ટ્રમ્પે ઈરાન, અફઘાનિસ્તાન સહિત અનેક દેશોના લોકોને અમેરિકા આવવા પર પ્રતિબંધ મૂક્યો

અમેરિકાના રાષ્ટ્રપતિ ડોનાલ્ડ ટ્રમ્પે 12 દેશોના લોકો પર અમેરિકાની યાત્રા કરવા પર પ્રતિબંધ લગાવ્યો છે. વ્હાઇટ હાઉસ મુજબ ટ્રમ્પે ટ્રાવેલ પર પ્રતિબંધને લગતા એક આદેશ પર હસ્તાક્ષર કર્યા છે.

આ દેશોમાં અફઘાનિસ્તાન, મ્યાનમાર, ચાડ, રિપબ્લિક ઑફ કોંગો, ઇક્વેટોરિયલ ગિની, ઇરિટ્રિયા, હૈતી, ઈરાન, લીબિયા, સોમાલિયા, સુદાન અને યમન સામેલ છે.

આ ઉપરાંત બીજા સાત દેશોના નાગરિકો માટે પણ ટ્રમ્પે યુએસ આવવા સામે પ્રતિબંધ લગાવ્યા છે. તેમાં બુરુંડી, ક્યુબા, લાઓસ, સિયેરા લિયોન, ટોગો, તુર્કમેનિસ્તાન અને વેનેઝુએલા સામેલ છે.

અમેરિકાનું કહેવું છે કે આ પ્રતિબંધ અમેરિકનોને 'ખતરનાક વિદેશી તત્ત્વો'થી બચાવવા માટે છે.

આ પ્રતિબંધો 9 જૂન, સોમવારથી લાગુ થશે. ટ્રમ્પ દ્વારા બીજી વખત આવી ઘોષણા કરવામાં આવી છે. અગાઉ 2017માં પોતાના પ્રથમ કાર્યકાળ વખતે પણ તેમણે આવા આદેશ પર સહી કરી હતી.

પ્રતિબંધોમાંથી કોને કોને મુક્તિ અપાઈ?

ડોનાલ્ડ ટ્રમ્પના ટ્રાવેલ પ્રતિબંધોમાં કેટલાક ચોક્કસ વર્ગના લોકોને મુક્તિ અપાઈ છે, જે આ મુજબ છે.

ટ્રમ્પના પ્રતિબંધ હેઠળના દેશોએ શું કહ્યું?

ડોનાલ્ડ ટ્રમ્પે એક ડઝન દેશના લોકો પર ટ્રાવેલનો પ્રતિબંધ મૂક્યા પછી કેટલાક દેશોએ પોતાનો પ્રતિભાવ આપ્યો છે.

વેનેઝુએલા પણ અસરગ્રસ્ત દેશોમાં સામેલ છે. વેનેઝુએલાના ગૃહમંત્રી ડિયોસડાડો કેબેલોએ ચેતવણી આપી છે કે "અમેરિકામાં હોવું એ માત્ર વેનેઝુએલાના લોકો માટે નહીં પણ કોઈ પણ વ્યક્તિ માટે બહુ જોખમી હોઈ શકે છે."

તેમણે કહ્યું કે "અમેરિકાનો વહીવટ ચલાવતા લોકો ફાસીવાદી છે. તેઓ માને છે કે દુનિયા તેમની માલિકીની છે અને ગમે તેની સામે કાર્યવાહી કરી શકે છે."

સોમાલિયાના અમેરિકાસ્થિત રાજદૂત દાહીર હસન અબ્દીએ કહ્યું કે તેઓ અમેરિકા સાથેના "લાંબા ગાળાના સંબંધોને મૂલ્યવાન" માને છે.

'મુસ્લિમ પ્રતિબંધનું વિસ્તરણ'

અમેરિકાની ડેમૉક્રેટિક પાર્ટીએ ટ્રમ્પના આ નિર્ણય પર પ્રતિક્રિયા આપી છે.

વૉશિંગ્ટનમાં ડેમૉક્રેટિક કૉંગ્રેસનાં સભ્ય પ્રમિલા જયપાલે સોશિયલ મીડિયા પર લખ્યું છે, "આ પ્રતિબંધો ટ્રમ્પે પોતાના પ્રથમ કાર્યકાળમાં લગાવેલા મુસ્લિમો પરના પ્રતિબંધોનું વિસ્તરણ છે, તે આપણને આંતરરાષ્ટ્રીય સ્તરે અલગ પાડી દેશે."

તેમણે કહ્યું કે "કોઈ દેશની સરકાર અથવા કાર્યપ્રણાલીથી આપણે અસહમત હોઈએ માત્ર એટલા કારણથી આખા સમુદાયને પ્રતિબંધિત કરી દેવો. તેનો અર્થ ખોટી જગ્યાએ દોષ નાખી દેવો એવો થશે."

ડેમૉક્રેટિક કૉંગ્રેસના સભ્ય ડૉન બેયરે ટ્રમ્પ પર "અમેરિકાના સંસ્થાપકોના આદર્શ સાથે વિશ્વાસઘાત" કરવાનો આરોપ લગાવ્યો છે.

તેમણે સોશિયલ મીડિયા પર લખ્યું કે "ટ્રમ્પનો આ ટ્રાવેલ પ્રતિબંધ પૂર્વગ્રહ અને નફરતભર્યો છે અને તે આપણને વધુ સુરક્ષિત નહીં બનાવે. તે આપણે માત્ર વિભાજિત કરે છે અને આપણી વૈશ્વિક નેતૃત્વની ક્ષમતાને નબળી પાડે છે."

બીબીસી માટે કલેક્ટિવ ન્યૂઝરૂમનું પ્રકાશન