Agor cwestau tri o bobl fu farw mewn gwrthdrawiad

Mae cwestau wedi agor i farwolaethau tri pherson mewn gwrthdrawiad ffordd ar y ffin rhwng Powys a Sir Amwythig fis Rhagfyr.

Bu farw David Richardson, 63 oed, a'i wraig Pamela, oedd yn 64, yn ogystal â John Pryce Jones, 86 oed, ar ffordd yr A489 ger Yr Ystog ar 11 Rhagfyr.

Clywodd gwrandawiad yn Llys y Crwner ym Mhontypridd fod Mr Richardson yn gyrru un o'r ceir, a'i wraig yn teithio yn y sedd flaen.

Roedd y ddau yn byw ym mhentre'r Ystog, ac fe fuon nhw farw yn y fan a'r lle.

Roedd Mr Pryce Jones yn byw yn Craven Arms yn Sir Amwythig, ac roedd yn gyrru car arall.

Cafodd ei gludo mewn hofrennydd i'r ysbyty yn Stoke-on-Trent, ond fe fu farw yno yn ddiweddarach yr un diwrnod.

Cafodd archwiliadau post mortem eu cynnal, ac fe ddangosodd y casgliadau cychwynnol fod David a Pamela Richardson wedi marw ar ôl derbyn anafiadau niferus mewn gwrthdrawiad ffordd.

Bu farw John Pryce Jones o ganlyniad i waedlif a rhwygiadau i'r ddueg (spleen).

Cafodd y tri chwest eu gohirio wrth i ymholiadau i achos y gwrthdrawiad barhau.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i [email protected], dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.