ગુજરાત તરફ આવતી સિસ્ટમ ક્યાં પહોંચી અને હવે કયા જિલ્લામાં વધશે વરસાદ, આજે ક્યાં પડશે અતિભારે વરસાદ?
ઇમેજ સ્રોત, Getty Images
હવામાન વિભાગે ગુજરાતમાં ફરીથી સાર્વત્રિક વરસાદની આગાહી કરી છે અને કેટલાક વિસ્તારોમાં ભારે વરસાદ પડવાની પણ શક્યતા વ્યક્ત કરી છે.
હાલ બંગાળની ખાડીમાં સર્જાયેલું ડીપ્રેશન નબળું પડી ગયું છે અને હવે તે વેલમાર્ક લૉ-પ્રેશર એરિયામાં ફેરવાઈ ગયું છે. જે આગળ વધીને ગુજરાત નજીક આવે તેવી સંભાવના છે. હાલ આ સિસ્ટમ મહારાષ્ટ્રના વિદર્ભ અને તેની આસપાસના વિસ્તારો પર પહોંચી છે. જે આગળ વધીને હવે ગુજરાતની નજીકથી પસાર થાય તેવી સંભાવના છે.
આ સિસ્ટમની અસરથી ગુજરાતમાં ફરીથી વરસાદનો નવો રાઉન્ડ શરૂ થયો છે અને કેટલાક વિસ્તારોમાં સોમવારે ભારે વરસાદ પડ્યો હતો.
તાજેતરમાં જ અરબી સમુદ્રમાં બનેલું અસના વાવાઝોડું પણ રાજ્યથી દૂર જઈને દરિયામાં નબળું પડી ગયું છે અને તે પણ વેલમાર્ક લૉ-પ્રેશર એરિયામાં પરિવર્તિત થઈ ગયું છે. હવે આગામી 12 કલાકમાં તે હજી પણ નબળું પડીને લૉ-પ્રેશર બની જશે અને પછી આ સિસ્ટમ વિખેરાઈ જશે.
જોકે, અસના વાવાઝોડાની નબળી પડેલી સિસ્ટમની ગુજરાતમાં કોઈ અસર થવાની નથી. હાલનો વરસાદ બંગાળની ખાડીમાં સર્જાયેલી નવી સિસ્ટમને કારણે થઈ રહ્યો છે.
આ સાથે જ હવામાન વિભાગે હજી વધુ એક લૉ-પ્રેશર એરિયા બંગાળની ખાડીમાં સર્જાવાની આગાહી કરી છે. બંગાળની ખાડીમાં આ નવું લૉ-પ્રેશર 5 સપ્ટેમ્બરની આસપાસ બનશે.
ગુજરાતમાં હવે કયા જિલ્લામાં તરફ વરસાદનું જોર વધશે?
ઇમેજ સ્રોત, IMD
ઑગસ્ટ મહિનાના અંતમાં ગુજરાતમાં પડેલા અત્યંત ભારે વરસાદને કારણે સૌરાષ્ટ્ર, કચ્છ તથા મધ્ય ગુજરાતના વિસ્તારોમાં પૂરની સ્થિતિ પેદા થઈ હતી અને રાજ્યમાં ઘણા વિસ્તારોમાં ખેતી તથા સડક, પરિવહનને નુકસાન થયું છે.
હાલમાં જે સિસ્ટમ આગળ વધીને પશ્ચિમ મધ્ય પ્રદેશ પર આવશે એટલે કે તે ગુજરાત નજીકથી પસાર થશે અને તેના કારણે હાલ ગુજરાતના તમામ વિસ્તારોમાં વરસાદની આગાહી કરવામાં આવી છે.
End of સૌથી વધારે વંચાયેલા સમાચાર
તમારા કામની સ્ટોરીઓ અને મહત્ત્વના સમાચારો હવે સીધા જ તમારા મોબાઇલમાં વૉટ્સઍપમાંથી વાંચો
વૉટ્સઍપ ચેનલ સાથે જોડાવ
Whatsapp કન્ટેન્ટ પૂર્ણ
જોકે, વરસાદનું જોર સૌથી વધારે દક્ષિણ ગુજરાત, મધ્ય ગુજરાત અને ઉત્તર ગુજરાતના વિસ્તારો પર રહેવાની શક્યતા છે. આગામી ત્રણથી ચાર દિવસોમાં ઉત્તર ગુજરાતના કેટલાક વિસ્તારોમાં પણ આ વખતે સારો વરસાદ પડે તેવી શક્યતા છે.
હવામાન વિભાગે 3 સપ્ટેમ્બરના રોજ દક્ષિણ ગુજરાતમાં અતિભારે વરસાદ પડવાની આગાહી કરી છે. જેમાં ભરૂચ, સુરત, ડાંગ, તાપી, વલસાડ તથા નર્મદા જિલ્લામાં વધારે વરસાદ થવાની સંભાવના છે.
આ ઉપરાંત આણંદ, ખેડા, પંચમહાલ, દાહોદ, વડોદરા, છોટા ઉદેપુર, ભાવનગર તથા અમરેલી જિલ્લાના કેટલાક વિસ્તારોમાં ભારે વરસાદ પડવાની સંભાવના છે.
3 સપ્ટેમ્બરથી ઉત્તર ગુજરાતના વિસ્તારોમાં વરસાદ વધવાની શક્યતા છે, જેમાં બનાસકાંઠા, સાબરકાંઠા, મહેસાણા, પાટણ તથા અરવલ્લી જિલ્લામાં ફરીથી વરસાદી માહોલ છવાશે અને કોઈ સ્થળે ભારે વરસાદ થઈ શકે છે.
આગામી બેથી ત્રણ દિવસમાં સૌથી વધારે વરસાદનું જોર દક્ષિણ ગુજરાત, ઉત્તર ગુજરાત, પૂર્વ અને મધ્ય ગુજરાતમાં રહેવાની સંભાવના છે. જેની સાથે કચ્છના કેટલાક વિસ્તારોમાં પણ વરસાદ પડવાની સંભાવના છે.
સૌરાષ્ટ્રમાં પણ ઘણા વિસ્તારોમાં વરસાદની આગાહી હવામાન વિભાગે કરી છે પરંતુ આ વખતે અત્યંત ભારે કે અતિભારે વરસાદ સૌરાષ્ટ્રમાં થવાની શક્યતા ઓછી છે. ઘણા વિસ્તારોમાં છુટોછવાયો હળવાથી મધ્યમ પ્રકારનો વરસાદ થવાની સંભાવના છે.
રાજ્યમાં કેટલા દિવસ સુધી ભારેથી અતિભારે વરસાદની આગાહી?
ઇમેજ સ્રોત, Getty Images
હવામાન વિભાગે જારી કરેલા બુલેટીન પ્રમાણે ગુજરાતમાં આ આખું અઠવાડિયું હળવાથી મધ્યમ પ્રકારનો વરસાદ ઘણા વિસ્તારોમાં ચાલુ રહે તેવી સંભાવના દેખાઈ રહી છે.
આગાહી પ્રમાણે અને હવામાનનાં વિવિધ મૉડલો પ્રમાણે ગુજરાતમાં 8 સપ્ટેમ્બર સુધી વરસાદી માહોલ રહે તેવી સંભાવના છે.
3 સપ્ટેમ્બરના રોજ ગુજરાત રીજનમાં વરસાદનું જોર વધારે રહેવાની અને કોઈ સ્થળે અતિભારે વરસાદ થવાની આગાહી હવામાન વિભાગે કરી છે.
આ ઉપરાંત ગુજરાતમાં 3 અને 4 સપ્ટેમ્બરના રોજ કેટલાક વિસ્તારોમાં અતિભારે વરસાદ થઈ શકે છે અને 6 સપ્ટેમ્બર સુધી ભારે વરસાદ પડવાની સંભાવના વ્યક્ત કરવામાં આવી છે.
હાલ ગુજરાતમાં 1 જૂનથી 3 સપ્ટેમ્બર સુધી સરેરાશ કરતાં 50 ટકા વધારે વરસાદ થયો છે અને મોટા ભાગના જિલ્લામાં સરેરાશથી વધારે વરસાદ નોંધાઈ ચૂક્યો છે.
જેમાં સૌથી વધારે વરસાદ દેવભૂમિ દ્વારકામાં થયો છે, જેમાં સરેરાશ કરતાં 279 ટકા જેટલો વધારે વરસાદ થયો છે. આ ઉપરાંત પોરબંદરમાં 142 ટકા, કચ્છમાં 126 ટકા, જામનગરમાં 106 ટકા સરેરાશ કરતાં વધારે વરસાદ થયો છે.
(બીબીસી માટે કલેક્ટિવ ન્યૂઝરૂમનું પ્રકાશન)
