Dyn wedi ffoi ar ôl taro bachgen, 5, oherwydd 'ofn' - achos
Cafodd Arlo Buckley anafiadau difrifol yn dilyn y gwrthdrawiad yn Sir y Fflint
- Cyhoeddwyd
Mae dyn a darodd fachgen pump oed a'i anafu'n ddifrifol gyda'i feic modur yn dweud ei fod yn teimlo'n "ofnadwy" ar ôl y gwrthdrawiad oherwydd ei fod yn meddwl ei fod wedi lladd y plentyn, mae llys wedi clywed.
Cafodd Arlo Buckley ei gludo i'r ysbyty mewn hofrennydd ar ôl y gwrthdrawiad ar Central Drive yn Shotton, Sir y Fflint, ar 11 Medi 2024.
Yn Llys y Goron Yr Wyddgrug ddydd Llun, dywedodd Kaylem Longhurst, 18, sydd eisoes wedi pledio'n euog i yrru'n beryglus, ei fod wedi gadael y lleoliad oherwydd ei fod yn ofni am ei ddiogelwch ei hun.
Mae Mr Longhurst, sydd o Nantwich yn Sir Gaer, ei fam Terry Follows, 42, ei phartner ar y pryd Shane Hunt, 39, ei frawd Dane Longhurst - oll o Stryd Clwyd yn Shotton - yn gwadu cyhuddiad o gynllwynio i wyrdroi cwrs cyfiawnder.
Cafodd Arlo, sydd ym mreichiau ei dad Danny, ei adael ar ochr ffordd mewn achos o daro a ffoi, clywodd llys
Wrth roi tystiolaeth, dywedodd Kaylem Longhurst wrth y llys fod grŵp o bedwar neu bump o bobl wedi casglu yn fuan ar ôl y gwrthdrawiad.
Dywedodd ei fod wedi tynnu balaclafa yr oedd yn ei wisgo yn syth ar ôl y gwrthdrawiad oherwydd nad oedd "eisiau cuddio" ei wyneb.
Yn y llys, fe ofynnwyd i Mr Longhurst gan ei fargyfreithiwr, Joesph Lees, pam ei fod wedi gadael y lleoliad.
"Roedd gen i ofn... y bobl o'm cwmpas," meddai, gan ychwanegu eu bod nhw "yn ymddwyn yn ymosodol".
Cafodd Arlo Buckley ei daro gan feic modur yn Central Drive yn ardal Shotton, Sir y Fflint
Dywedodd Mr Longhurst ei fod wedi mynd i dŷ ei fam ar ôl y gwrthdrawiad, a mynd yn syth i'r ystafell ymolchi i newid o'i ddillad gwaedlyd.
Roedd ei chwaer, Cara Haran a'i frawd, Dane Longhurst, yn yr ardd ar y pryd ond ni siaradodd â nhw, meddai
Dywedodd ei fod wedi ffonio ei fam, a oedd yn gweithio ar y pryd, ond ni soniodd am y gwrthdrawiad, meddai, achos ei fod yn "poeni y byddai hi'n fy marnu i".
Dywedodd ei fod wedi darganfod fod ei ddillad wedi cael eu llosgi ar ôl iddo gael ei arestio, gan ddweud nad oedd yn gwybod ar y pryd pwy oedd yn gyfrifol a'i fod ddim wedi gofyn i unrhyw un i wneud.
Gadael bachgen 5 oed ag anafiadau difrifol ar ochr ffordd - achos llys
- Cyhoeddwyd16 Chwefror
Wrth gael ei groesholi gan yr erlynydd, Ember Wong, gwadodd Mr Longhurst ei fod o a'r tri arall wedi "creu cynllun" i osgoi canlyniadau'r gwrthdrawiad.
Dywedodd Mr Longhurst fod ei chwaer, Cara Haran, sydd eisoes wedi pledio'n euog i fod yn rhan o gynllwyn, yn dweud celwydd pan ddywedodd eu bod wedi gwneud trefniadau i'w gael o allan o Shotton.
Nid oedd yn wir eu bod nhw i gyd yn rhan o gytundeb troseddol, meddai.
Mae'r achos yn parhau.
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.
