Abahungu baheze mu buvumo muri Thailande "bashobora kuhamara amezi"

Inyandiko gusa
Abakozi benshi bashinzwe gutabara bahageze ngo barebe ko hari icyo bofasha

Ahavuye isanamu, Getty Images

Insiguro y'isanamu, Abakozi benshi bashinzwe gutabara bahageze ngo barebe ko hari icyo bofasha

Igisirikare muri Thailande kiravuga ko abahungu 12 n'umutoza wabo w'umupira w'amaguru baheze mu buvumo bakiri bazima, ariko bazasabwa kumenya koga bibira.

Ubundi buryo ngo ni gutegereza igihe kiriho cy'imyuzure kikagabanuka kugira ngo bashobore gukurwamo.

Bari bamaze iminsi icyenda baraburiwe irengero. Ku wa mbere nibwo babonywe n'abantu bazi koga bibira mu mazi, bababona bari ku gace gato k'inkuka.

Abakora mu bikorwa by'ubutabazi ubu noneho bari guhangana n'amazi akomeje kwiyongera kugira ngo bashobore kubagezaho ibindi biribwa byo kubatunga.

Igisirikare kiravuga ko bakeneye gukomeza kugemurirwa ibirirwa mu gihe nibura cy'amezi ane ari imbere.

Narongsak Osotthanakon, Guverineri w'intara ya Chiang Rai yo mu majyaruguru ya Thailande, yavuze ko bari kugerageza gushyira umuriro w'amashanyarazi ndetse n'imirongo ya telefoni muri ubwo buvumo kugira ngo abo bantu bashobore kuganira n'ababyeyi babo.

Babonetse gute?

Abongereza babiri b'abatabazi mu byo koga bibira bitabiriye igikorwa cyo gushakisha abo bahungu n'umutoza wabo babonye abo bahungu ku wa mbere nijoro.

Videwo igaragaza uko byari bimeze bahura nabo bwa mbere yashyizwe ku rubuga nkoranyambaga rwa Facebook n'umutwe w'abasirikare kabuhariwe bo muri Thailande.

Skip Ibisomwa cane and continue reading
Ibisomwa cane

End of Ibisomwa cane

Abo bahungu bagaragara urumuri rw'itoroshi rubakubitaho bicaye ku gace k'inkuka hejuru y'amazi muri ubwo buvumo, babwira abo batabazi ko bose hamwe ari 13 kandi ko bashonje.

Ifoto yo ku rubuga nkoranyambaga rwa Facebook igaragaza umutoza n'abamwe muri abo bana baheze mu buvumo

Ahavuye isanamu, Facebook/ekatol

Insiguro y'isanamu, Ifoto yo ku rubuga nkoranyambaga rwa Facebook igaragaza umutoza n'abamwe muri abo bana baheze mu buvumo

Hanyuma bakabaza abo batabazi niba bazi igihe bo bamaze aho mu buvumo kandi niba ubu noneho bashobora kubuvamo. Nuko abatabazi bakababwira ko bagomba gutegereza, ariko ko abandi bantu bazaza kubareba.

Nuko umwe muri abo bahungu akagira ati: "Oh. Ubwo ni ah'ejo rero".

Gushakisha aba bahungu byateje impagarara muri Thailande hose kubera ko nta muntu waruzi aho bari cyangwa niba bari bakiriho.

Imiryango yabo yanejejwe n'amakuru yuko bakiriho kandi ibikorwa byo kubatabara bikaba bigikomeje.

Bageze muri ubwo buvumo gute?

Abo bahungu, bafite hagati y'imyaka 11 na 16 y'amavuko, ndetse n'umutoza wabo w'imyaka 25 y'amavuko, baburiwe irengero ku itariki 23 y'ukwezi gushize kwa gatandatu.

Byibazwa ko binjiye muri ubwo buvumo ubwo hari humutse nuko imvura nyinshi yahise igwa igasiba inzira ikaba yaratumye badashobora gusohoka.

Umutoza wabo yari asanzwe ajya kubatembereza muri ako gace.