બીબીસી ઇન્ડિયન સ્પૉર્ટ્સવુમન ઑફ ધ યર 2022 - મતદાન પૂર્ણ, વિજેતાના નામની જાહેરાત પાંચમી માર્ચે
પાંચ દાવેદારોનાં નામ 2023ની છઠ્ઠી ફેબ્રુઆરીએ જાહેર કરવામાં આવ્યાં પછી સમગ્ર ભારત અને વિશ્વમાંથી લોકો તેમની પસંદગીનાં ભારતીય સ્પૉર્ટ્સવુમન માટે મતદાન કરી રહ્યાં છે. વિજેતાના નામની જાહેરાત 2023ની પાંચમી માર્ચે નવી દિલ્હીમાં યોજાનારા સમારંભમાં કરવામાં આવશે.
2022 માટેનાં પાંચ દાવેદારોમાં વેઇટલિફટર મીરાબાઈ ચનુ, કુસ્તીબાજ સાક્ષી મલિક તથા વિનેશ ફોગાટ, બૅડમિન્ટન ખેલાડી પી વી સિંધુ અને બૉક્સર નિખત ઝરીનનો સમાવેશ થાય છે.
પાંચ દાવેદારોની પસંદગી રમતગમત ક્ષેત્રના પત્રકારો તથા લેખકો સહિતના પ્રતિષ્ઠિત નિષ્ણાતોની એક સમિતિ દ્વારા કરવામાં આવી છે,
દાવેદારોને જાણી લો
મીરાબાઈ ચનુ
વેઇટલિફટિંગ ચૅમ્પિયન મીરાબાઈ ચનુએ 2021માં ટોક્યો ઑલિમ્પિક્સમાં સિલ્વર મેડલ જીતનાર પહેલાં ભારતીય મહિલા વેઇટલિફટર બનીને તેમનું નામ રમતજગતના ઇતિહાસમાં નોંધાવ્યું હતું. તેમણે 2022માં વર્લ્ડ વેઇટલિફટિંગ ચૅમ્પિયનશિપમાં સિલ્વર મેડલ અને 2022ની બર્મિંઘમ કૉમનવેલ્થ ગેમ્સમાં ગોલ્ડ મેડલ પણ પ્રાપ્ત કર્યો હતો.
2016માં રિયો ગેમ્સમાં વજન ઊંચકવામાં નિષ્ફળ રહ્યાં અને તેમણે આ સ્પૉર્ટને લગભગ અલવિદા કહી દીધું હતું પછી મીરાબાઈએ લાંબો પંથ કાપ્યો છે. તેમણે 2017ની વર્લ્ડ વેઇટલિફટિંગ ચૅમ્પિયનશિપમાં સુવર્ણ ચંદ્રક મેળવ્યો હતો.
ઇમેજ સ્રોત, DEAN MOUHTAROPOULOS/GETTY IMAGES
ઇશાન ભારતના મણીપુર રાજ્યમાં જન્મેલાં અને ચાના સ્ટૉલના માલિકનાં પુત્રી મીરાબાઈએ રમતગમત ક્ષેત્રે તેમની કારકિર્દીના આરંભે પારાવાર નાણાકીય સંઘર્ષ કરવો પડ્યો હતો, પરંતુ તેઓ તમામ અડચણોને પાર કરીને ઑલિમ્પિક ચૅમ્પિયન બન્યાં હતાં. મીરાબાઈ ચનુ 2021માં બીબીસી ઇન્ડિયન સ્પૉર્ટ્સવુમન ઑફ ધ યરનો પુરસ્કાર જીત્યાં હતાં.
સાક્ષી મલિક
2016ની રિયો ઑલિમ્પિક્સમાં ચંદ્રક જીતનાર સૌપ્રથમ ભારતીય મહિલા કુસ્તીબાજ બનીને ઇતિહાસ સર્જ્યો હતો. તેમણે 58 કિલોગ્રામ કૅટેગરીમાં બ્રૉન્ઝ મેડલ મેળવ્યો હતો. તેઓ ઑલિમ્પિક મેડલ વિજેતા બનેલાં ચોથા ભારતીય મહિલા હતાં.
End of સૌથી વધારે વંચાયેલા સમાચાર
સાક્ષીને રમતગમતમાં હંમેશાં રસ પડ્યો છે અને તેમના દાદા પણ કુસ્તીબાજ હતા એ જાણ્યા પછી સાક્ષીને વધુ પ્રેરણા મળી હતી. રિયો ઑલિમ્પિક્સમાં ચંદ્રક વિજેતા બન્યાં પછી સાક્ષીની કારકિર્દી હાલકડોલક થઈ ગઈ હતી,
ઇમેજ સ્રોત, AFP
પરંતુ 2022માં બર્મિંઘમ કૉમનવેલ્થ ગેમ્સમાં સુવર્ણચંદ્રક જીતીને તેમણે શાનદાર વાપસી કરી હતી. સાક્ષીએ કૉમનવેલ્થ ગેમ્સમાં અગાઉ એક સિલ્વર તથા એક બ્રૉન્ઝ મેડલ પ્રાપ્ત કર્યા હતા.
વિનેશ ફોગાટ
આ લેખમાં Google YouTube દ્વારા પૂરું પાડવામાં આવેલું કન્ટેન્ટ છે. કંઈ પણ લોડ થાય તે પહેલાં અમે તમારી મંજૂરી માટે પૂછીએ છીએ કારણ કે તેઓ કૂકીઝ અને અન્ય તકનીકોનો ઉપયોગ કરી શકે છે. તમે સ્વીકારતા પહેલાં Google YouTube કૂકીઝ નીતિ અને ગોપનીયતાની નીતિ વાંચી શકો છો. આ સામગ્રી જોવા માટે 'સ્વીકારો અને ચાલુ રાખો'ના વિકલ્પને પસંદ કરો.
YouTube કન્ટેન્ટ પૂર્ણ
વિનેશ ફોગાટ કુસ્તીમાં બે વર્લ્ડ ચૅમ્પિયનશિપ મેડલ્સ જીતેલાં સૌપ્રથમ ભારતીય મહિલા છે. તેઓ કૉમનવેલ્થ ગેમ્સ અને એશિયન ગેમ્સ બન્નેમાં સુવર્ણચંદ્રક જીતેલાં સૌપ્રથમ ભારતીય મહિલા કુસ્તીબાજ પણ છે.
વિનેશે કૉમનવેલ્થ ગેમ્સમાં સતત ત્રણ વખત સુવર્ણચંદ્રક પ્રાપ્ત કર્યા છે. અલબત, તેમને એ મેડલ્સ અલગ-અલગ વેઇટ કૅટેગરીમાં મળ્યાં છે. તેમણે ઑગસ્ટ 2022માં કૉમનવેલ્થ ગેમ્સમાં 53 કિલો વેઈટ કૅટેગરીમાં સુવર્ણચંદ્રક પ્રાપ્ત કર્યો હતો.
વિનેશ મહિલા કુસ્તીબાજોના પરિવારમાંથી આવે છે. તેમની પિતરાઈ બહેનો ગીતા તથા બબીતા ફોગાટે પણ અનેક આંતરરાષ્ટ્રીય મેડલ્સ જીત્યાં છે.
પી વી સિંધુ
બૅડમિન્ટન ખેલાડી પુર્સાલા વેંકટ સિંધુ ઑલિમ્પિક્સમાં બે વ્યક્તિગત મેડલ્સ જીત્યાં હોય તેવા સૌપ્રથમ ભારતીય મહિલા છે. ટોક્યો ગેમ્સમાં મળેલો બ્રૉન્ઝ મેડલ તેમનો બીજો ઑલિમ્પિક્સ મેડલ હતો.
તેમણે 2016માં રિયો ગેમ્સમાં સિલ્વર મેડલ જીત્યો હતો. 2022ની કૉમનવેલ્થ ગેમ્સમાં સિંધુએ સુવર્ણચંદ્રક જીત્યો હતો. એ અગાઉ 2021માં બૅડમિન્ટન વર્લ્ડ ફૅડરેશન (બીડબલ્યુએફ) વર્લ્ડ ટૂર ફાઇનલ્સમાં તેમને સિલ્વર મેડલ પ્રાપ્ત થયો હતો.
2019માં વર્લ્ડ ચૅમ્પિયનશિપમાં ઐતિહાસિક સુવર્ણચંદ્રક જીતીને તેઓ આ સિદ્ધિ મેળવનારાં પ્રથમ ભારતીય ખેલાડી બન્યાં હતાં. સપ્ટેમ્બર 2012માં 17 વર્ષની વયે તેમણે બીડબલ્યુએફનાં ટૉપ 20 વર્લ્ડ રૅન્કિંગમાં સ્થાન પ્રાપ્ત કર્યું હતું.
તેઓ 2019માં જાહેર મતદાનમાં સૌથી વધુ મત મેળવીને પ્રારંભિક બીબીસી ઇન્ડિયન સ્પૉર્ટ્સવુમન ઑફ ધ યર ઍવૉર્ડ જીત્યાં હતાં.
નિખત ઝરીન
2011માં જુનિયર વર્લ્ડ બૉક્સિંગ ચૅમ્પિયનશિપમાં વિજેતા બન્યાં બાદ નિખત ઝરીન 2022માં વિમેન્સ વર્લ્ડ બૉક્સિંગ ચૅમ્પિયન બન્યાં હતાં. નિખતે 2022માં બર્મિંઘમ કૉમનવેલ્થ ગેમ્સમાં ફ્લાયવેઇટ કૅટેગરીમાં ગોલ્ડ મેડલ પણ પ્રાપ્ત કર્યો હતો.
ભારતીય નેશનલ બૉક્સિંગ ચૅમ્પિયનશિપમાં ગોલ્ડ મેડલ મેળવીને તેમણે 2022નો અંત આણ્યો હતો. ઝરીનના પિતા ઇચ્છતા હતા કે તેમની ઊર્જાવાન દીકરીની શક્તિને યોગ્ય માર્ગે વાળવી જોઈએ. તેથી તેમણે ઝરીનને બૉક્સિંગમાં રસ લેતાં કર્યાં હતાં.
12 વર્ષની વયે એક મુકાબલા દરમિયાન ઝરીનની આંખ પર ઈજા થઈ ત્યારે તેમની માતાની ચિંતા તથા લગ્નની સંભાવના વિશેની સગાંસંબંધીની તીક્ષ્ણ ટીકાઓને બાજુ પર મૂકીને નિખતના પિતાએ દીકરીને તેનાં સપનાં સાકાર કરવા માટે પ્રોત્સાહિત કરી ત્યારથી નિખતે પાછું વાળીને જોયું નથી.
તમે બીબીસી ગુજરાતીને સોશિયલ મીડિયા પર અહીં ફૉલો કરી શકો છો
