Ba don na tsokani Ronaldo na yi salon murnar sui ba - Hojlund

Ɗanwasan gaba na Manchester United Rasmus Hojlund ya kare salon murna da ya yi irin na Cristiano Ronaldo da ake kira "su" bayan ya ci Portugal a wasan gasar Nations League ranar Alhamis.

Hojlund ya zura a guje kuma ya yi tsalle tare da wurga hannaye ta baya a kan idon Ronaldo bayan jefa ƙwallon da ta bai wa ƙasarsa Denmark nasara a kan Portugal.

"Ban yi domin na tsokane shi ba, na sha faɗa cewa yana da tasiri sosai a harkokin ƙwallona," a cewar ɗanwasan.

"Ina wasa ne da ɗanwasa mafi hazaƙa a duniya, abin kwaikwayona, ba ƙaramin abu ba ne na ci kuma mu yi nasara.

"Cin su ƙwallo da na yi abu ba ne muhimmi. Na taɓa zuwa wajensa a 2009 bayan ya ci ƙwallo daga bugun tazara kuma tun daga nan na zama masoyinsa."

Tsohon ɗanwasan Real Madrid da Man United ɗin da ke taka leda yanzu a Al Nassr ta Saudiyya, Cristiano ya buga minti 90 na wasan sai dai bai taɓuka komai ba.

Hari ɗaya da ya kai shi ne wanda ya saka w ƙwallo kai amma ta yi faɗi zuwa waje.

Ƙwallon da Hojlund ya ci ce ta biyu da ya zira a raga sau biyu a jere bayan ya shafe wasa 21 ba tare da yin hakan ba.