Abimukira 41 bemerewe kururuka mu bwato bw'umuryango ufasha mu Butaliyani
Ahavuye isanamu, EPA
Itsinda ry'abimukira 41 barokowe bururutse mu bwato bw'umuryango ufasha mu Butaliyani, nyuma y'umunsi umwe uwari ubutwaye arenze ku mabwiriza yamubuzaga guhagarika ubwo bwato muri iki gihugu.
Nubwo uwari utwaye ubwo bwato bwitwa "Alex" yari yabujijwe kubuhagarika ku cyambu, yabirenzeho ejo ku wa gatandatu kubera "ibijyanye n'isuku bibi mu buryo butakwihanganirwa" byari biri muri ubwo bwato.
Abo bimukira ubu bamaze kuva muri ubwo bwato nyuma yo kumara amasaha bacunzwe n'abashinzwe umutekano.
Mbere yaho, Matteo Salvini, Minisitiri w'ubutegetsi bw'igihugu w'Ubutaliyani, yari yasezeranyije ko ataribwemerere abo bimukira kuva mu bwato.
Mu butumwa bwo ku rubuga nkoranyambaga rwa Facebook, yagize ati: "Nabonye ko leta y'Ubudage yanyandikiye ibaruwa uyu munsi isaba kongera gufungura ibyambu no kureka abimukira bose bakava mu bwato".
"Oya, oya, oya, rwose ni oya".
Ahavuye isanamu, EPA
Mu mwaka ushize wa 2018, Bwana Salvini yafunze ibyambu by'Ubutaliyani abuza ubwato bw'ubutabazi kwinjira muri iki gihugu, ndetse Ubutaliyani ubu bwashyizeho amande ku muntu uwo ari we wese watwara ubwato mu mazi y'iki gihugu nta ruhushya yabiherewe.
Umuryango ufasha wa Mediterranea ari na wo nyir'ubwo bwato, watangaje ifoto ku rubuga nkoranyambaga rwa Twitter igaragaza iryo tsinda ry'abimukira bururuka mu bwato bajya ku nkombe.
Iyi nkuru irimwo ivyatanzwe na X. Dukeneye uruhusha rwawe imbere yuko bigushikira, kuko birashobora kuba bikoresha cookies hamwe n'ubundi buhinga. Wobanza ugasoma aha X amategeko agenga cookien'ayagenga ubuzima bwite imbere yuko wemera. Kugira ubibone hitamwo 'emera hanyuma ubandanye'.
Impera ya X ubutumwa
Abategetsi bo mu Butaliyani bari bagiye muri ubwo bwato nyuma gato ya saa sita z'ijoro, batangaza ko ubwo bwato babufatiriye ndetse ko batangije iperereza ku butwaye ku gufasha abimukira batemewe n'amategeko, nkuko byatangajwe n'umuryango ufasha wa Mediterranea.
Mbere yo kururuka muri ubwo bwato, uwo muryango ufasha wari watangaje ubutumwa ku rubuga rwa Twitter uvuga ko abo bimukira bari "mu bihe birenze ukwemera", kandi ko gukomeza gutuma bategereza ari ukubakorera "ubugome butari ngombwa".
