David Davies yn ennill ei rownd gyntaf ym Mhencampwriaeth Dartiau'r Byd

Mae David Davies wedi cyrraedd ail rownd Pencampwriaeth Dartiau'r Byd wedi buddugoliaeth ddydd Sadwrn.

Yn ei gêm gyntaf erioed yn y bencampwriaeth, fe gurodd Davies Mario Vandenbogaerde o dair set i ddim.

Mae'r fuddugoliaeth yn golygu y bydd Davies yn wynebu Luke Littler yn y rownd nesaf - ar ôl i Littler guro Darius Labanauskas o Lithuania ar noson agoriadol y bencampwriaeth ddydd Iau.

Mae Littler, sef chwaraewr gorau'r byd ar hyn o bryd, yn amddiffyn ei deitl ar ôl ennill y bencampwriaeth y llynedd.

Ond mae un o gyn-chwaraewyr Davies yn ffyddiog bod ganddo "ddigon o dalent i guro Littler."

Roedd Davies, sy'n dod o Ddinbych yng ngogledd Cymru, wedi cymwhyso i chwarae yn y gystadleuaeth ar ôl ennill twrnamaint rhagbrofol y DU ac Iwerddon ddechrau fis Tachwedd.

Yn 40 oed, mae Davies wedi treulio'r blynyddoedd diwethaf yn rhannu ei amser rhwng ei swydd lawn amser o fewn y gwasanaeth iechyd a chwarae yn ail haen y PDC (The Professional Darts Corporation).

Y flwyddyn ddiwethaf yw ei flwyddyn fwyaf llwyddiannus yn y byd dartiau hyd yma.

Chwaraeodd ran allweddol yn llwyddiant Cymru yng nghwpan y byd yn Ne Corea, enillodd y PDC Challenge Tour a'r Red Dragon Champion of Champions.

Yna fe ddaeth ei lwyddiant diweddaraf yn y twrnamaint rhagbrofol oedd wedi ei gymhwyso ar gyfer Pencampwriaeth Dartiau'r Byd.

Roedd Davies yn sicr o ennill £15,000, hyd yn oed pe byddai wedi colli'r rownd gyntaf ond nawr mae wedi ennill £25,000.

Mi fydd enillydd y bencampwriaeth yn ennill £1 miliwn.

Bydd ail rownd y gystadleuaeth yn cael ei chynnal rhwng 20 a 23 Rhagfyr.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i [email protected], dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.