Raheem Sterling yabujijwe kuzakina umukino w'Ubwongereza na Montenegro

Rutahizamu Raheem Sterling w'Ubwongereza ntabwo azakina umukino wo gushaka itike ya Euro 2020 uzahuza Ubwongereza na Montenegro ku wa kane "kubera umwuka mubi mu rwambariro", nkuko ishyirahamwe ry'umupira w'amaguru muri icyo gihugu ribivuga.

Uyu mukinnyi wa Manchester City w'imyaka 24 na myugariro Joe Gomez wa Liverpool w'imyaka 22 bateranye amagambo mu mukino wa shampiyona wo ku cyumweru wabereye ku kibuga Anfield cya Liverpool.

Liverpool yawutsinze ku bitego 3 - 1.

Ishyirahamwe ry'umupira w'amaguru mu Bwongereza rivuga ko abo bakinnyi - bombi bakinira ikipe y'igihugu y'Ubwongereza - bongeye guterana amagambo ejo ku wa mbere.

Umutoza Gareth Southgate w'ikipe y'igihugu y'Ubwongereza yagize ati: "Mu buryo bubabaje, amarangamutima y'ejo [ku cyumweru] yarakigaragara ari mabisi mu mukino [w'imyitozo] w'uyu munsi".

Yongeyeho ati: "Kimwe mu bibazo bikomeye cyane n'imbaraga kuri twe, ni uko twashoboye gushyira ku ruhande ubukeba bwo mu makipe ntibugere mu ikipe y'igihugu".

"Twafashe icyemezo cyo kudakinisha Raheem ku mukino uzaduhuza na Montenegro ku wa kane. Ndumva ibyo twakoze ari ikintu cyiza ku ikipe".

"Kuri ubu umwanzuro wamaze gufatwa kandi wemeranyijweho n'abakinnyi bose, ni ingenzi ko dushyigikira abakinnyi kandi tukarangamira umukino wo ku wa kane nijoro".

'Narenzwe n'amarangamutima'

Hagati aho, kuri uyu wa kabiri, Sterling yatangaje ku mbuga nkoranyambaga ko yemera ko "yarenzwe n'amarangamutima" muri uwo mukino wo ku cyumweru.

Yongeyeho ko kuri ubu we na Gomez bameranye "neza".

Mu butumwa bwo kuri Instagram yagize ati: "Twembi Joe [Gomez] nanjye twaravuganye dutahura ibyabaye duhitamo kubivamo tukareba imbere".

"Dukina umukino aho amarangamutima aba menshi kandi ndi umugabo bihagije kuburyo iyo amarangamutima yandenze mbyemera".

Yongeyeho ati: "Reka turangamire umukino wacu wo ku wa kane".

Ku wa kane w'iki cyumweru, Ubwongereza buzaba bukina umukino mpuzamahanga wabwo wa 1000, kandi gutsindira ku kibuga cya Wembley byabuhesha itike yo gukina Euro 2020 bugisigaje umukino.

Iyi kipe izwi ku izina rya 'The Three Lions' ni iya mbere mu itsinda A, ikarusha amanota atatu Czech Republic ndetse ikarusha amanota ane Kosovo - amakipe abiri ya mbere mu itsinda akaba ari yo akomeza.

Gutsinda kw'iyi kipe y'umutoza Southgate kwatuma ibona itike, mu gihe no kunganya ikabona inota rimwe byaba bihagije mu gihe umukino wa Czech Republic na Kosovo nawo warangira zinganyije.