Alcaraz yn cipio'r goron: Ond pwy yw'r Cymro wnaeth ddyfeisio tenis?

Carlos Alcaraz Getty Images

Carlos Alcaraz yn gorfoleddu yn ystod ffeinal pencampwriaeth tenis agored Awstralia

Rhodri Tomos
BBC Cymru Fyw

Fore Sul, fe ennillodd y Sbaenwr Carlos Alcaraz bencampwriaeth tenis agored Awstralia.

Drwy wneud hynny fe ddaeth y dyn ieuengaf erioed i gipio pedair prif gystadleuaeth y byd tenis ag yntau ond yn 22 oed.

Wrth dderbyn y tlws fe ddiolchodd i lu o bobl, ond doedd y dyn a ddyfeisiodd tenis ddim yn eu plith.

Mae'n siwr nad oedd Alcaraz yn ymwybodol o gyfraniad anferth y Cymro, Walter Wingfield i'w record - heb fodolaeth tenis fyddai o ddim yn bencampwr!

Walter WingfieldGetty Images

Walter Wingfield o Riwabon ger Wrecsam, y dyn a ddyfeisiodd y gamp tenis fel dyn ni'n ei adnabod heddiw

Cafodd Walter Wingfield ei eni yn Rhiwabon yn Hydref 1833, a bu'n byw yno ac yn Sir Drefaldwyn am gyfnodau hir.

Fe gafodd yrfa lwyddiannus yn y fyddin gan godi i safle Uwch-gapten, ond roedd hefyd yn ddyn dyfeisgar wnaeth droi ei law i fyd chwaraeon.

Roedd camp o'r enw Real Tennis yn bodoli ers dyddiau brenin Harri VIII, ond camp dan-do oedd hi.

Erbyn 1874, roedd Wingfield wedi dyfeisio gêm i'w chwarae ar lawnt, ac wedi ysgrifennu llyfr rheolau cyflawn.

Centre CourtGetty Images

Yr enwog Centre Court yn yr All England Tennis and Croquet Club yn Wimbledon

Wrth geisio gwerthu'r llyfr a hyrwyddo'r gamp newydd fe aeth i Lundain - yn benodol, aeth at yr All England Croquet Club a gafodd ei sefydlu yn Wimbledon bum mlynedd yn gynt.

Fe brofodd y gamp yn eithriadol o boblogaidd ac erbyn 1876 roedd y clwb wedi newid enw i'r All England Tennis and Croquet Club - yr enw swyddogol hyd heddiw.

Flwyddyn yn ddiweddarach fe gafodd pencampwriaeth tenis fyd-enwog Wimbledon ei chynnal am y tro cyntaf.

Bu farw Walter Wingfield yn 1912, ond yn 1997 fe gafodd ei urddo i Oriel Anfarwolion Tenis Rhyngwladol fel yr un a sefydlodd y gêm fodern, ac mae cerflun a bywgraffiad ohono yn amgueddfa tenis Wimbledon.

Mae dyled Carlos Alcaraz a'i holl gyd-chwaraewyr yn fawr.

Gobeithio rhyw ddydd y cawn nhw glywed am gyfraniad y Cymro i'w gyrfaoedd.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.

Pynciau cysylltiedig

Hefyd o ddiddordeb: