Burkina Faso: Muri cya kirombe cya Perkoa cyaburiyemo abacukuzi habonetse imirambo ine

Umuvugizi wa leta ya Burkina Faso avuga ko imirambo ine y'abacukuzi b'amabuye y'agaciro yakuwe mu kirombe gicukurwamo ibuye ry'agaciro rya Zinc, nyuma y'iminsi 39 hakorwa igikorwa cyo gushakisha ababuriwe irengero bakirimo.

Icyo kirombe kiri ahitwa Perkoa mu ntara ya Sanguié, rwagati muri Burkina Faso, cyuzuyemo amazi kubera imvura nyinshi yaguye mu kwezi gushize.

Ku itariki ya 16 y'ukwezi kwa kane, ni bwo byatangajwe ko abacukuzi umunani baheze mu ntera ya metero zibarirwa mu magana mu bujyakuzimu muri icyo kirombe gicukurwamo na kompanyi Trevali yo muri Canada.

Ibikorwa by'ubutabazi byo kubashakisha byatangiye nyuma gato yuko baburiwe irengero. Icyo kirombe gifite ubujyakuzimu bwa metero zirenga 710.

Mu itangazo ryo ku wa kabiri nijoro, umuvugizi wa leta ya Burkina Faso yihanganishije imiryango yabuze abayo hamwe n'abatuye hafi y'icyo kirombe.

Ibikorwa byo gushakisha birakomeje ngo haboneke abandi bacukuzi bane bakiburiwe irengero.

Abanya-Burkina Faso batandatu, Umunya-Zambia umwe n'Umunya-Tanzania umwe ni bo bari muri iki kirombe ubwo imvura nyinshi yagwaga amazi akacyuzuramo.

Mu minsi ishize abo mu miryango yabo bavuze ko bafite icyizere ko bashobora kuboneka ari bazima, ariko banafite umujinya w'uburyo ubutabazi bwatinze gukorwa.

Ubutabazi bwatangiye gukorwa ari uko habaye imyigaragambyo ku nyubako ya leta iri hafi aho nyuma y'iminsi itanu habaye imyuzure.

Leta yatangije iperereza ry'ubucamanza ku byabaye kandi abakuriye icyo kirombe bategetswe kutava muri icyo gihugu.