તહેવારોમાં ઓનલાઇન ખરીદી કરતા પહેલાં સાવધાન

થોડા દિવસો પહેલાં દિલ્હી પોલીસે શિવમ ચોપડા અને સચિન જૈન નામના બે લોકોની ધરપકડ કરી હતી.

તેમના પર ઑનલાઇન શૉપિંગ પોર્ટલ એમેઝોન સાથે છેતરપીંડી કરી લાખો રૂપિયા પચાવી પાડવાનો આરોપ છે.

દિલ્હી પોલીસના સાઇબર સેલના સબ ઇન્સ્પેક્ટર વિકાસે બીબીસી સાથે આ મામલે વાતચીત કરી હતી.

તેમણે જણાવ્યું હતું કે શિવમ એમેઝોનમાંથી ફોન ખરીદતો હતો અને ડિલીવરી ન થઈ હોવાનું બહાનું બતાવી શૉપિંગ પોર્ટલ પાસેથી પૈસા પરત માગી લેતો હતો.

તમને આ પણ વાંચવું ગમશે

સચિન પર આરોપ છે કે તેણે શિવમને આ છેતરપીંડી કરવા માટે 150 પ્રી-એક્ટિવેટેડ સિમ કાર્ડ અપાવ્યા હતા. આ છેતરપીંડીની રમત રમી તેમણે 166 ફોન ખરીદ્યા હતા અને પછી વેંચી નાખ્યા હતા.

સમયની કટોકટીના કારણે આજે ઓનલાઇન શોપિંગનો ચસ્કો મોટા ભાગના લોકોને લાગ્યો છે.

આ પરિસ્થિતીમાં લોકોની ઓછી જાણકારીનો ફાયદો ઉઠાવી કેટલાક ઠગ છેતરપીંડી કરે છે.

પવિત્રાની કહાની

પવિત્રાએ ખૂબ જ પ્રચલિત સાઇટ OLX પર પોતાના બાળકનું સ્ટ્રૉલર વેંચવાની જાહેરાત આપી હતી.

તેમાં એક વ્યક્તિએ રસ દાખવ્યો હતો. બન્ને વચ્ચે પૈસાની ચૂકવણી બાબતે પણ સહમતી થઈ ગઈ હતી. ત્યારબાદ પવિત્રાએ એ વ્યક્તિને પોતાના બેંક અકાઉન્ટની માહિતી વૉટ્સએપ મારફત મોકલી હતી.

થોડી જ મિનિટમાં પવિત્રાને પાંચ સંખ્યા ધરાવતા એક નંબરથી મેસેજ મળ્યો હતો કે તેમના ખાતામાં 13,500 રૂપિયા જમા કરવામાં આવ્યા છે.

ખરેખર સ્ટ્રૉલરની કિંમત માત્ર ત્રણ હજાર રૂપિયા હતી. પવિત્રાએ ખરીદનારને ફોન કરીને પૂછ્યું તો તેણે કહ્યું હતું કે ભૂલથી વધારે પૈસા ટ્રાન્સફર થઈ ગયા હતા.

તેણે પવિત્રાને દસ હજાર રૂપિયા તેની મમ્મીના પેટીએમ ખાતામાં મોકલવા જણાવ્યું હતું.

પવિત્રા પૈસા મોકલી રહી હતી કે તેના ધ્યાનમાં આવ્યું હતું કે એક વખત પોતાનું બેંક અકાઉન્ટ પણ ચેક કરી લેવું જોઈએ. પોતાના ખાતામાં કોઈ પૈસા જમા ન થયા હોવાનું ચેકિંગ વખતે જાણવા મળતાં પવિત્રા સ્તબ્ધ થઈ ગઈ હતી.

તેણે આ બાબતે ખરીદનારને પૂછ્યું તો તેણે કહ્યું હતું કે ક્યારેક પૈસા જમા થવામાં બેંક તરફથી મોડું થઈ જતું હોય છે. તેણે પવિત્રા પર જલદી પૈસા મોકલવા દબાણ કર્યું હતું અને કહ્યું હતું કે તેની મમ્મીને પૈસાની તુરંત જરૂર છે.

પવિત્રાને દાળમાં કંઈક કાળુ લાગ્યું એટલે તેમણે બેંકને ફોન કર્યો હતો. બેન્કમાંથી જાણવા મળ્યું હતું કે તેમના ખાતામાં કોઈ નાણાં જમા કરવામાં આવ્યાં નથી. એ દરમ્યાન ખરીદનાર પવિત્રાને પૈસા મોકલવા માટે વારંવાર કહેતો રહ્યો હતો.

બેંકથી સૂચના મળ્યા બાદ પવિત્રાએ કડક પૂછપરછ કરી ત્યારે ઠગને સમજાયું હતું કે એ પવિત્રા સાથે છેતરપિંડી નહીં કરી શકે. એ પછી તેણે પવિત્રાને ક્યારેય સંપર્ક કર્યો ન હતો.

ઓનલાઈન શોપિંગ વખતે શું ધ્યાન રાખવું?

બીબીસીએ નિષ્ણાતો સાથે વાત કરી એ જાણવાનો પ્રયાસ કર્યો હતો કે ઇન્ટરનેટ પર છેતરપીંડીથી કઈ રીતે બચી શકાય? છેતરપીંડી થાય તો શું કરવું?

વોએજર ઇંફોસેકના ડાયરેક્ટર અને સાઇબર સુરક્ષાના જાણકાર જિતેન જૈન સલાહ આપે છે.

બેંક બજાર ડૉટ કૉમના CEO આદિલ શેટ્ટીની સલાહ

છેતરપીંડી બાદ શું કરશો?

જિતેન અને આદિલ જણાવે છે કે કોઈ કારણોસર તમારી જાણકારી લીક થઈ જાય કે કાર્ડનો દુરુપયોગ થાય તો તુરંત બેંકને સૂચના આપો.

કેટલાક ખાસ પ્રકારના મામલે 24 કલાકની અંદર સૂચના મળવા પર બેંક તમારા પૈસા પરત કરવા પ્રતિબદ્ધ હોય છે.

જિતેન જૈનના જણાવ્યા મુજબ ,આવા ઘણા મામલામાં લોકોને લોકપાલની દરમ્યાનગીરી બાદ જ જવાબ મળે છે.

તમે અમને ફેસબુક, ઇન્સ્ટાગ્રામ, યુટ્યૂબ અને ટ્વિટર પર ફોલો કરી શકો છો