Dathlu'r Nadolig ddwywaith - gyda'r Cymry a'r Norwyaid

Fe fyddai pobl sy'n caru'r Nadolig yn eiddigeddus o Siri Wigdel gan ei bod hi'n cael dathlu ddwywaith.

Mae hi'n dilyn traddodiad y wlad lle magwyd hi a'r wlad mae hi wedi ei mabwysiadu - Norwy a Chymru. Felly ar 24 Rhagfyr fe fydd hi'n dathlu yn y ffordd draddodiadol Norwyaidd, cyn deffro ar 25 Rhagfyr a dechrau eto gyda dathliadau mwy Cymreig eu naws.

Yn wreiddiol o dref Jørpeland, ger dinas Stavanger yng ngorllewin Norwy, mae'r ddawnswraig a'r coreograffydd bellach yn rhannu ei hamser rhwng Sgandinafia a Gwynedd. Eleni fe fydd yn treulio cyfnod y Nadolig i gyd yng Nghymru, ond dros y blynyddoedd mae hi a'i theulu wedi dathlu'r ŵyl yn y ddwy wlad.

Mae'n dweud bod y gwaith paratoi a'r hysbysebu yn digwydd yn llawer cynt yng Nghymru ac mae'r Nadolig yn llawer mwy cyfalafol na'r amser pan oedd hi'n cael ei magu.

Eleni, fel bob blwyddyn ble bynnag fydd hi'n dathlu, mae hi'n dilyn yr un drefn Norwyaidd o gael yr Adventsstake (canhwyllbren) gyda'i phedair cannwyll sy'n cael eu goleuo bob dydd Sul cyn y Dolig.

"'Da ni'n goleuo'r gannwyll gynta' ar y Sul cyntaf a 'da ni'n canu, ac wedyn 'da ni'n goleuo'r ail y dydd Sul wedyn a bob dydd Sul tan yr un cyn y Dolig," meddai Siri.

"'Da ni'n bwyta cinio neu middag tua phedwar o'r gloch ac mae'n draddodiadol i gael cacen a choffi yn y pnawn ar y dydd Sul.

"Dwi'n neud o yn fama yng Nghymru efo hen ddaliwr cannwyll y teulu, a oedd yn y tŷ pan o'n i'n fabi. Mae'n rili sbeshal i mi."

Pan oedd hi'n blentyn, yr arferiad yn Norwy oedd rhoi'r goeden i fyny ar 23 Rhagfyr ar ôl mynd allan i "nôl un ffresh".

Y diwrnod canlynol oedd y dathlu mawr - 24 Rhagfyr - ac mae Siri yn dal i ddilyn yr un drefn yn ei chartref ym Mhenrhyndeudraeth, lle mae hi'n byw gyda'i phartner, yr actor Gwyn Vaughan Jones.

I ginio mae hi'n paratoi rhywbeth tebyg i bwdin reis gyda siwgr a sinamon - dim byd rhy drwm rhag ofn iddyn nhw orlenwi cyn y prif bryd bwyd. Gyda'r nos fydd hwnnw'n cael ei weini ac yn ei hardal hi, cig oen wedi ei halltu sy'n boblogaidd, gyda thatws, moron a stwnsh rwdan.

Meddai Siri: "Mae'n edrych yn reit boring i gymharu efo be' 'da ni'n gael fan hyn yng Nghymru ond er hynny mae pawb wrth eu bodd.

"Ond dydi Gwyn ddim yn deall pam fod y cig oen mor hallt. Dwi'n cofio un Dolig yn Norwy gaethon ni gig oen hallt am dri diwrnod yn olynol a Gwyn yn dweud 'dwi methu copio efo mwy achos mae fy llygaid yn llosgi efo'r holl halen!'"

Mae teulu Siri yng Nghymru yn agor eu hanrhegion o Norwy ar noswyl Nadolig, yn union fel oedd hi'n arfer ei wneud pan oedd hi'n blentyn.

"Yn Norwy mae'n draddodiadol i gael sgis newydd pan ti'n tyfu," meddai.

"Dwi'n cofio lot o Nadoligau cael ski packs - a Nain wedi gweu sanau newydd i sgïo i fi.

"Ti'n cael lot o bethau handmade - mae'n draddodiad i gael menig a hetiau wedi eu gweu gan aelodau o'r teulu. Ac mae hynna yn wir hyd heddiw."

Tra bod Siri yn parhau gyda nifer o draddodiadau Norwyaidd ar noswyl Nadolig, pan fydd hi yng Nghymru dydy hi ddim yn cael llawer o amser i fwynhau ei anrhegion gan fod angen paratoi am ei hail ddathliad Nadolig yng Nghymru ar 25 Rhagfyr.

"Mae'n amser reit brysur a dweud y gwir," meddai.

Ond er y prysurdeb, mae hi'n hoff o gadw traddodiadau ei mamwlad yn fyw.

"Dwi'n meddwl pan ti'n mynd i fyw mewn gwlad arall, falle bod pethau sydd ddim yn bwysig pan ti yng ngwlad dy hun yn dod yn fyw pwysig i ti," meddai Siri.

"Mae pawb isho mynd adre adeg y Nadolig, mae hynny yn gyffredin i bawb ym mhob man, felly falle dyna pam dwi dal i gadw'r traddodiadau Norwyaidd er mwyn teimlo fel fy mod i adra.

"A dwi'n meddwl ei fod yn bwysig i gario'r traddodiadau Norwyaidd ymlaen i'r teulu."

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i [email protected], dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.