Tad i dri oedd yn paratoi at farathon wedi marw ar Grib Goch

Bu farw rhedwr ar ôl disgyn wrth ymarfer at farathon ar Grib Goch yn Eryri, mae cwest wedi clywed.

Fe wnaeth Thomas Alan Smith, 36 oed o Bolton, ddioddef anafiadau "catastroffig" wedi iddo faglu wrth geisio gafael yn ei gi ar fore 16 Awst, 2025.

Mewn datganiad fe ddywedodd Shelly Price - sy'n fam i'w dri o blant - ei fod yn "byw bywyd i'r eithaf".

Daeth y crwner i'r casgliad fod Mr Smith wedi marw drwy ddamwain.

Clywodd y cwest yng Nghaernarfon fod Mr Smith wedi teithio i Eryri gyda'r bwriad o ddringo'r Wyddfa ddwywaith mewn diwrnod fel rhan o'i baratoadau ar gyfer marathon 'ultra' yr wythnos ganlynol.

Dywedodd Ms Price ei bod wedi siarad gyda'i phartner am tua 09:40 y bore hwnnw wedi iddo ddechrau dringo llwybr Watkin tua'r copa.

Yn ôl Stuart Alder, oedd yn cerdded ar hyd Crib Goch gyda'i ddau o blant am tua 11:30, gwelodd Mr Smith yn troedio'r grib gyda chi sbaniel.

"Fe estynnodd y dyn am y ci, ond fe lithrodd a disgynnodd dros yr ymyl," meddai Mr Alder.

Cafodd y gwasanaethau brys eu galw i'r digwyddiad ar unwaith.

Clywodd y gwrandawiad gan gerddwr arall a geisiodd roi cymorth cyntaf i Mr Smith wedi iddo ddisgyn.

Dywedodd Connor Holler - sydd â hyfforddiant sylweddol mewn cymorth cyntaf mewn sefyllfaoedd awyr agored - ei fod wedi darganfod Mr Smith yn gorwedd ar ei gefn.

"Roedd yn amlwg o'r dechrau ei fod o wedi dioddef anafiadau catastroffig," meddai.

Er i Mr Holler geisio trin ei anafiadau, bu farw Mr Smith yn y fan a'r lle.

Dywedodd aelodau'r tîm achub mynydd lleol fod yr amodau ar y mynydd y diwrnod hwnnw yn dda, ei bod hi'n ddiwrnod sych a chlir a bod gwelededd perffaith.

Yn ôl y crwner, Kate Robertson, dangosodd archwiliad post mortem fod Mr Smith wedi dioddef "anafiadau niferus ar ôl disgyn o uchder".

"Roedd marwolaeth Tom yn annisgwyl, doedd o ddim yn fwriadol... ac mae'n ymddangos ei fod wedi baglu a disgyn dros yr ymyl," meddai.

Fe gydymdeimlodd Ms Robertson gyda theulu Mr Smith hefyd: "Mae'n amlwg ei fod yn ddyn arbennig a oedd yn meddwl y byd i sawl un.

"Bu farw yn gwneud rhywbeth yr oedd yn ei garu, ond bu farw yn lawer rhy fuan - does dim amheuaeth am hynny."

Mae teulu Mr Smith yn dweud eu bod eisoes wedi llwyddo i godi £8,000 ar gyfer Tîm Achub Mynydd Llanberis.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i [email protected], dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.