Ukraine ivuga ko Russia yacucagiye za misire mu buseruko no mu bumanuko

Ibitero vya rokete n’ibisasu vya misire vyononye ibitari bike mu bisagara vyo mu buseruko no mu bumanuko bwa Ukraine, nk’uko abategetsi b’akarere babivuga.

Abasivire bane barapfuye mu gitero cabaye mu gisagara ca Siversk mu ntara ya Donetsk, nk’uko buramatari Pavlo Kyrylenko abivuga.

Uturere dutuwemwo n’abasivire twa Druzhkivka muri iyi ntara nyene natwo nyene twaratewe. Inyubakwa y’akaguriro yarasambuwe no mu micungararo hasigara ikinogo kinini.

BBC ntiyashoboye guhinyuza ibivugwa kuri ibi bitero biheruka.

Ingabo z’Uburusiya zirwanira hasi zisa n’izitashoboye gutera intambwe ikomeye mu masaha 24 arangiye mu rugamba rwazo rwo kwigarurira igice gisigaye c’intara ya Donetsk.

Abategetsi ba Ukraine kandi bavuga ko ibisasu vya misire vyatewe mu turere twa Kharkiv mu buraruko, Mykolaiv mu bumanuko, na Kryvyi Rih, igisagara kiri mu buraruko bushira ubuseruko bwa Mykolaiv.

Ingabo za Ukraine ziriko zirarwana n’inguvu zazo zose mu gukingira Mykolaiv, igisagara gikomeye kiri ku nkengera y’uruzi kw’ibarabara rikomeye rija i Odesa, igisagara nyamukuru Ukraine icishako ibidandazwa ishora hanze. Amato y’intambara y’Uburusiya aracabuza Ukraine gushora hanze intete ziva i Odesa.

Icegera c’umushikiranganji wa mbere wa Ukraine Iryna Vereshchuk asaba abanyagihugu kuva mu duce twigaruriwe n’ingabo z’Uburusiya mu bisagara vya Kherson na Zaporizhzhia mu bumanuko.

Aka kamo gasa n’akerekana ko ingabo za Ukraine zoba ziriko zitegura ibindi bitero vyo kwivuna.

Abarusiya barigaruriye igisagara ca Kherson, ariko ingabo za Ukraine zarashoboye kwisubiza uduce tumwe tumwe tw’ako karere.

Igipolisi muri iyo ntara cagiriza Uburusiya guhonya n’ibigirankana ibiterwa.

Mu butumwa cacishije ku rubuga rwa Facebook, cerekana imirima iriko irasha, kikavuga kiti: “Imiriro myinshi yama yaduka uko bukeye uko bwije, amajana n’amajana y’amahegitari y’ingano, hamwe n’izindi ntete aramaze guturirwa”.

Cagiriza kandi ingabo z’Uburusiya gusambura ibigega n’ibikoresho vyo mu burimyi, kandi zikanabuza abanyagihugu kuzimya iyi miriro.

I Kryvyi Rih, vya muzinga vyarononye ishure n’inzu y’uburaro, vyica umugore w’imyaka 41, nk’uko bivugwa na buramatari Valentyn Reznichenko.

Ubushikiranganji bw’Uburusiya bujejwe kwivuna abansi buvuga ko ingabo zabwo zabomoye ikigangara cari kibitswemwo ibirwanisho vyo mu bwoko bwa M777 vyatanzwe na Amerika i Chasiv Yar hafi ya Kramatorsk.

Slovyansk na Kramatorsk vyitezwe kuba ibindi bisagara nyamukuru gukiririmbirwamwo n’Uburusiya muri Donetsk.

Amerika ivuga ko igiye kurungikira Ukraine ibindi birwanisho bidahusha bitera ibisasu vya rokete. Perezida Volodymyr Zelensky wa Ukraine avuga ko ibisasu vya muzinga vyo mu bwoko bwa HIMARS biriko birakoreshwa mu gutera ububiko bw’ibirwanisho mu turere turi mu minwe y’Uburusiya, ibituma Moscou itoroherwa na gato mu kurungika ibindi.

Mu Bwongereza, ibigo vya gisirikare biriko birakoreshwa mu kwigisha ingabo za Ukraine ubuhinga bwo kurwana, nk’uko reta y’Ubwogereza ibivuga. Ni mu ntumbero yo kwigisha abanya-Ukraine 10.000 mu mezi ari imbere.

Mu yandi makuru y’igendereza, igisirikare c’Ubwongereza kivuga ko Uburusiya buriko buregeranya izindi ngabo mu gihugu cose buzegereza hafi ya Ukraine mu kwitegurira ibindi bitero.

Ayandi makuru ku ntambara ya Ukraine n'Uburusiya: