Igitero cy'Uburusiya muri Ukraine kuri Noheli 'ntikigira ubumuntu' – Zelensky
Ahavuye isanamu, Volodymyr Zelensky / X
Perezida wa Ukraine Volodymyr Zelensky avuga ko igitero cy'ibisasu bya misile cy'Uburusiya muri Ukraine kuri uyu munsi mukuru wa Noheli kitarimo ubumuntu.
Leta ya Ukraine yasabye ko hagabanywa ikoreshwa ry'umuriro w'amashanyarazi, mu gihe Uburusiya bwagabye igitero ku bikorwa-remezo by'ingufu z'amashanyarazi bukoresheje misile ziraswa mu ntera ndende zo mu bwoko bwa 'cruise' n'izo mu bwoko bwa 'ballistic'.
Perezida Zelensky yavuze ko "buri gitero kinini cyane cyose cy'Uburusiya kigira igihe cyo gutegurwa. Nta na rimwe kiba ari icyemezo gifashwe by'ako kanya gusa. Ni amahitamo agambiriwe atari gusa ku ho kurasa, ahubwo n'igihe n'itariki".
"Uyu munsi, [Perezida w'Uburusiya Vladimir] Putin yahisemo ku bushake Noheli ngo abe ari bwo agaba igitero. Ni iki cyaba kutagira ubumuntu kurenza ibyo? Misile zirenga 70, zirimo na 'ballistic', na 'drone' [indege nto z'intambara zitajyamo umupilote] zirenga 100. Ibyagambiriwe ni urwego rwacu rw'ingufu z'amashanyarazi. Bakomeje kurwanira ko Ukraine iba mu kizima."
Ahavuye isanamu, EPA
Zelensky yavuze ko imibare y'ibanze igaragaza ko abarinzi ba Ukraine bashoboye guhanura misile zirenga 50 hamwe n'umubare munini w'izo 'drone'. Ariko yavuze ko bibabaje kuba hari izashoboye kurasa aho zari zigambiriye.
Yavuze ko mu turere twinshi umuriro w'amashanyarazi wabuze ariko ko abakozi bo muri urwo rwego barimo gukora ngo wongere kuboneka vuba cyane hashoboka.
Yashimiye buri wese urimo gukorera igihugu muri aka kanya, "uri ku rugamba, urimo kurinda ikirere cyacu".
Ati: "Ikibi cy'Uburusiya ntikizamena Ukraine ndetse ntikizagoreka Noheli yacu."
Ahavuye isanamu, Reuters
Bamwe mu batuye mu murwa mukuru Kyiv bagiye kwikinga icyo gitero ahategerwa za gariyamoshi zigendera munsi y'ubutaka.
Nataliia Ziumchenko, w'imyaka 37, yabwiye ibiro ntaramakuru Reuters ko afite ubwoba kuko afite umwana.
Ati: "Birumvikana, ndashaka kuba ndi mu rugo nizihiza [Noheli] ariko byabaye ngombwa ko twikinga kuko kuguma mu rugo biteye ubwoba, rero twaje aha ho kwikinga. Turashaka amahoro."
Sofiia Lytvynenko, undi muturage w'i Kyiv, avuga ko arakaye cyane.
"Biranababaje cyane. Twizeye ko bizagenda neza ndetse ko bizarangira vuba."
Ariko hari n'abafite icyizere. Oleksandra, w'imyaka 28, agira ati: "Noheli ntiburijwemo."
Avuga ko ibiryo gakondo n'ibinyobwa by'Abanya-Ukraine "biradutegereje mu rugo".
"Turanasura inshuti zimwe, abo twabyaye muri batisimu. Abana banjye bacyeneye gusinzira birenzeho."
