Chwaer April Jones yn 'dal i aros i ddeffro o hunllef' ei llofruddiaeth

Rhybudd: Mae'r erthygl isod yn cynnwys manylion am lofruddiaeth allai beri pryder i rai

Mae chwaer April Jones, y ferch bump oed gafodd ei chipio ger ei chartref yn 2012 a'i llofruddio, dal yn aros i "ddeffro o'r hunllef yma".

Yn siarad â'r wasg am y tro cyntaf, dywedodd Hazel Jones, 31, bod y trawma o golli April wedi "siapio ei bywyd", a dydy hi dal methu â derbyn beth ddigwyddodd.

Roedd April yn chwarae ar ei beic pinc gyda'i ffrindiau ger ei chartref ym Machynlleth pan gafodd hi ei chipio ar 1 Hydref 2012.

Aeth mewn i Land Rover Mark Bridger, y dyn a gafodd ei garcharu am oes am ei chipio a'i llofruddio mewn "ymosodiad â chymhelliad rhywiol".

Er gwaethaf yr holl ymdrechion chafodd corff April fyth ei ddarganfod - dim ond olion bychain o'u hesgyrn ym mwthyn Bridger.

Esboniodd Hazel nad oedd wedi siarad yn gyhoeddus oherwydd "ar ddiwedd y dydd ein chwaer ni oedd hi ac nid yn unig oedd hi wedi marw ond cafodd ei llofruddio'n greulon a'i chipio, felly am broses i fynd trwy".

Wrth gofio'r foment y cafodd wybod bod ei hanner chwaer ar goll, dywedodd Hazel, sydd â'r un tad ag April, ei bod methu â chredu'r peth.

Roedd hi gartref yn Aberaeron pan ddywedodd ei mam wrthi.

"O'n i'n meddwl 'beth?'" ac fe ailadroddodd ei mam y newyddion: "'Hazel, mae April ar goll'."

Aeth yn syth wedyn i Fachynlleth, tua 30 milltir i ffwrdd, er mwyn bod gyda'i thad Paul a gweddill ei theulu.

Nid tan y diwrnod wedyn mae Hazel yn credu i'r sefyllfa "suddo i mewn yn llwyr".

"Dyw hi ddim wedi mynd am dro bach, mae hi wir ar goll."

Dywedodd nad oedd yn meddwl bod y fath beth yn digwydd yn yr ardal, ond "fe ddigwyddodd o, a digwyddodd o i ni".

Arweiniodd y digwyddiad at yr ymdrech chwilio fwyaf yn hanes Prydain - gyda swyddogion yn canolbwyntio ar 650 o safleoedd gwahanol ger ei chartref dros ardal o 60km sgwâr.

Cafodd yr heddlu help gan gannoedd o arbenigwyr a miloedd o aelodau'r cyhoedd.

Roedd Bridger, o Geinws, Powys, yn honni ei fod wedi gyrru dros April ar ddamwain, ond nad oedd yn cofio ble roedd wedi rhoi ei chorff.

Ond fe ddatgelodd yr achos llys bod darnau o asgwrn, oedd yn debyg i benglog plentyn, wedi'u canfod ymhlith y lludw yn lle tân ei gartref.

Er bod bwthyn Bridger wedi cael ei lanhau'n drylwyr, cafodd gwaed ei ganfod ar bwys nifer o gyllyll, ac roedd un cyllell wedi'i losgi'n wael.

Roedd Bridger'n cael ei ddisgrifio gan y rhai hynny oedd yn ei adnabod fel person "hyderus, cwrtais a dymunol" ond ar ôl i'r heddlu gymryd ei gyfrifiadur daeth ochr arall i'r amlwg.

Cafodd cyfres o luniau o blant yn cael eu cam-drin yn rhywiol eu darganfod, a thystiolaeth ohono'n pori yn defnyddio termau fel "merched pum mlwydd oed noeth".

Roedd lluniau hefyd o bobl oedd wedi cael eu llofruddio gan gynnwys Holly Wells a Jessica Chapman o Soham.

Roedd yna luniau Facebook o ferched lleol gan gynnwys April a'i chwiorydd.

Mae Bridger - a gafodd ddedfryd oes gyfan - wedi glynu at ei stori o beidio â chofio ble roddodd corff April.

A hithau'n 18 ac yn feichiog ar y pryd, dywedodd Hazel ei bod mor ofnus pan ddysgodd beth oedd wedi digwydd i'w chwaer fach.

"O'n i mor ofnus gan fy mod i'n cario merch fy hun ar y pryd ac roeddwn i mor ofn dod â hi mewn i'r byd 'ma'n gwybod bod yna bobl fel yna ar ein stepen drws.

"Mae wir yn rhoi mewn i berspectif na allwch chi ymddiried yn neb.

"Do'n i methu â dod dros sut all hyn fod wedi digwydd."

Ychydig wythnosau'n unig ar ôl i April ddiflannu, fe roddodd Hazel enedigaeth i'w merch ei hun - moment oedd fod llawn hapusrwydd ond oedd yn hytrach llawn galar.

"O'dd o mor anodd oherwydd o'n i newydd golli fy chwaer a newydd roi genedigaeth.

"O'n i'n trio galaru am fy chwaer ond hefyd caru fy merch newydd.

"O'dd o'n swreal oherwydd pan ddaeth Dad [a'i wraig] Coral i'w gweld hi yn yr ysbyty pan gafodd ei geni gyntaf, gafon nhw sioc achos o'dd hi'n edrych fel April."

Dywedodd fod y tebygrwydd yna wedi gwneud y galar yn anoddach fyth.

Mae Hazel yn fam i Amelia, 13, Ethan, 10, a Hefin, chwech ond dyw'r gofid ddim wedi diflannu, meddai.

"Doedd hi ond wedi bod ar y blaned yma am bum mlynedd a dwi'n cofio edrych arni a meddwl 'ti ddim 'di profi bywyd eto' a chafodd hwnna ei dynnu i ffwrdd o April.

"Dwi eisiau i fy merch weld y byd a chael popeth na chafodd April."

Bu farw tad Hazel ac April, Paul Jones, ar 14 Mai 2025 ar ôl cael diagnosis o glefyd ar ei ymennydd yn 2018.

"Doedd fy nhad byth yn iawn ar ôl April," meddai Hazel.

"Unwaith i April fynd, aeth rhan ohono'n llwyr a ddaeth o ddim yn ôl o hynny erioed.

"Y cyfan dwi'n meddwl am yw ei fod o bellach yn ôl gydag April ac yn ôl i fywyd heddychlon."

Esboniodd bod colli ei thad fel colli rhan ohoni hi hefyd.

"Nes i ymladd drosto fo am mor hir," meddai.

Dywedodd Hazel ei bod hi'n onest gyda'i phlant am April a bod ganddi focs o atgofion a darnau o bapurau newydd iddyn nhw weld pan maen nhw'n barod.

Esboniodd ei bod byth wedi cuddio'r hanes o'i phlant.

"Ar ddiwedd y dydd mae'n fywyd go iawn, mae wedi digwydd a dwi am iddyn nhw fod yn wyliadwrus ei hunain."

Ond mae'r trawma wedi effeithio ar sut mae'n gweld dyfodol ei phlant ac mae'n dal i deimlo'n ofnus yn meddwl amdanyn nhw'n tyfu i fyny.

"Oes unrhyw un yn gwylio chi? Oes unrhyw un yn dilyn chi? Mae'r byd ni'n byw ynddo mor frawychus.

"Dwi'n ofni gadael i fy mhlant fynd allan a thyfu i fyny a dechrau cael eu bywydau ei hunain.

"Mae 'di bod 13 mlynedd nawr a dydw i dal methu â chredu'r peth.

"Dwi'n dal i aros i ddeffro o'r hunllef yma."

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.