Perezida Essebsi wa Tuniziya w'imyaka 92 y'amavuko yavuze ko ataziyamamariza indi manda

Perezida wa Tuniziya w'imyaka 92 y'amavuko yatangaje ko nta gahunda afite yo kwiyamamaza mu matora ateganyijwe kuba mu kwezi kwa cumi na kumwe k'uyu mwaka, nubwo hari bamwe bari bamusabye kwiyamamaza.

Beji Caid Essebsi yabwiye abitabiriye inama y'ishyaka Nidaa Tounes riri ku butegetsi ko umuntu ubyiruka ari we ukwiye kumusimbura.

Mu mwaka wa 2014, Bwana Essebsi yatsinze amatora ya perezida ya mbere yari abaye mu bwisanzure muri iki gihugu.

Uwahoze ari Perezida Zine el-Abedine Ben Ali yahiritswe ku butegetsi mu mwaka wa 2011 abumazeho imyaka 23, ahirikwa mu mpinduramatwara ziswe Arab Spring zabaye mu karere k'ibihugu by'Abarabu.

Tuniziya ishimagizwa nk'igihugu kimwe gusa cyashoboye kugera kuri demokarasi mu bihugu byose byabayemo izo mpinduramatwara.

Ariko mu myaka ya vuba ishize, iki gihugu cyibasiwe n'ibitero by'imitwe igendera ku matwara akaze y'idini ya kisilamu ndetse gihura n'ibibazo by'ubukungu, hakomeza no kugaragara ikibazo cy'ibura ry'akazi.

Ishyaka rya Bwana Essebsi ryari ryamusabye kongera kwiyamamaza kubera ko, bijyanye n'itegekonshinga ry'iki gihugu, yemerewe kwiyamamariza manda ya kabiri.

Ariko we yavuze ko atakwiyamamaza, avuga ko igihe kigeze cyo "gufungurira umuryango urubyiruko".

Biteganyijwe ko amatora ya perezida muri Tuniziya aba ku itariki ya 17 y'ukwezi kwa cumi na kumwe uyu mwaka, nubwo bwose nta na rimwe mu mashyaka akomeye muri iki gihugu ryari ryatangaza umukandida waryo.

Icyemezo cya Bwana Essebsi kije hashize iminsi mu gihugu gituranyi cya Algeria, Abdelaziz Bouteflika w'imyaka 82 y'amavuko yeguye ku mwanya wa Perezida nyuma y'imyigaragambyo yo kumwamagana yari imaze ibyumweru, yatewe nuko ku ikubitiro yashakaga kongera kwiyamamaza.

Abigaragambya muri Algeria bavuze ko batazahagarika imyigaragambyo kugeza leta yose ya Algeria yeguye.