai mahukunta a Amurkar sun ce, Shugaba Obama bai jingine shirinsa na halartar taron kungiyar kasashe masu karfin tattalin arziki na G20 ba, wanda za a yi a St. Petersburg a watan Satumba.
A ranar Talata,Mista Obama ya bayyana cewar ya ji takaicin matakin Rasha na barin Mista Snowden ya zauna a cikin kasarta.
