Ap 'arloesol' yn helpu rhieni i ddeall a chefnogi plant niwrowahanol

Mae mam o Wynedd yn dweud bod ap newydd ar gyfer pobl niwrowahanol yn "adnodd gwych" sy'n helpu rhieni i "ddeall a chefnogi ein plant".

Mae Cyngor Gwynedd wedi lansio ap newydd o'r enw 'Niwro Cymru' sy'n cynnig gwybodaeth, gweithgareddau a manylion digwyddiadau lleol sy'n ymwneud â niwrowahaniaeth.

I Ceridwen Owen, o Rosgadfan, mae'r ap yn "help mawr" wrth iddi gefnogi ei mab hynaf, Lleu sydd ag awtistiaeth ac ADHD.

Dywedodd y Cynghorydd, Menna Trenholme bod yr "ap hwn yn gam pwysig ymlaen i gydnabod, dathlu, a chefnogi niwroamrywiaeth ar draws ein cymunedau".

Dywedodd Ceridwen fod gofalu am blentyn sydd ag anghenion ychwanegol yn gallu bod yn "drymaidd" ond bod yr ap yn "helpu pethau o ddydd i ddydd".

"Mae'r wybodaeth yn yr ap yn help mawr i atgoffa teuluoedd fel un ni o ffyrdd da i roi cymorth i'n plant," meddai.

"Mae'r ddolen 'Top Tips' yn adnodd gwych efo awgrymiadau o sut i helpu pethau o ddydd i ddydd."

Esboniodd hefyd fod yr ap yn gwneud pethau'n haws o ran mynychu sesiynau lleol a chyfarfod â rhieni a gofalwyr eraill "sydd yn yr un cwch â ni".

Mae'r wybodaeth yn yr ap "yn ddefnyddiol dros ben i unrhyw un sydd eisiau dysgu mwy am gyflyrau niwroamrywiaeth, heb orfod pori trwy'r we am oriau," meddai.

"Gwell byth fod y wybodaeth i gyd yn ddwyieithog - peth prin iawn ydy hynny."

Ychwanegod Ceridwen ei "bod o'n wych gael pob dim mewn un lle".

Mae Lleu nawr yn "galw ar bawb i lawrlwytho'r ap er mwyn cael dysgu mwy am niwrowahaniaeth i helpu pawb dysgu mwy amdan bobl fel fo, ac mi wneith hynny helpu ni wrth symud ymlaen i greu cymunedau mwy niwro-gadarnhaol".

"Mae'n adnodd fydda ni'n gallu cyfeirio nôl at unrhyw adeg bydd angen, dydd neu nos."

Wrth rannu ei sylwadau ar raglen Dros Frecwast, dywedodd Steffan Chambers, gweithiwr cymdeithasol fu'n rhan o ddatblygiad yr ap, fod y wybodaeth "yn cael ei theilwra i'r defnyddiwr".

"Mae'r ap i bawb - pobl ifanc, oedolion hŷn, rhieni a gofalwyr, brodyr a chwiorydd a gweithwyr proffesiynol," meddai.

"'Da ni'n credu bo' ni'n torri tir newydd yn fan hyn, dwi'm yn meddwl fod 'na ap fel hyn yn bodoli - yn sicr ddim yn y Gymraeg.

"Be sy'n arbennig iawn yw i fod wedi cael ei greu gan bobl niwrowahanol i bobl niwrowahanol."

Dywedodd y Cynghorydd Menna Trenholme, Aelod Cabinet dros Blant a Chefnogi Teuluoedd Cyngor Gwynedd: "Mae'r ap hwn yn gam pwysig ymlaen i gydnabod, dathlu, a chefnogi niwroamrywiaeth ar draws ein cymunedau.

"Fel cyngor rydym wedi ymrwymo i wella'n darpariaeth yma yng Ngwynedd ac rydym yn hyderus y bydd hwn yn declyn gwerthfawr i deuluoedd gael mynediad at wybodaeth, gweithgareddau a chymorth.

"Mae'r ap wedi'i gynllunio gyda phlant dan sylw; o'r dyluniad llachar, tawel a chyfeillgar i'r ffaith ei fod yn hawdd i'w lywio boed chi'n rhieni, gofalwyr, brodyr/chwiorydd neu'n weithwyr proffesiynol," meddai.

Aeth ymlaen i ddweud ei bod yn diolch i Fwrdd Partneriaeth Rhanbarthol Gogledd Cymru am fuddsoddi a chreu'r ap.

"Y cyntaf o'i math yn y maes sydd ar gael yn y Gymraeg ochr yn ochr â'r Saesneg" meddai.

Dywedodd llefarydd ar ran Tîm Niwrowahaniaeth Cenedlaethol: "Rydym yn falch iawn o weld lansiad Niwro Cymru, adnodd arloesol a chynhwysol sy'n adlewyrchu lleisiau pobl niwrowahanol a'u teuluoedd.

"Mae'r ap dwyieithog hwn yn gam sylweddol ymlaen wrth hyrwyddo hygyrchedd, dathlu niwroamrywiaeth, a sicrhau bod gan gymunedau yng ngogledd Cymru yr offer sydd eu hangen arnynt i ffynnu.

"Rydym yn falch o gefnogi'r fenter hon ac yn canmol Tîm Awtistiaeth Gwynedd am eu dull cydweithredol a'u hymrwymiad i greu gofod digidol cefnogol i bawb."

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i [email protected], dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.