Burkina Faso: Abacukuzi umunani bamaze ibyumweru bibiri baraheze mu kirombe

Abakora mu bikorwa by'ubutabazi muri Burkina Faso barimo kugerageza kugera ku bacukuzi b'amabuye y'agaciro (ubutare mu Kirundi) bamaze ibyumweru birenga bibiri baraheze mu kirombe.

Icyo kirombe gicukurwamo ibuye ry'agaciro rya Zinc ahitwa Perkoa mu ntara ya Sanguié, rwagati muri Burkina Faso, cyuzuyemo amazi kubera imvura nyinshi yaguye mu kwezi gushize.

Batandatu muri abo bacukuzi b'amabuye y'agaciro ni Abanya-Burkina Faso, naho abandi babiri bakomoka muri Zambia no muri Tanzania.

Leta ya Burkina Faso yatangije iperereza ryo mu rwego rw'ubucamanza ku byabaye kuri icyo kirombe, ndetse kugeza ubu abagishinzwe ntibemerewe kuva mu gihugu.

Kompanyi Trevali yo muri Canada y'ubucukuzi bw'amabuye y'agaciro ivuga ko irimo gukora amasaha 24 kuri 24 ku munsi ngo imenye aho abo bacukuzi baherereye.

Ivuga ko ubwo icyo kirombe cyuzuragamo amazi, abakozi umunani bari barimo hasi cyane muri icyo kirombe kurusha bagenzi babo bakorana - ku ntera irenga metero 500 uvuye ku butaka.

Amakuru avuga ko umuriro w'amashanyarazi (umuyagankuba mu Kirundi) n'uburyo bw'itumanaho byahagaze.

Minisitiri w'intebe wa Burkina Faso Albert Ouédraogo yasuye aho hantu mu mpera y'icyumweru gishize, yegeka ibyabaye ku bakuriye icyo kirombe, avuga ko urutambi (dynamite) rwari rwakoreshejwe bigatuma amazi ashobora kwinjira mu kirombe mu buryo bworoshye kurushaho.

Kompanyi Trevali yavuze ko izi iby'ayo magambo ya Minisitiri w'intebe kandi ko na yo irimo gukora iperereza ku mpamvu yateje iyo mpanuka, nkuko bitangazwa n'ibiro ntaramakuru Reuters.