Internet yacitse muri Iran yose mu gihe Ayatollah yavuze ko abigaragambya barimo 'kugerageza gushimisha Trump'

Umutegetsi w'ikirenga wa Iran yihanije abaturage bamaze ibyumweru bibiri mu myigaragambyo hose mu gihugu avuga ko ari "abagizi ba nabi" barimo "kugeragaza gushimisha" perezida Trump wa Leta Zunze Ubumwe za Amerika.

Mu ijambo yavugiye kuri televiziyo y'igihugu, Ayatollah Ali Khamenei, yavuze ko barimo gukora ibyo kuko Trump yavuze ko abashyigikiye, yongeraho ati: "Niba [Trump] ashoboye, nategeke igihugu cye".

Hagati aho internet muri Iran yakomeje gucika mu gihugu hose, aho abanya-Iran bari hanze y'igihugu bavuga ko batarimo kubasha kuvugisha imiryango yabo mu gihugu.

BBC hamwe n'ibindi binyamakuru mpuzamahanga byinshi ntabwo byemerewe gukorera muri Iran, bityo kugenzura amakuru y'ibihabera hifashishwa ahanini imbuga nkoranyambaga.

Kuri iyi myigaragambyo yo muri Iran, Trump aherutse gutangaza ko ubutegetsi bwa Iran "nibutangira kwica abantu…tuzabakubita bikomeye cyane".

Iyi myigaragambyo yatangiriye ku murwa mukuru Tehran tariki 28 Ukuboza(12) itewe no gutakaza agaciro kw'ifaranga rya Iran kwagize ingaruka ku mibereho y'abaturage.

Abanya-Iran benshi bari kujya mu mihanda kwigaragambya, akenshi nijoro kuko izuba ryo kumanywa riba rikomeye cyane, basaba ko ubutegetsi bwa Kislamu buriho buvaho, bamwe bakavuga ko hakwiye gusubiraho ubwami.

Umwe mu bagore bari mu myigaragambyo yabwiye BBC ko inzozi ze "zibwe" kandi ashaka ko ubutegetsi bumenya ko "agifite ijwi ryo gutera hejuru, n'igipfunsi cyo kubakubita mu maso".

NetBlocks ikurikirana uko internet ikora ku isi ivuga ko kugeza mu gitondo uyu munsi Iran yari amaze amasaha 12 nta internet ihari, aho "internet mu gihugu yari iri kuri 1% ugereranyije n'uko isanzwe".

Mu yindi myigaragambyo yabayeho mbere, ubutegetsi bwagiye bukuraho internet buvuga ko ari ukwirinda ibitero byo kuri internet.

Mu myigaragambyo ikomeye ya 2019, internet yakuweho mu gihugu hose, icyo gihe hishwe abantu babarirwa mu magana bimenyekana Internet isubiyeho, nk'uko imiryango iharanira uburenganzira bwa muntu yabitangaje.

Mu minsi 13 iyi myigaragambyo imaze, iyi myigaragambyo yageze mu mujyi minini n'imito irenga 100 mu ntara zose 31 z'igihugu, nk'uko bivugwa n'ikigo Human Rights Activist News Agency (HRANA) gikorera muri Amerika.

Ayatollah Khamenei uri ku butegetsi kuva mu 1989 yavuze ko atangajwe no kuba "itsinda ry'abantu batagize icyo bitayeho" bemera ibyo Trump avuga "maze bagakora ibyo yifuza. Bagatwika imyanda kugira ngo bamushimishe".

Ku munsi w'ejo gusa BBC ishami ry'ururimi rw'Igiperse kivugwa muri Iran ryatangaje imijyi igera kuri 50 - cyane cyane yo mu karere k'aba-Kurde - na yo yinjiye mu myigaragambyo kimwe n'ahandi mu gihugu.

BBC Persian yemeza ko abantu nibura 22 bamaze gupfa kuva iyi myigaragambyo yatangira. Naho HRANA ivuga ko hapfuye abantu 34 hamwe n'abashinzwe umutekano bane, mu gihe abantu 2,200 bafashwe bagafungwa.