US: Vicky White na Casey White 'bateganyaga kurasana' na polisi mu gihe bafatwa

Polisi yo muri leta ya Indiana muri Amerika yavuze ko imfungwa icyekwaho ubwicanyi n'umucungagereza w'umugore wari watorokanye na yo bateganyaga gupfira mu kurasana iyo bafatwa.

Imfungwa Casey White, w'imyaka 38, na Vicky White (badafitanye isano nubwo bahuje izina), w'imyaka 56, batawe muri yombi ku wa mbere nyuma yo guhigwa mu gihe cy'iminsi 11, ubwo imodoka yabo byarangiraga iguye mu muferege ubwo yari yokejwe igitutu na polisi.

Casey yishyikirije polisi ariko Vicky arirasa mbere yuko atabwa muri yombi, nkuko polisi yabivuze.

Bombi byemezwa ko bari bafitanye umubano w'urukundo.

Mu kiganiro n'abanyamakuru ku wa kabiri, Dave Wedding, umukuru wa polisi mu karere ka Vanderburgh muri Indiana, yavuze ko niba abo bombi bari bafite gahunda yuko batoroka, yari ifite inenge.

Yavuze ko Casey White yahaswe ibibazo igihe kirekire nyuma yuko atawe muri yombi, abwira abakora iperereza ko "batekerezaga ko batwaye imodoka kugeza ahantu kure cyane hahagije bashaka guhagarara akanya gato, bakiga ku handi hantu ho kwerekeza".

Ku wa kabiri, umucamanza yashyize mu kwezi kwa gatandatu itariki y'iburanishwa rya Casey ku kirego cya mbere cy'ubwicanyi.

Abategetsi bavuga ko igihe azaba yagejejwe mu rukiko ku birego bishya byo gutoroka gereza, azoherezwa muri gereza itandukanye na za kasho, gereza ubusanzwe igenewe abo ibyaha byahamye.

Rick Singleton ukuriye polisi mu karere ka Lauderdale muri leta ya Alabama aho bari batorotse kasho, yabwiye televiziyo News 19 yo muri Alabama ati: "Muri kasho y'akarere, buri gihe uba ufite abantu baza n'abagenda. Mu magereza si ko ibintu biba bimeze".

Casey na Vicky baburiwe irengero bavuye muri kasho y'akarere ka Lauderdale ku itariki ya 29 y'ukwezi kwa kane.

Wari wo munsi wa nyuma w'akazi wa Vicky mbere yuko ajya mu kiruhuko cy'izabukuru. Yari aherutse kugurisha inzu ye, anabwira bagenzi be bakoranaga ko yateganyaga kurushaho kumara igihe ari ku mwaro w'inyanja.

Nkuko abategetsi babivuga, yavuze ko ajyanye iyo mfungwa - wenyine, arenze ku mategeko ya gereza asaba ko imfungwa iregwa ubwicanyi ijyanwa nibura n'abapolisi babiri - gukorerwa isuzumwa ry'ubuzima bwo mu mutwe, ryaje gutahurwa ko ryari irya baringa (irihimbano).

Ku wa gatatu w'icyumweru gishize, polisi yatahuye ko bari bari mu mujyi wa Evansville muri Indiana, ku ntera ya kilometero 430 uvuye kuri ya kasho yo muri Alabama, nyuma yuko umukozi wo ku kinamba cyogerezwamo imodoka atangaje ko hari ikamyo imaze iminsi iri aho akorera.

Amashusho ya kamera z'umutekano yaje kwerekana Casey ahagaze iruhande rwayo.

Umupolisi mukuru Wedding yavuze ko bombi byagaragaye nkaho bari bamaze hafi icyumweru bihishe muri uwo mujyi.

Uko bafashwe

Ku wa mbere imodoka yo mu bwoko bwa Cadillac ifite aho ihuriye na bo yabonywe ahaparikwa imodoka kuri moteli (hoteli ntoya). Vicky wari wambaye imisatsi y'imiterano (itari karemano), nyuma yabonywe asezera muri iyo moteli, yinjira mu modoka yari itwawe na Casey.

Polisi yari yashyizeho uburyo bw'amashusho bwo kubagenzura ubwo hakurikiragaho kubirukaho, birangira umugabo wo mu rwego rw'Amerika rugenzura iyubahirizwa ry'amategeko - ruzwi nka US Marshals Service - agongesheje imodoka ye iyabo.

Byatumye imodoka yabo igwa mu muferege, iribirindura.

Imbunda nyinshi, zirimo n'inini yo mu bwoko bwa AR-15 hamwe n'imbunda ntoya zo mu bwoko bwa 9mm, hamwe n'imisatsi myinshi y'imiterano (wigs/perruques) ndetse n'amadolari 29,000 (miliyoni 29 Frw), byasanzwe muri iyo modoka.

Umupolisi mukuru Wedding yavuze ko icyo "gikorwa cyihuse kandi kirimo umurego" cya polisi bishoboka ko cyarokoye ubuzima bwa benshi.

Ku wa kabiri yabwiye abanyamakuru ati: "Nyuma twatahuye ko, iyo [abapolisi] bataba babikoze, uwatorotse yari agiye kurasana n'abashinzwe umutekano", avuga ko Casey yahishuriye polisi iyo gahunda.

Wedding yavuze ko Vicky yirashe "nk'ako kanya" mbere yuko abapolisi bamugeraho.

Ku wa mbere nimugoroba, ibiro by'ubugenzacyaha by'akarere ka Vanderburgh muri Indiana byemeje ko Vicky yapfiriye mu bitaro byaho nyuma y'uko kugerageza kumuta muri yombi.

Mbere, urwego US Marshals Service rwari rwavuze ko Casey na Vicky bari babonywe bwa nyuma ari ku wa gatanu bari mu modoka y'ibara ry'ikigina yo mu bwoko bwa Ford Edge ifite nimero iyiranga (plaque) yo muri Alabama.

Abategetsi bari baburiye ko Casey, ufite uburebure bwa metero ebyiri, ateje "akaga gakomeye", basaba abashinzwe umutekano "kutagira ikintu na kimwe bakinisha" hamwe na we.

Hagati aho, Vicky we yari yararanzwe n'imikorere myiza mu kazi ke nk'umucungagereza.

Casey White yaregwaga ubwicanyi bwo mu kwezi kwa cyenda mu 2020, mu gutera icyuma Connie Ridgeway wari ufite imyaka 58.

Yari asanzwe ari mu gifungo cy'imyaka 75 kubera uruhare mu rukurikirane rw'ibyaha byo mu 2015, birimo kwinjira mu nzu mu buryo bunyuranyije n'amategeko agakora ubujura, kwiba imodoka, no kwiruka atoroka polisi imuhagaritse.

Amakuru avuga ko yemeye ubwicanyi, ariko nyuma akavuga ko nta cyaha yakoze kubera ko atari ameze neza mu mutwe, ndetse abategetsi bongeyeho ko yari afungiye muri kasho y'akarere ka Lauderdale ategereje kuzaburanishwa.

Ahamwe n'icyaha ashobora guhanishwa igihano cy'urupfu.

Nyuma yuko Casey yongeye gufatwa, abategetsi bo mu karere ka Limestone muri Alabama bongeye kubyutsa iperereza ku rupfu rwo mu mwaka wa 2008 rwa Christy Shelton wahoze ari umukobwa bakundanaga, rwari rwaremejwe n'abategetsi ko rwatewe no kwiyahura.

Umuryango wa Shelton umaze igihe wemeza ko Casey - wari uri mu rugo rwa Shelton ubwo yapfaga - yabigizemo uruhare.