Rwanda: Ibibazo batewe no kuba ikiyaga cya Karago kiri gukama

Inyandiko gusa
Igice cy'ibumoso ku ifoto ni cyo kiri kugenda gikama

Ahavuye isanamu, BBC GAHUZA

Insiguro y'isanamu, Igice cy'ibumoso ku ifoto ni cyo kiri kugenda gikama

Na Yves Bucyana/ BBC Gahuzamiryango

Ikiyaga cya Karago kiri gukama ku muvuduko uteye impungenge n'igihombo ku bagituriye nk'uko babivuga.

Iki kiyaga kiri hagati y'imisozi ihanamye mu majyaruguru ashyira uburengerazuba bw'u Rwanda, ukigezeho ubona igice kinini biboneka ko ari aho cyageraga ariko ubu hakamye.

Agnès Karamuka ati: "Aha hose twicaye cyari [ikiyaga] gihari". Ariko ubu aha bahatera ubwatsi bw'inka, nk'uko abivuga.

Imihindagurikire y'ikirere itera imvura zidasanzwe n'izuba rikabije bigira ingaruka mbi ku bidukikije n'ubuzima bw'abatuye isi kurusha ikindi gihe cyose mbere, nk'uko raporo nshya ya ONU/UN ibivuga.

Imigezi ya Nyamukongoro na Busoro isanzwe yisuka muri Karago yamanuye isuri ikabije ituma igice cy'iki kiyaga gikama, nk'uko Jean Pierre Hategekimana ugituriye abivuga.

Aha hose mbere hari mu kiyaga nk'uko abagituriye babivuga

Ahavuye isanamu, BBC GAHUZA

Insiguro y'isanamu, Aha hose mbere hari mu kiyaga nk'uko abagituriye babivuga

Ibi si ubwa mbere bibaye, mu myaka 13 ishize abaturiye Karago iri ku buso bwa hegitari (ha) 118 bavuga ko yigeze gukama ikagera kuri 98 ha.

Ariko muri uyu mwaka gukama byarihuse kandi ku buso bunini. Abari batunzwe n'uburobyi muri Karago bavuga ko ubu bitagishoboka.

Skip Ibisomwa cane and continue reading
Ibisomwa cane

End of Ibisomwa cane

Ahagana saa tanu, nasanze Bwanakweli Joseph ku kiyaga, avuga ko yahageze saa kumi n'ebyiri n'igice za mugitondo n'indobo n'indobani, kureba niba hari icyo yaramura.

Indobo ye nta kintu kirimo, indobani yayishyize mu mazi aracyategereje kugira icyo afata...

Imbere ye n'inyuma ye hose hahoze ari mu kiyaga

Ahavuye isanamu, BBC GAHUZA

Insiguro y'isanamu, Imbere ye n'inyuma ye hose hahoze ari mu kiyaga

Ati: "Cyarantunze, ariko amafi yabagamo yagiye apfa kubera gukama n'amasuri amanura ibyondo bikayica. Ubu nta kintu kikibonekamo ni ugupfa kuhicara umuntu ateregeje…"

Bwanakweli avuga ko mbere muri iki kiyaga hazaga abakerarugendo bafite amato yabo mato bagatemberamo "ariko ubu ntibakiza".

Rémy Norbert Dukuze wo mu kigo cy'igihugu gishinzwe kubungabunga umutungo kamere w'amazi, avuga ko uku gukama kwatewe n'imvura idasanzwe yaguye mu ntangiriro z'uyu mwaka.

Isuri iva ku misozi ikikije Karago bavuga ko ari yo yatumye kiri gukama

Ahavuye isanamu, BBC GAHUZA

Insiguro y'isanamu, Isuri iva ku misozi ikikije Karago bavuga ko ari yo yatumye kiri gukama

Ati: "Imvura nyinshi yaguye mu kwezi kwa mbere n'ukwa kabiri yateye inkangu imanura itaka ryinshi cyane, ni ryo ryaje rizanywe n'iyo migezi rifunga aho imigezi yinjirira mu kiyaga.

"Bituma rero ishaka indi nzira ku ruhande hahandi huzura igitaka."

Dukuze avuga ko ubu hari ibikorwa byo kurwanya isuri ku misozi ikikije Karago, birimo gutera ibiti no gukora imirwanyasuri, kugira ngo barebe ko iki kiyaga cyasubirana.