Perezida Trump yanenzwe kubera amagambo ye ashyigikira Uburusiya ku bivugwa ko bwivanze mu matora yo muri Amerika

Habayeho kunenga Perezida Donald Trump wa Leta Zunze Ubumwe z'Amerika nyuma yaho ashyigikiye Uburusiya ku bivugwa ko bwivanze mu matora yo muri Amerika yo mu mwaka wa 2016.

Mu nama na Perezida Putin w'Uburusiya yaberaga mu murwa mukuru wa Finlande, Helsinki, Bwana Trump yavuguruje inzego z'ubutasi z'Amerika, avuga ko Uburusiya nta mpamvu n'imwe bwari bufite yo gutuma bwivanga mu matora yo muri Amerika.

Paul Ryan, umurepubulikani ukuriye abandi muri kongere y'Amerika akaba n'umuvugizi w'iyi kongere, yavuze ko Bwana Trump agomba kubona ko "Uburusiya atari inshuti yacu."

Bwana Trump na we ni uwo mu ishyaka ry'abarepubulikani.

Ukuriye ubutasi bw'Amerika na we yihakanye Bwana Trump ku mugaragaro.

Mu itangazo yasohoye, Dan Coats ukuriye ubutasi bw'Amerika yavuze ko Uburusiya ari bwo buri inyuma y'"ibikorwa bikomeje kandi byinshi bigerageza" gukoma mu nkokora demokarasi y'Amerika.

Bwana Putin ahakana ibi bivugwa.

Mu nama yabo yabaye ku wa mbere, ba Perezida Trump w'Amerika na Putin w'Uburusiya bagiranye ibiganiro byamaze hafi amasaha abiri batari kumwe n'abajyanama babo.

Perezida Trump yavuze iki?

Mu kiganiro n'abanyamakuru nyuma y'inama, Bwana Trump yabajijwe niba yizera ibyo inzego z'ubutasi z'Amerika zivuga cyangwa niba yizera Perezida w'Uburusiya ku bivugwa ko Uburusiya bwivanze mu matora y'Amerika yo mu mwaka wa 2016.

Bwana Trump yasubije ati:

"Perezida Putin avuga ko atari Uburusiya [bwabikoze]. Simbona impamvu bwaba ari bwo."

Bwana Trump yananenze ubutegetsi bw'Amerika bwo mu gihe cyashize.

Yavuze ko ari bwo bwo kubazwa kuba umubano hagati y'Amerika n'Uburusiya utameze neza. Ko atari Uburusiya bwo kubibazwa.