Dyn, 51, yn y llys ar gyhuddiadau arfau anghyfreithlon

Mae dyn 51 oed wedi ymddangos yn y llys ar gyhuddiadau'n ymwneud ag arfau anghyfreithlon.

Mae Maximin Carter wedi'i gyhuddo o fod ag arf ymosodol mewn eiddo preifat a bod ag arf anghyfreithlon yn ei feddiant.

Daw ar ôl i'r heddlu ddweud eu bod wedi darganfod arfau mewn eiddo yn Abergwynfi, Castell-nedd Port Talbot nos Sul.

Dywedodd Heddlu De Cymru mai "gwn aer cetrisen nwy" oedd yr arf anghyfreithlon dan sylw.

Cafodd pobl eu symud o gartrefi cyfagos am "resymau diogelwch rhagofalus" ond maent bellach wedi dychwelyd.

Ymddangosodd Mr Carter, sydd heb gyfeiriad sefydlog, yn Llys Ynadon Abertawe ddydd Mercher i gadarnhau ei fanylion yn unig.

Mae wedi'i gadw yn y ddalfa a bydd yn ymddangos yn Llys y Goron Abertawe ar 20 Mawrth.