Abimukira bava Afurika bajya muri Amerika baciye muri Mexico bari kwiyongera cyane

Abakozi bashinzwe umupaka ba Leta zunze ubumwe za Amerika bo muri Leta ya Texas ubu bafunze amagana y'abantu bava mu bihugu bya Afurika bafashe mu byumweru bishize.

Urwego rw'Amerika rushinzwe imipaka (CBP) ruvuga ko uku 'kwiyongera kudasanzwe' kw'abavuye no muri Afurika ari 'ikibazo gikomeye cyo kwitaho'.

Uru rwego ruvuga ko abimukira bavuye muri Africa barenga 500 bageze ku mupaka wa Del Rio bavuye muri Mexico kuva ku itariki 30 z'ukwezi gushize.

CBP ivuga ko abenshi muri bo ari abavuye mu bihugu bya Angola, Cameroon na Repubulika ya Kongo.

Tariki 30 z'ukwezi gushize gusa, itsinda ry'abimukira 116 bavuye muri Afurika bafatiwe kuri uyu mupaka bagerageza kwinjira muri Amerika.

Aba bantu bagenda n'amaguru urugendo rushobora kugera kuri kilometero 240 ku rubibi rwa Amerika na Mexico bashaka aho bamenera ngo binjire muri Texas.

Bamwe muri aba bimukira baherutse kubwira ikinyamakuru NPR ko bava mu bihugu byabo muri Afurika bakajya muri Brazil.

Bava hano berekeza mu majyaruguru bagaca Colombia na Amerika yo hagati bakagera muri Mexico bakagana ku mupaka wayo na Amerika aho bagerageza kwinjira muri icyo gihugu cy'inzozi zabo.

Ni urugendo rubafata amezi nk'uko babivuga.

John Sanders komiseri wa CBP avuga ko ubu uru rwego rufunze abimukira bose hamwe 19,000 bashaka kwinjira muri Amerika. Ko ubusanzwe iyo bafunze 4,000 baba ari benshi cyane.

Mu kiganiro n'abanyamakuru yagize ati "Iyo bageze ku 6,000 tuvuga ko ari akaga. Ubu rero dufunze hafi 19,000. Ntacyo twarenzaho".

Umuvugizi w'umujyi wa San Antonio muri Texas avuga ko bari kwinginga imiryango y'abagiraneza ngo ihe abafashwe ibyangombwa nkenerwa nk'ibiribwa.

Mu kwezi gushize abimukira benshi kurusha ibihe byashize babaze 144,278 bageze ku mupaka w'amajyepfo wa Amerika, abarenga 100,000 yari imiryango n'abana.

Mu kwa cyenda umwaka ushize, abana batandatu bapfiriye mu bigo bifungirwamo aba bimukira baba bafashwe bagerageza kumena umupaka ngo binjire, bature muri Amerika.