Abashingamateka b’Ubwongereza barondera impinduka ku mugambi wo kurungika abimukira mu Rwanda

Umurwi w’abashingamateka b’aba-Conservateurs, barongowe n’uwahoze ari umushikiranganji w’abinjira n'abasohoka, Robert Jenrick, bariko bagerageza kuzana impinduka mu nteguro y’itegeko rya reta ryo kurungika abimukira mu Rwanda.

Integuro y’iri tegeko irondera kuvugurura umugambi wa reta wo kurungika abasaba ubuhungiro mu Rwanda.

Uno murwi uzwi ko ugizwe n’abashingamateka bashika 40 uvuga ko izi mpinduka “zizokaza” iri tegeko zongere zituze abinjira mu Bwongereza mu kinyegero baciye mu twato duto duto.

Jenrick avuga ko “ino nteguro uko imeze ataco ishobora gushikako”.

Ashigikiwe na Liz Truss yahoze ari umushikiranganji wa mbere, uwahoze ari umushikiranganji w’intwaro yo hagati Suella Braverman, uwahoze arongoye uno mugambwe Sir Iain Duncan Smith, hamwe n’uwahoze ari umushikiranganji Jacob Rees-Mogg.

Abahoze ari abashikiranganji nibura icenda ni bo bazwi ko bashigikiye impinduka zine zitezwe gushikirizwa inama nshingamateka mu ndwi iza.

Abashigikiye izi mpinduka bashaka ko rigabaniriza abimukira amahirwe yo gushingisha imanza mu kwanka kurungikwa mu Rwanda.

Bipfuza kandi ko rihindurwa ku buryo abashikiranganji bazoba bashobora kwihoza amabwirizwa bazoba bahawe na Sentare ya Bulaya ijejwe agateka ka muntu izoba igomba guhagarika ingendo z’indege.

Izi mpinduka ziboneka ko zifise amahirwe make cane yo gushobora kwemezwa mu nama nshingamateka.

Ikibazo aho kiri ni ukumenya igitigiri c’aba babashigikiye biteguye guhakana ino nteguro mu gihe yobandanya imeze uko imeze.

Abarwanya iyi nteguro baririnze gutora bayihakana igihe ishikirizwa ubwa kabiri imbere ya Noweli. Abarenga 20 ntaco bayivuzeko ariko bagabishije ko bazotora bayihakana mu gihe yoguma uko imeze.

Abashingamateka 29 boba bakwiye kugira ngo bahakane iyi nteguro mu gihe boramuka batoye bari kumwe n’abo mu mugambwe w’abakozi.

Iyi nteguro yerekeye Urwanda uko imeze irondera kwerekana mu Bwongereza ko Urwanda rutekanye ku buryo ata ngorane kurungikayo abarondera ubuhungiro, inyuma y’aho Sentare Ntahinyuzwa itangarije ko uno mugambi uteye kubiri n’amategeko, hari muri Munyonyo (11).

Iyi nteguro itegeka abacamanza n’amasentare mu Bwongereza kwihoza bimwe mu bigabane vy’itegeko ry’Ubwongereza rijejwe agateka ka muntu.

Abimukira bazoba bafise uburyo bwo kwitura sentare kugira ntibatwarwe mu Rwanda bafatiye ku mvo zabo bwite.

Ariko abashikiranganji bazoshobora kwihoza amabwirizwa adasanzwe azoba avuye muri Sentare ya Bulaya ijejwe agateka ka muntu yo guhagarika urugendo rw’indege mu gihe urubanza ruzoba rwashingishijwe n’umuntu ku giti ciwe ruzoba rukibandanya.

Ntishika ku rugero rwo gutanga uburenganzira bwo kwanka ingingo zose zo muri sentare ya Bulaya ijejwe agateka ka muntu.

'Kosora' ino nteguro

Jenrick yatanze imihoho ari umushikiranganji bivuye kuri uno mugambi wo kurungika abimukira mu Rwanda avuga ati: "Tudakosoye ino nteguro igihugu kizokwama gihura n’inzitizi z’amategeko, kiriha amahoteri y’abimukira, kibandanye gisesagura n’amamiriyari y’amafaranga y’umunyagihugu mu myaka iri imbere.

"Nimba koko reta ishaka guhagarika aya mato, yategerezwa kwemeza izi mpinduka hanyuma igakoresha ububasha bw’inama nshingamateka kugira ngo dushire mu ngiro ivyo twemereye abanyagihugu".

Izi mpinduka zifise intumbero yo kuzibira abimukira borondera kwitura sentare kugira ntibatwarwe.

Muri izi mpinduka zisabwa, amabwirizwa ayo ari yo yose atanzwe na Sentare ya Bulaya ijejwe agateka ka muntu ntazofatwa ko ari ngombwa ko reta iyashira mu ngiro.

Izi mpinduka zirimwo kandi n’ingingo zemerera iri tegeko kwihoza ayandi mategeko arivuguruza ashobora kuza abangamira ingingo yo kurungika abantu mu Rwanda.

Mu rwandiko yacishije mu kinyamakuru Daily Mail, uwahoze ari umushikiranganji w’intwaro yo hagati Braverman, avuga ati: "Abashingwamanza ba reta bo nyene ubwabo boba baragabishije ko ino nteguro, uko isanzwe imeze ubu, irimwo utunenge. Baremeza ko izokwama izingamikwa n’imanza z’abimukira”.

Downing Street (ibiro vy’umushikiranganji wa mbere w’Ubwongereza) iherutse kuvugako ino nteguro ari ryo “tegeko rya mbere rigumye rishikirijwe inama nshingamateka”.