An tsare Shah Rukh Khan a Amurka
Asalin hoton, TWITTER
Fitaccen dan wasan kwaikwayo na Indiya Shah Rukh Khan ya nuna matukar bacin ransa kan tsare shi da aka yi a filin jiragen saman Los Angeles da ke Amurka.
Babu cikakken bayan kan abin da ya sa aka tsare shi da ma tsawon lokacin da ya yi a tsare.
Sai dai jakadan Amurka a Indiya ya nemi gafarsa, yana mai cewa hukumomi a Amurka na yin bakin kokarinsu domin ganin hakan bai sake faruwa ba.
A shekarar 2012, an tsare Khan tsawon minti 90 a filin jiragen saman White Plains da ke kusa da birnin New York.
Kazalika, a shekarar 2009 an dakatar da shi tsawon awa biyu a filin jirgin saman Newark.
Sai dai an sallame shi bayan ofishin jakadancin Indiya ya sanya baki.
