ထရမ့်အတွက် ရှေ့တန်းတိုက်စစ်မှူး ၁၀ ဦး

ဇန်နဝါရီလ ၂၀ ရက်နေ့ကစလို့ အိမ်ဖြူတော်ကို ပြန်လာမယ့် ဒေါ်နယ် ထရမ့်ဟာ တာဝန်စယူတဲ့ ပထမဆုံးနေ့မှာပဲ အပြောင်းအလဲ အရွေ့အကြီးကြီးမားမားကို မြန်မြန်ဆန်ဆန်လုပ်သွားမယ်လို့ ပြောထားပါတယ်။

နိုင်ငံအတွက် အရေးအပါဆုံးနေရာတွေအတွက် သူ ရွေးထားတဲ့သူတွေကလည်း တစ်စိတ်တည်းလို့ ဆိုနိုင်ပါတယ်။ အဲဒါကတော့ နိုင်ငံ့ဥသျှောင် သမ္မတကို သစ္စာစောင့်သိမှုပါ။ ဒါပေမဲ့ ဒီလူ တစ်ယောက်ချင်းစီဟာ ထရမ့်ရဲ့ မူဝါဒတွေကို ဘယ်လို အကောင်အထည်ဖော်ကြမယ်ဆိုတာနဲ့ ပတ်သက်ပြီး ကိုယ်စီ စိတ်ကူးတွေကို ဆောင်ကျဥ်းလာကြမှာပါ။

ဒေါ်နယ်ထရမ့် ရွေးထားတဲ့ ဒီရှေ့တန်းတိုက်စစ်မှူးတွေဟာ ရွေးကောက်ပွဲတုန်းက သူပေးထားတဲ့ကတိကဝတ်တွေကိုဘယ်လောက်အထိ အကောင်အထည်ဖော်နိုင်မလဲ၊ ဒါမှမဟုတ် ပြဿနာပဲ တက်လာစေမှာလားဆိုတာကို ဘီဘီစီက ကျွမ်းကျင်သူတွေကို အကဲခတ်ဖို့ ချဥ်းကပ်ခဲ့ပါတယ်။

ရွေးကောက်ပွဲ ကတိကဝတ်တွေထဲက ၅ ခုကို ကောက်နှုတ် စေ့ငုထားပါတယ်။

နယ်စပ်လုံခြုံဖို့နဲ့ အမေရိကန်ပြည်ထောင်စုကို တရားမဝင် ဝင်ရောက်လာသူတွေကို နှင်ထုတ်ဖို့တွေက ရွေး ကောက်ပွဲ မဲဆွယ်ကာလတွေတုန်းက ဒေါ်နယ်ထရမ့် ပေးခဲ့တဲ့ ကတိကြီးကြီးမားမားတွေထဲက တစ်ခုဖြစ်ပါတယ်။

အမေရိကန်သမိုင်းရဲ့ အကြီးမားဆုံး ပြန်လည်နှင်ထုတ်ရေးကိစ္စဖြစ်လာနိုင်ပါတယ်။ အဲဒီအတွက် စစ်တမ်းတချို့မှာတော့ ထောက်ခံမှုတွေ များများရထားပေမယ့်လည်း လက်တွေ့မှာ ဘယ်လိုဘယ်ပုံလုပ်ကြမယ်ဆိုတာကိုတော့ မသိရသေးပါဘူး။

ခရစ္စတီ နုန်း - အမိမြေလုံခြုံရေးဝန်ကြီး

"ကျွန်မတို့ နိုင်ငံထဲကို တရားမဝင် ဝင်ရောက်လာသူတွေ ပထမဆုံးလုပ်တာက ဥပဒေကို ချိုးဖောက်လိုက်တာပါပဲ''

ခရစ္စတီ နုန်းဟာ တောင်ဒါကိုတာပြည်နယ်အုပ်ချုပ်ရေးမှူးအဖြစ် ၂၀၁၈ ခုနှစ်မှာ တာဝန်ယူခဲ့ဖူးသူဖြစ်သလို ကွန်ဂရက် လွှတ်တော်အမတ်အဖြစ် သက်တမ်း ၄ ဆက်တိုက် အနိုင်ရထားသူဖြစ်ပါတယ်။

ကိုဗစ် ကပ်ဘေးကာလမှာ မဖြစ်မနေ နှာခေါင်းစည်းတပ်ခိုင်းတဲ့စည်းကမ်းတွေနဲ့ အသွားအလာကန့်သတ်ချက်စည်းကမ်းတွေကို ငြင်းပယ်တဲ့အကြောင်း ထုတ်ပြောခဲ့တာကြောင့် နိုင်ငံထဲမှာ လူထုရဲ့ အာရုံစိုက်မှုကိုလည်းရရှိခဲ့ပါတယ်။

ကိုဗစ်ကပ်ဘေးဖြစ်နေတဲ့အချိန်မှာ နုန်းဟာ the Fourth of July လို့ သိကြတဲ့ အမေရိကန်လွတ်လပ်ရေးနေ့ကို ထရမ့်နဲ့အတူ တောင်ဒါကိုတာပြည်နယ်ထဲက Mount Rushmore အမျိုးသား အောက်မေ့ဖွယ်နေရာမှာ ဆင်နွှဲခဲ့သူဖြစ်ပါတယ်။

လက်ရှိ သူဟာ သမ္မတ ဂျိုးဘိုင်ဒင်ရဲ့ နယ်စပ်အရေးမူဝါဒတွေအပေါ် အလွန်အမင်းဝေဖန်နေသူလည်း ဖြစ်ပါတယ်။

နုန်းဟာ အာဖဂန်နစ္စတန်ဒုက္ခသည်တွေကို လက်ခံဖို့ ငြင်းပယ်သူဖြစ်သလို၊ တောင်ဒါကိုတာပြည်နယ်ရဲ့ အမျိုးသားလုံခြုံရေးအစောင့်တပ်ဖွဲ့ဝင်တွေကို တက္ကဆက်ပြည်နယ် နယ်စပ်လုံခြုံရေးအတွက် တက္ကဆက်ကို စေလွှတ်တဲ့ ပထမဆုံးပြည်နယ်အုပ်ချုပ်ရေးမှူးလည်း ဖြစ်ပါတယ်။

သူ့ကို ဝန်ကြီးနေရာ ပေးဖို့အတွက်ကတော့ အမေရိကန်အထက်လွှတ်တော်အမတ်တွေရဲ့ အတည်ပြု ဆုံးဖြတ်ချက်လိုအပ်ဦးမှာဖြစ်ပါတယ်။

တွန် ဟိုမန် - ဇာဘုရင်လို နယ်စပ်အရေး အာဏာအပြည့်ရလာမယ့်သူ

"9/11 စက်တင်ဘာ တိုက်ခိုက်မှုနောက်ပိုင်းကတည်းက အမျိုးသားလုံခြုံရေးကို အကြီးအကျယ်ခြိမ်း ခြောက်ခံနေရတဲ့ နိုင်ငံပါ။ ဒါကိုပြင်ဆင်ဖို့ လိုပါတယ်"

တွန် ဟိုမန်ဟာ အမေရိကန်နယ်ခြားစောင့်အရာရှိအဖြစ် ဆယ်စုနှစ်ပေါင်းများစွာကြာအောင် အလုပ်လုပ်ခဲ့သူလည်းဖြစ်၊ လူဝင်မှု ကြီးကြပ်ရေးနဲ့ အခွန်ရဲအရာရှိဟောင်းအဖြစ်လည်း တာဝန်ထမ်းဆောင်ဖူးသူလည်းဖြစ်ပါတယ်။ ထရမ့်က သူ့ရဲ့ထိပ်တန်းကတိ ကဝတ်တွေထဲက တစ်ခုကိုအကောင်အထည်ဖော်ပေးနိုင်ဖို့ ခေါင်းခေါက်ရွေးထားသူလို့တောင် ဆိုနိုင်ပါတယ်။

သူက အထောက်အထားမဲ့နယ်စပ်ဖြတ်ကျော်လာသူ မိဘတွေနဲ့ အတူပါလာတဲ့ကလေးတွေကို သက်ဆိုင်ရာမိဘတွေ၊ စောင့်ရှောက်သူတွေနဲ့ ခွဲထားရေးဖြစ်လာအောင် အစောပိုင်း လှုံ့ဆော်ခဲ့သူဖြစ်ပါတယ်။ ဒီအစီအစဥ်ဟာ နောက်ပိုင်းမှာ ထရမ့်ရဲ့ ပထမရာထူးသက်တမ်းမှာ ပိုအငြင်းပွားစရာ လူဝင်မှု ကြီးကြပ်ရေးမူဝါဒတွေထဲက တစ်ခုဖြစ်လာပါတယ်။

ဟိုမန်ဟာ ရှေးရိုးစွဲ ကွန်ဆာဗေးတစ် ရုပ်သံသတင်းလိုင်းတွေမှာ ပုံမှန် မှတ်ချက်ပေးတတ်သူဖြစ်ပါတယ်။ အဲဒီမှာ သူဟာ ဒီမိုကရက်တစ် နိုင်ငံရေးသမားတွေဟာ ပြည်ထောင်စုအဆင့် လူဝင်မှုကြီးကြပ် ရေးအားထုတ်မှုတွေမှာ ပူးပေါင်းပါဝင်မှုမရှိဘူးလို့ ထိပ်တိုက်ဖြစ်စရာအမြင်တွေကို ထုတ်ထုတ်ပြောလေ့ရှိပါတယ်။

သုံးသပ်ချက် - နှိမ်နင်းမှု လုပ်လာနိုင်

အမေရိကန်မှာ စီးပွား‌ရေးပြီးရင် မဲဆန္ဒရှင်အများစုရဲ့စိုးရိမ်ချက်က လူဝင်မှုကြီးကြပ်ရေးနဲ့ မက္ကဆီကို - အမေရိကန်နယ်စပ်ရေးရာကိစ္စဖြစ်တယ်လို့ အမြင်သဘောထားစစ်တပ်တွေမှာဖော်ပြနေပါတယ်။ အဲဒီအတွက် ဟိုမန်၊ နုန်းအပါအဝင် နောက်ထပ် သဘောထားတင်းမာသူတစ်ဦးဖြစ်တဲ့ စတီဖန်မိုင်လာကို နယ်စပ်ရေးရာမူဝါဒတာဝန်ခံအဖြစ် ရွေးထားတာကို ကြည့်ရင် ဒေါ်နယ်ထရမ့်ဟာ သူပေးထားတဲ့ကတိကို အမှန်တကယ်အကောင်အထည်ဖော်ဖို့ လုပ်နေတယ်ဆိုတာ မြင်သာပါတယ်။ ဒါပေမယ့် ဒါကို အကောင်အထည်ဖော်ဖို့ လူအစုလိုက်အပြုံလိုက်နေရပ်ပြန်ပို့တာ၊ အလုပ်နေရာတွေကို စီးနင်းတာမျိုးတွေ လုပ်လာမယ်ဆိုရင် ဒီမိုကရက်တစ်ဘက်ကို ယိမ်းတဲ့ပြည်နယ်တွေနဲ့ တရားရေးပိုင်းမှာ ဒီလုပ်ရပ်ကို ပြန်တွန်းကန်တာ ဒါမှမဟုတ် မပူးပေါင်းတာမျိုးလို ထိပ်တိုက်တွေ့တဲ့လမ်းကြောင်းပေါ် ရောက်သွားနိုင်ပါတယ်။ ရွှေ့ပြောင်းအလုပ်သမားတွေရဲ့လုပ်အားကို မီခိုနေရပြီး ရီပတ်ဘလီကန်ပါတီကို ထောက်ခံတဲ့ပြည်နယ်အချို့တောင် ဒါကို ကန့်ကွက်လာနိုင်ပါတယ်။ ထရမ့်ရဲ့ ပထမသက်တမ်းမှာ လုပ်ခဲ့သလို မိသားစုတွေ ခွဲထုတ်တာ ဒါမှမဟုတ် အမေရိကန်နိုင်ငံသားဖြစ်ပြီးသားသူတွေတောင် သူတို့ရဲ့ အထောက်အထားမဲ့ဆွေမျိုးတွေနဲ့အတူ ပြည်နှင်ခံရတာမျိုး ရှိလာမယ်ဆိုရင်တော့ လူထုအမြင်ဟာ အလျင်အမြန် ပြောင်းသွားနိုင်ပါတယ်။

နိုင်ငံခြားရေးမူဝါဒ - တရုတ်ဆန့်ကျင်သူတွေ

ကမ္ဘာတဝန်းမှာ အမေရိကန်ရဲ့ စစ်ရေးနဲ့ စီးပွားရေးဆိုင်ရာလွှမ်းမိုးနိုင်မှုအတွက် တရုတ်နိုင်ငံဟာ အကြီးမားဆုံးခြိမ်းခြောက်မှုတစ်ခုအဖြစ်ဆက်ရှိနေတယ်လို့ ရှေးရိုးစွဲ ကွန်ဆာဗေးတစ်အများစုက ရှုမြင်ထားကြပါတယ်။

ထရမ့်ဟာ ကုန်သွယ်ရေးကဏ္ဍနဲ့ပတ်သက်ပြီး တရုတ်ပေါ် ပြောဆိုတဲ့သူ့ရဲ့ ဝေဖန်မှုအများစုကို သတိကြီးကြီးထား ခြေလှမ်းနေပါတယ်။ တစ်ချိန်တည်းမှာပဲ သူ့ရဲ့ နိုင်ငံခြားရေးမူဝါဒကို အကောင်အထည် ဖော်မယ့်အဖွဲ့ကိုတော့ အခွန်တွေတိုးကောက်မယ်ဆိုတဲ့ထရမ့်စကားကို ပိုထင်ပေါ်အောင်လုပ်မယ့် တရုတ်ဝေဖန်သူတွေနဲ့ ဖြည့်ထားပါတယ်။

မာကို ရူဘီယို၊ နိုင်ငံခြားရေးဝန်ကြီး

"ဒီရာစုနှစ်အတွင်း ခြိမ်းခြောက်မှုကို သရုပ်သကန်ပေါ်စေမှာက တရုတ်ဖြစ်ပါတယ်။ ဒါကို တန်ပြန် ရင်ပေါင်တန်းနိုင်ဖို့ဆိုရင် အစိုးရတစ်ရပ်တည်းနဲ့မရပါဘူး။ လူမှုအသိုက်အဝန်းတစ်ခုလုံးအားကို လိုအပ်မှာဖြစ်ပါတယ်''

၂၀၁၁ ခုနှစ်ကစလို့ ဖလော်ရီဒါပြည်နယ် အထက်လွှတ်တော်အမတ်အဖြစ် ရွေးချယ်ခံရသူလည်းဖြစ်၊ ကျူဘား-အမေရိကန်နွယ်ဖွားလည်းဖြစ်တဲ့ မာကို ရူဘီယိုဟာ အတွေ့အကြုံရှိ ပြည်သူ့ဝန်ထမ်းဟောင်း ဖြစ်ပါတယ်။ လွှတ်တော်မှာ နှစ်ပါတီက တင်တဲ့လူဝင်မှုကြီးကြပ်ရေး ပြုပြင်ပြောင်းလဲမှုတွေကို ထောက်ခံခဲ့သူဖြစ်သလို အရင်တုန်းကဆိုရင် ဒေါ်နယ်ထရမ့်ကို ဝေဖန်ခဲ့သူလည်းဖြစ်ပါတယ်။

၂၀၁၆ ခုနှစ် အမေရိကန်သမ္မတ ရွေးကောက်ပွဲမှာ ရီပတ်ဘလီကန်ပါတီအတွက် သမ္မတလောင်းတွေအဖြစ် ဝင်ပြိုင်ကြတုန်းကတော့ ထရမ့်နဲ့ ရူဘီယိုတို့ဟာ တစ်ခါတလေမှာ ယှဥ်ပြိုင်အား ပြင်းခဲ့ကြတာမျိုးတောင် ရှိပါတယ်။ ပါတီတွင်း သမ္မတလောင်း ဝင်ပြိုင်တာ မအောင်မြင်ခဲ့သလို နောက်ပိုင်းမှာ သူက ထရမ့်ကို ထောက်ခံခဲ့ပါတယ်။

ရီပတ်ဘလင်ကန် သမ္မတလောင်းအဖြစ် ယှဥ်ပြိုင်ခဲ့ဘူးပါတယ်။ ရူဘီယိုက သမ္မတလောင်းအဖြစ် အရွေးမခံရပါဘူး။ အဲဒီနောက်ပိုင်းမှာတော့ ဒေါ်နယ်ထရမ့်ကို သူက ထောက်ခံခဲ့တာပါ။

အခုနှစ်ပိုင်းတွေမှာတော့ ရွေးကောက်ပွဲ မဲဆွယ်ပွဲတွေအပြင် မီဒီယာတွေကတဆင့် ထရမ့်အတွက် ပြင်းပြင်းထန်ထန် ခုခံကာကွယ်‌ပြောဆိုတာကို သူ လုပ်လာပါတယ်။

အထက်လွှတ်တော် စုံစမ်းထောက်လှမ်းရေးနဲ့ နိုင်ငံခြားဆက်ဆံရေး ကော်မတီအဖွဲ့ဝင်ဖြစ်တဲ့သူ့ကို ရုရှား-ယူကရိန်း ပဋိပက္ခ၊ အီရန်အရေးနဲ့ တရုတ်အရေးကိစ္စတွေအတွက်ဆိုရင် ရပ်တည်ချက် သဘောထားတင်းမာသူအဖြစ် သိကြပါတယ်။

အသက် ၅၃ နှစ်အရွယ် ရူဘီယိုဟာ အိမ်ဖြူတော်ကို သွားမယ့် သူ့ရည်မှန်းချက်ကို ဆက်ထိန်းထားနိုင်မယ်လို့ ဆိုနိုင်ပါတယ်။ နိုင်ငံခြားရေးဝန်ကြီးဌာနကို ကိုင်မယ့်သူဟာ ဒီတာဝန်ကနေ နိုင်ငံသိ၊ ကမ္ဘာသိ လူပုဂ္ဂိုလ်တစ်ဦးအနေနဲ့ သူ့ အခန်းကဏ္ဍကို မြှင့်တင်နိုင်မှာဖြစ်ပါတယ်။

မိုက်ကယ် ဝေါ့ဇ်၊ အမျိုးသားလုံခြုံရေးအကြံပေး

"အာဏာရှင်အုပ်စိုးသူအစုအဖွဲ့တွေကို မီးစ ထိုးပေးနေတာကတော့ သူတို့ အားနည်းချက်မရှိပါဘူးဆိုတဲ့ သူတို့တစ်ဖက်သတ်ခံယူထားတဲ့ ခံယူချက်ဖြစ်နေပါတယ်။ တရားမျှတမှု ရှိတာ မရှိတာ သူတို့ မတွေးပါဘူး။ ဒီတော့ သူတို့ကို ကြံ့ခိုင်ခွန်အားနဲ့ပဲ ဟန်ပျက်အောင် လုပ်နိုင်ပါလိမ့်မယ်''

ဝေါ့ဇ် ဟာ လေးစားခံ အထူးတပ်ဖွဲ့ စစ်ပြန်ဟောင်းတစ်ဦးဖြစ်သလို မာကိုရူဘီယိုလိုပဲ ဖလော်ရီဒါ ပြည်နယ်ကိုယ်စားပြု ကွန်ဂရက်လွှတ်တော် အမတ်လည်းဖြစ်ပါတယ်။

သူလည်းပဲ တရုတ်ကိစ္စတွေမှာ ရပ်တည်ချက် မာပြီး ပစိဖိတ်ဒေသမှာ ပိုဖြစ်လာနိုင်တဲ့ပဋိပက္ခတွေအတွက် အမေရိကန်အနေနဲ့ ပိုပြီး ကြိုတင်ပြင်ဆင်သင့်ပြီလို့ ထောက်ပြတဲ့ အောက်လွှတ်တော် ဆပ်ကော်မတီ တစ်ခုကို ဦးဆောင်သူဖြစ်ပါတယ်။

၂၀၂၂ ခုနှစ်တုန်းက တရုတ်နိုင်ငံ၊ ဘေကျင်းမှာပြုလုပ်တဲ့ ဆောင်းရာသီ အိုလံပစ်အားကစားပွဲတော်မှာ အမေရိကန် မပါဝင်ဖို့ တောင်းဆိုတဲ့ ကွန်ဂရက်လွှတ်တော်အမတ်တွေထဲ ပထမဆုံး ပြောခဲ့သူလည်းဖြစ်ပါတယ်။

တာဝန်ထမ်းဆောင်ဖို့ သက်တမ်းကုန်ဆုံးတော့မယ့် ဘိုင်ဒန် အစိုးရကို ဝေဖန်ခဲ့သူဖြစ်ပြီး သူဝေဖန်တဲ့အထဲမှာ အာဖဂန်နစ္စတန်ကနေ အမေရိကန်စစ်တပ်ကို ပြန်လည်ရုတ်သိမ်းမှုလည်း ပါဝင်ပါတယ်။

အမေရိကန်စစ်တပ် မူဝါဒတွေဟာ တိုက်ပွဲမှာ တိုက်နိုင် ခိုက်နိုင်စွမ်းကို အခြေခံတာထက် အားလုံးပါဝင်နိုင်ခွင့်၊ ကျားမတန်းတူမှု၊ ဘာသာလူမျိုး မခွဲတာတွေကို အခြေခံသင့်တယ်လို့ဆိုပြီး သူက ဝေဖန်ပါတယ်။

သုံးသပ်ချက် - လက်ငင်း ချက်ချင်း အကျိုးပေါ်မယ့် ဆက်ဆံရေး

သမ္မတအဖြစ် ပထမသက်တမ်းတာဝန်ယူခဲ့တုန်းက ထရမ့်ဟာ တရုတ်နဲ့ ကုန်သွယ်ရေးစစ်ကို ဖြစ်စေခဲ့သလို ကိုဗစ် ကိုလည်း "တရုတ်ဗိုင်းရပ်စ်" လို့ အမည်တပ် ခေါ်ဆိုခဲ့တာပါ။ ဒါပေမယ့်လည်း တရုတ်သမ္မတ ရှီကို သံမဏိလက်သီးမိုးပြီး အုပ်ချုပ်တဲ့ "ထက်မြက်" တဲ့သူလို့လည်း ချီးကျူးပြန်ပါတယ်။ ဒီလို မခန့်မှန်းနိုင်မှုကပဲ ချက်ချင်း လက်ငင်းအကျိုးပေါ်မယ့် အမေရိကန်နဲ့ ဗျူဟာမြောက် ဆက်ဆံရေးကို စီမံဖို့ ပိုမိုခက်ခဲသွားစေနိုင်ပါတယ်။ ထရမ့်ခန့်အပ်ထားတဲ့ အမျိုးသားစုံစမ်းထောက်လှမ်းရေးအဖွဲ့ ဒါရိုက်တာဖြစ်သူ တူစီ ကဘက် နဲ့ ရူဘီယို တို့ အကြားမှာလည်း ဆက်ဆံရေးသဘောထားကွဲမှုတွေရှိလာနိုင်ပါတယ်။ တူစီ ကဘက်က ရူဘီယိုရဲ့ နိုင်ငံခြားရေး မူဝါဒဟာ "အင်အားပြပြီး ငြိမ်းချမ်းရေးတည်ဆောက်မယ့်၊ စစ်လှုံ့ဆော်တဲ့မူတွေကို ကိုယ်စားပြုမယ့်သူ'' လို့ အစောပိုင်းမှာ ဝေဖန်ခဲ့ပါတယ်။

အစိုးရစွမ်းဆောင်ရည် - စရိတ်စက လျှော့ချမယ့်သူတွေ

ထရမ့်က သူ အိမ်ဖြူတော်ကို ပြန်ရောက်တဲ့အခါ ဗြူရိုကရေစီ ယန္တရားကို ဖြိုချဖို့ဆိုပြီး ''အစိုးရ စွမ်းဆောင်ရည်ဌာန(Doge)'' ဆိုတဲ့ဌာနအသစ်ကို ဦးဆောင်ဖို့ ခန့်ထားသလို နည်းပညာ ဘီလျံနာ သူဌေးကြီး အီလွန်မက်စ်နဲ့ ဗီယက် ခရာမာဆွာမိ တို့ကို ခန့်ထားပါတယ်။

မက်စ်ခ်ဟာ အသုံးစရိတ်ကို ဒေါ်လာ ၂ ထရီလီယံ နီးပါးလောက် ဖြတ်ပြီး အစိုးရထဲမှာ လည်ပတ်မှု မြန်ဆန်အောင်လုပ်မယ်လို့ ပြောထားပါတယ်။

ရာမာဆွာမိကိုတော့ အခွန်ကောက်တဲ့အေဂျင်စီ IRS နဲ့ ပညာရေးဌာနကို မထားတော့ဖို့ အားပေးသူဖြစ်ပါတယ်။

အစိုးရဝန်ကြီးဌာန တစ်ခုမဟုတ်တဲ့ Doge ဆိုတဲ့ ဒီဌာနကို ဘယ်လို စီမံခန့်ခွဲမယ်ဆိုတာကတော့ စောင့်ကြည့်ရမှာပါ။

အီလွန်မက်စ်၊ အစိုးရစွမ်းဆောင်ရည်ဌာန

"ဒီမိုကရေစီအတွက် ခြိမ်းခြောက်မှုလားဆိုတော့ မဟုတ်ပါဘူး။ ဗြူရိုကရေစီအတွက် ခြိမ်းခြောက်မှုပါ"

လူမှုကွန်ရက် X(အရင်က တွစ်တာ)၊ Tesla နဲ့ SpaceX တို့ကို ပိုင်ဆိုင်တဲ့အပြင် တခြား ဖက်စပ်လုပ်ငန်းတွေလည်း လုပ်နေတဲ့ အီလွန်မက်စ် ဟာ တောင်အာဖရိကနွယ်ဖွားဖြစ်ပြီး ကမ္ဘာ့အချမ်းသာဆုံး သူဌေးကြီးဖြစ်ပါတယ်။

သူ့ကို လူမှုကွန်ရက်ပေါ်မှာ ခပ်သွက်သွက်တုံ့ပြန်တတ်သူ၊ အစိုးရရဲ့ လုပ်ထုံးလုပ်နည်းအဆင့်ဆင့်ကို ဆန့်ကျင်သူ၊ နောက် လူမှုကွန်ရက် X (အရင်က တွစ်တာ)ကို ဝယ်ပြီးတဲ့နောက် အသုံးစရိတ်တွကို ဖြတ်ချပစ်သူအဖြစ် လူသိများကြပါတယ်။

ထပ်ခါတလဲလဲများပြားလှတဲ့ အစိုးရရဲ့ ညွှန်ကြားချက်ဆိုတာ အဲဒီအပေါ်သဘောထားကွဲလွဲမှုတွေ ရှိနေသူ ဖြစ်သလို၊ အစိုးရအသုံးစရိတ်ဖြတ်တောက်ဖို့နဲ့ ပတ်သက်ပြီး သူဝယ်ယူခဲ့တဲ့ ဆိုရှယ်မီဒီယာ X ကနေ ဝေဖန် တိုက်ခိုက်နေသူလည်းဖြစ်ပါတယ်။

သူ့ကို နိုင်ငံရေး တံဆိပ်ကပ်တာမျိုး မခံပေမဲ့ ၂၀၂၄ ခုနှစ်မှာတော့ ထရမ့် ပြန်လည် ရွေးချယ်ခံရရေးအတွက် ဒေါ်လာသန်းရာချီ သုံးခဲ့သလို မဲအကြိတ်အနယ် ယှဥ်ပြိုင်ရတဲ့နယ်တွေမှာ သီးခြားပွဲလုပ်တာ၊ ထရမ့်ဘေးနားမှာ လူထုကြားထဲ ထွက်လာတာတွေ လုပ်လာပါတယ်။

နည်းပညာသစ်တွေဆီကို ကူးပြောင်းလိုက်တာဟာ အစိုးရအဖွဲ့ကို လူနည်းနည်းနဲ့ ထိထိရောက်ရောက် ပြောင်းလဲနိုင်မယ်လို့ သူက အကြံပြုပါတယ်။

ဗီယက် ခရာမာဆွာမိ၊ အစိုးရ စွမ်းဆောင်ရည်ဌာန

''FBI ကို ပြုပြင်ပြောင်းလဲလို့ မရတော့ဘူး။ အဖြေမှန်ကတော့ ဒီအဖွဲ့ကို သိမ်းလိုက်တာပဲ။ ဟုတ်တယ်။ သမ္မတက အဲဒါကို လုပ်ခွင့်ရှိတယ်။ ကျွန်တော်ဆို လုပ်မှာ''

အိန္ဒိယနွယ်ဖွား အမေရိကန်နိုင်ငံသား သန်းကြွယ်သူဌေး ဗီယက် ခရာမာဆွာမိဟာ ဇီဝနည်းပညာစွန့်ဦးတည်ထွင်သူသမားတစ်ဦးအနေနဲ့ ချမ်းသာလာတာဖြစ်ပြီး နောက်ပိုင်းမှာ ပိုင်ဆိုင်မှုစီမံခန့်ခွဲရေးကုမ္ပဏီကို ထူထောင်ထားပါတယ်။

၂၀၂၄ ခုနှစ်မှာ ရီပတ်ဘီကန် ပါတီရဲ့ ကိုယ်စားပြု သမ္မတလောင်း ရွေးကောက်ပွဲကို ပါဝင်ယှဥ်ပြိုင်ခဲ့ပြီး ထရမ့်ရဲ့ "အမေရိကန်သာ ပထမ" ဆိုတဲ့ဆောင်ပုဒ်ကို ဆက်ပြီး ကိုင်ဆွဲ လုပ်ဆောင်မယ်လို့ ကတိကဝတ်ပြုခဲ့သူပါ။

ပါတီတွင်းမှာ သူ့ကို လူကြိုက်များမှု လအတော်များများ ကြာခဲ့ပြီး ပါတီတွင်းသမ္မတလောင်းတွေ စကားစစ်ထိုးပွဲတွေကြောင့် နေရာရလာသလို မီဒီယာတွေကလည်း သူ့ကို ပိုအာရုံစိုက်လာကြပါတယ်။

သမ္မတဟောင်းဖြစ်တဲ့ ထရမ့်ကို ထောက်ခံဖို့ ပါတီတွင်းသမ္မတလောင်းပြိုင်ပွဲကနေ သူ ထွက်ပါတယ်။ ဒါပေမဲ့ ဒေါ်နယ်ထရမ့် ရှုံးခဲ့တဲ့ ၂၀၂၀ ရွေးကောက်ပွဲရလဒ်ဟာ ''နည်းပညာကုမ္ပဏီကြီးတွေကြောင့်'' လို့ ပြောတာ၊ နောက်ပြီး ၂၀၂၁ ခုနှစ်တုန်းက ဖြစ်တဲ့ အမေရိကန် လွှတ်တော် အဆောက်အဦထဲ ဆူပုအုံကြွမှုဟာ ''အတွင်းလူပါလို့'' ဆိုတဲ့စကားတွေကြောင့် ရွေးကောက်ပွဲ မဲဆွယ်ကာလမှာ လူတွေအာရုံစိုက်ခံခဲ့ရပါတယ်။

ပြည်ထောင်စုအစိုးရအဆင့်မှာ ဝန်ထမ်းအမြောက်အများကို အလုပ်ဖြုတ်တာ၊ အစိုးရအေဂျင်စီ တစ်ခုလုံးနဲ့ ဝန်ကြီးဌာနတစ်ခုလုံးကို ဖျက်သိမ်းတာ၊ အသုံးစရိတ် ဖြတ်တောက်ရေးတွေကို ခပ်ပြင်းပြင်းလုပ်မယ်လို့ လှုံ့ဆော်ပြောဆိုသူ တစ်ဦးဖြစ်ပါတယ်။

သုံးသပ်ချက် - အားကျဖို့ကောင်းအောင် ရှေ့ဆုံးကနေ မဲဆွယ်ခဲ့ကြသူတွေ

အခုလို ရာထူးခန့်အပ်တာတွေဟာ ထရမ့်‌ရဲ့ ရွေးကောက်ပွဲအောင်နိုင်ရေးအတွက် ကူညီပေးတဲ့အတွက် သူတို့ကို အခုလိုပြန်ပြီး နေရာပေးတယ်လို့ နားလည်ရပါတယ်။ ဒါပေမဲ့ သူတို့ဟာ တရားဝင်အစိုးရအဖွဲ့မဟုတ်တဲ့ ဌာနတစ်ခုကို ဘယ်လောက် လုပ်ပိုင်ခွင့်ရှိရှိနဲ့ ခရီးဆက်မလဲဆိုတာကတော့ အချိန်က စကားပြောပါလိမ့်မယ်။ ဘာကြောင့်လဲဆိုရင် ကွန်ဂရက်စ်လွှတ်တော်ရဲ့အတည်ပြုချက်နဲ့မှသာ သမ္မတ က လက်မှတ်ထိုး ကျင့်သုံးနိုင်မယ့် အသုံးစရိတ်လိုကိစ္စကိုသာ သူတို့အကြံပေးနိုင်တာကြောင့်ဖြစ်ပါတယ်။ လူမှုဖူလုံရေးနဲ့ Medicare လို ကျန်းမာရေးစောင့်ရှောက်မှုစနစ်တွေကို မတို့မထိဘဲ ဆက်ထားမယ်လို့ ထရမ့်က ကတိပေးထားတာကြောင့် အသုံးစရိတ်ဖြတ်တောက်ရေးကိစ္စဟာလည်း ရှေ့နောက် မညီတဲ့ အပြောနဲ့အလုပ်ဖြစ်လာနိုင်ပါတယ်။

အားလုံးပြောင်းမယ့်သူတွေ

ထရမ့်အနေနဲ့ အခုလို ရာထူးတွေကို ခန့်အပ်တာတွေဟာ ရှိရင်းစွဲ ပိုနေမြဲ ကျားနေမြဲအခြေအနေကို ကျော်ဖြတ်ပြောင်းလဲဖို့ ရည်ရွယ်ပါတယ်။

လက်ရှိမှာ ရွေးကောက်ပွဲနိုင်လို့ ရွေးကောက်ခံ သမ္မတအဖြစ် ဆက်ရှိနေတဲ့ ထရမ့်ဟာ ဒီလူတွေ ကြီးကြပ်မယ့် နယ်ပယ်တစ်ခုချင်းစီမှာ ရှေ့တန်းကနေ တိုက်ပွဲဝင်မယ့်သူတွေကို ရွေးချယ်ထားတယ်လို့လည်း ဆိုနိုင်ပါတယ်။ ကနေဒီကို ကျန်းမာရေးနဲ့ ပြည်သူ့ဝန်ဆောင်အတွက် ရွေးထားပြီး၊ တူဆီ ဂတ်ဘာဒ်ကိုတော့ အမျိုးသားထောက်လှမ်းရေးညွှန်ကြားရေးမှုအဖြစ် ရွေးထားပါတယ်။

ရောဘတ် အက်ဖ် ကနေဒီ ဂျူနီယာ၊ ကျန်းမာရေးနဲ့ ပြည်သူ့ဝန်ဆောင်မှုများ

"အလွန်အမင်း ပြုပြင်ထားတဲ့အစားအစာတွေက အဝလွန်ရောဂါကပ် ဆိုက်စေတာ။ သမ္မတ ထရမ့် အိမ်ဖြူတော်ကို ပြန်ရောက်ရင်၊ ကျွန်တော်လည်း ဝါရှင်တန်ကို ပြန်ရောက်ရင် ပျက်စီးနေတဲ့ဒီစနစ်ကို ကျွန်တော်တို့ ပြန်လည်ပြုပြင်ပါမယ်။ အမေရိကန်ကို တဖန် ပြန်လည် ကျန်းမာလာအောင် လုပ်ပါမယ်''

အမေရိကန်ရဲ့ နာမည်အကြီးဆုံး ဒီမိုကရက်တစ် မိသားစုကနေ မွေးဖွားလာသူဖြစ်ပြီး ရှေ့နေတစ်ဦး၊ သဘာဝပတ်ဝန်းကျင် ထိန်းသိမ်းရေးကို ကာလရှည်လုပ်နေသူ တစ်ဦးဖြစ်သူကို ထရမ့်က ရွေးထားတာဖြစ်ပါတယ်။

ကနေဒီ ဂျူနီယာမှာ ဆေးပညာဆိုင်ရာ တတ်ကျွမ်းမှု မရှိပေမဲ့လည်း ကာကွယ်ဆေးတွေကို အတည်ပြုမှုကို ကြီးကြပ်ရတာအပါအဝင် သူ ပြန်လည်သုံးသပ်ချင်တယ်လို့ပြောထားတဲ့ အမေရိကန် ပြည်ထောင်စုအဆင့် ကျန်းမာရေးအေဂျင်စီတွေရဲ့လုပ်ပိုင်ခွင့်တွေကို ပိုပြန့်ကားအောင်လုပ်ဖို့ ဆန္ဒရှိနေသူပါ။

ကနေဒီ လုပ်မယ်ဆိုတဲ့ရည်ရွယ်ချက်တချို့ထဲမှာ ဥပမာအားဖြင့် သွားကျန်းမာရေးအတွက် ရည်ရွယ်ပြီး ရေထဲကို ဖလူအိုရိုက်ဒြပ်ပေါင်းရောစပ်တာမျိုးလို မှားယွင်းသိတဲ့အချက်အလက်တွေလည်း ပါဝင်နေပါတယ်။

နောက်ထပ်အခြားအကြောင်းအရာတွေမှာတော့ အစားအစာစနစ်ကို ထဲထဲဝင်ဝင်စစ်ဆေးတာ၊ အစာမက်ဆေး ထည့် မထည့် လုပ်တာမျိုးလို ကိစ္စတွေကတော့ လူထုထောက်ခံမှုရထားပါတယ်။

ကနေဒီဟာ အစောပိုင်းမှာ ၂၀၂၄ ခုနှစ်အတွက် ဒီမိုကရက်တစ်ပါတီရဲ့ သမ္မတလောင်းရွေးချယ်မှုမှာ ပါဝင်ဖို့ ကြိုးပမ်းခဲ့ပေမဲ့ နောက်ပိုင်းမှာတော့ အိမ်ဖြူတော်ခရီးအတွက် တစ်သီးပုဂ္ဂလ သမ္မတလောင်းအဖြစ် ပြောင်းလဲခဲ့ပါတယ်။

နောက်ဆုံးမှာတော့ အဲဒီအတွက် မဲဆွယ်မှုတွေကို စွန့်လွှတ်ခဲ့ပြီး ဒေါ်နယ်ထရမ့်ကို ထောက်ခံခဲ့ပါတယ်။ တမူထူးခြားတဲ့ ဒီမဟာမိတ်ပြုမှုကြောင့်ပဲ သူဟာ အထက်လွှတ်တော်က အတည်ပြုဖို့ လိုနေသေးတဲ့ ထရမ့်အစိုးရအဖွဲ့ရဲ့ အဓိကရာထူးနေရာတစ်ခုကို ဆုပ်ကိုင်ဖို့ ဦးတည်သွားစေပါတယ်။

တူစီ ကဘက်၊ အမျိုးသားထောက်လှမ်းရေး

"ကျွန်မတို့ စစ်ဦးစီးချုပ်ထံက မျှော်လင့်ထားတဲ့သတ္တိမျိုးကို (ထရမ့်)က ကျင့်သုံးထားတယ်။ စစ်ပွဲဆိုတာ နောက်ဆုံးရွေးချယ်စရာမျိုးပဲဖြစ်အောင် ငြိမ်းချမ်းရေးအတွက် အားထုတ်ရာမှာ ပြိုင်ဘက်တွေနဲ့ ရင်ဆိုင်ရဲတဲ့သတ္တိ၊ အာဏာရှင်တွေနဲ့ ရင်ဆိုင်ရင်ဆိုင်ရဲတဲ့သတ္တိကို ပြထားနိုင်တယ်''

အီရတ်စစ်ပွဲအတွင်း ဆေးတပ်ဖွဲ့နဲ့အတူ စစ်မှုထမ်းခဲ့တဲ့ စစ်ပြန်အရာရှိဟောင်းဖြစ်တဲ့ တူစီ ကဘက်ဟာ အမေရိကန်နဲ့ နိုင်ငံခြားရေးမူဝါဒကို ဝေဖန်လေ့ရှိသူဖြစ်ပါတယ်။

၂၀၁၇ ခုနှစ်မှာ ဒီမိုကရက်တစ်ပါတီရဲ့ ကွန်ဂရက်လွှတ်တော်အမတ်ဖြစ် တာဝန်ထမ်းနေတုန်းကဆိုရင် အဲဒီတုန်းက ဆီးရီးယားသမ္မတ အာဆတ်နဲ့ တွေ့ဆုံခဲ့ပြီး အာဆတ်ဟာ လူသေဆုံးစေတဲ့ဓာတုလက်နက်တွေသုံးနေတယ်လို့ အပြစ်ဖို့တဲ့ အမေရိကန်ထောက်လှမ်းရေးရဲ့အကဲဖြတ်မှုကို သံသယပွားအောင် လုပ်ခဲ့သူလည်းဖြစ်ပါတယ်။

အဲဒီနောက် ၅ နှစ်အကြာမှာ ရုရှားက ယူကရိန်းကို ကျူးကျော်တဲ့အခါမှာတော့ သူက အမေရိကန်လည်း မဟာမိတ်အဖြစ်ပါဝင်နေတဲ့ မြောက်တ္တလန္တိတ်စာချုပ်အဖွဲ့(နေတိုး)ကို အပြစ်တင်ခဲ့သလို ယူကရိန်းမှာ အမေရိကန်ငွေကြေးထောက်ပံ့မှုနဲ့လည်ပတ်နေတဲ့ ဇီဝဓာတ်ခွဲခန်းတွေရှိ‌နေတယ်ဆိုတဲ့ ကရင်မလင်နန်းတော်ရဲ့ပြောဆိုချက်ကို ထပ်လောင်း ပြောခဲ့သူဖြစ်ပါတယ်။

လက်ဝဲယိမ်း ဘာနီး ဆန်းဒါးစ်ကို ထောက်ခံသူအဖြစ်ကနေ ထရမ့်အားပေးသူအဖြစ်ပြောင်းလဲခဲ့သူလည်းဖြစ်တာကြောင့် ဒါက သူ့ရဲ့ ပုံမှန်မဟုတ်တဲ့နိုင်ငံရေးအလှည့်အပြောင်း ခရီးလည်း ဖြစ်နေပြန်ပါတယ်။ သူမရဲ့ ပုံမှန်မဟုတ်တဲ့ နိုင်ငံရေးလမ်းကြောင်းပုံစံမှာ ရပ်တည်လာသူဖြစ်ပါတယ်။

ဒါပေမယ့်လည်း တစ်ဦးတည်းချုပ်ကိုင်ချယ်လှယ်မှုကို မနှစ်မြို့သူ၊ ဝင်ရောက်စွက်ဖက်ခြင်းကို မနှစ်မြို့သူ စတဲ့သူမရဲ့ ရပ်တည်ချက်တွေတော့ မပြောင်းလဲဘဲ ဆက်ရှိနေပါတယ်။

သုံးသပ်ချက် - အငြင်းပွားဖွယ်ရာနိုင်ငံရေးသမားတွေကို ထိန်းကျောင်းမှု

ကနေဒီနဲ့ ဂတ်ဘာ့ဂ်တို့ဟာ ဗြူရိုကနေစီယန္တရားအဆင့်အဆင့်နဲ့ နက်နက်ရှိုင်းရှိုင်းလည်ပတ်နေတဲ့ အမေရိကန်ပြည်ထောင်စုကို ဖြိုချမယ့် ထရမ့်ရဲ့ အစီအစဥ်ကို ထောက်ခံမှု အရှိဆုံးလူတွေထဲမှာ ပါဝင်ပါတယ်။ ဒါပေမဲ့ သူတို့နှစ်ဦးလုံးဟာ ''လျှို့ဝှက်ပူးပေါင်း ကြံစည်တယ်ဆိုတဲ့ဇာတ်လမ်း''တွေကိုလည်း မကြာခဏ ယုံကြည်တတ်ကြသူတွေပါ။ ဒါပေမဲ့ အငြင်းပွားစရာတွေ ထုတ်ထုတ်ပြောတတ်တဲ့နိုင်ငံရေးသမားတွေဟာ အပေါင်းအပါနဲ့အတူ လာတတ်ကြပါတယ်။ ကနေဒီကတော့ အစားသောက်နဲ့ ထုတ်လုပ်ရေးလုပ်ငန်းနယ်ပယ်မှာ စည်းကမ်းတင်းကျပ်တာတွေ ပြုလုပ်ချင်တာကြောင့် ဒါဟာ ထရမ့်လုပ်မယ်ဆိုတဲ့ အစိုးရအဖွဲ့ ကျုံ့ရေးအစီအစဥ်နဲ့ ပွတ်တိုက်တာတွေ ရှိလာနိုင်ပါတယ်။ ဂတ်ဘာ့ဂ်ကတော့ အမေရိကန်ရဲ့ အင်အားကြီးမှုနဲ့ပတ်သက်ပြီး ကြီးကြီးမားမားဝေဖန်သူပါ။ ဒီလိုလူက ဥပမာအနေနဲ့ပြောရရင် အီရန်ဆန့်ကျင်ရေး လိုနေရာမှာ ဒီအင်အားကြီးမှုကို အသုံးပြုဖို့ မကြောက်တဲ့ သမ္မတတစ်ဦးအတွက် တာဝန်ထမ်းဆောင်မှာဖြစ်ပါတယ်။

စီးပွားရေး - အခွန်စည်းကြပ်မယ့်သူတွေ

အမေရိကန်နိုင်ငံသားတွေရဲ့ အလုပ်အကိုင်အခွင့်အလမ်းတွေကို ကာကွယ်မယ်လို့ ပြောထားတဲ့ ထရမ့်အတွက် ကုန်သွယ်ရေးနဲ့ အခွန်ကောက်ခံမှုကို ရှေ့ကနေ လုပ်မယ့် သူတွေကိုလည်း ရွေးချယ်ထားပါတယ်။

တရုတ်၊ ကနေဒါနဲ့ မက္ကဆီကို နိုင်ငံတို့လို ထိပ်တန်း ကုန်သွယ်ဖက်နိုင်ငံတွေကနေ အမေရိကန်ကို ရောက်လာတဲ့ကုန်ပစ္စည်းတွေကို အခွန်တိုးကောက်မယ်လို့ ခြိမ်းခြောက်ထားတဲ့ ထရမ့်အပြောအတိုင်း အခွန်တိုးကောက်ဖို့ လုပ်ခိုင်းတာတွေလည်း ရှိလာနိုင်ပါတယ်။

ဟောင်းဝပ် လက်နစ်၊ ကုန်သွယ်ရေးဝန်ကြီး

"နှစ်ဦးနှစ်ဖက် အကျိုးရှိမယ့် အခြေအနေပါ။... ကုန်သွယ်စည်းကြပ်တဲ့နေရာကနေ ငွေအမြောက်အများကို ကျွန်တော်တို့ ရရှိပါမယ်။ ဒါပေမယ့် များသောအားဖြင့် အားလုံးက ကျွန်တော်တို့နဲ့ ညှိနှိုင်းတာတော့ လုပ်ရမှာပါ"

လက်နစ်ဟာ ကမ္ဘာကုန်သွယ်ရေးစင်တာ တိုက်ခိုက်ခံရမှုအတွင်း အလုပ်သမား ၆၅၈ ယောက် သေဆုံးအပြီး ပြိုပျက်ခဲ့တဲ့ Cantor Fitzgerald ငွေ‌ရေးကြေးရေးဆိုင်ရာ ကုမ္ပဏီကို ပြန်လည်ထူထောင်ခဲ့ပြီး အဲဒီကုမ္ပဏီရဲ့ အမှုဆောင်ချုပ်ဖြစ်သလို ဘီလျံနာ တစ်ဦးလည်းဖြစ်ပါတယ်။

ထရမ့်ရဲ့ မဲဆွယ်စည်းရုံးရေးကာလအတွင်း မဲဆွယ်ငွေကြေး အဓိကထည့်ဝင်သူ တစ်ဦးဖြစ်ခဲ့တာကြောင့် အာဏာလွှဲပြောင်းရေးအဖွဲ့မှာ ပူးတွဲဥက္ကဋ္ဌအဖြစ် တာဝန်ယူရသူ ဖြစ်လာပါတယ်။ ဒါ့အပြင် သူဟာ လာမယ့်အစိုးရသစ်အဖွဲ့မှာ အလုပ်အကိုင်ထောင်ချီ ခေါ်ယူတဲ့အခါ သူ့အခန်းကဏ္ဍလည်း ဆက်ပါနေမှာဖြစ်ပါတယ်။

ရွေးကောက်ခံသမ္မတ ဒေါ်နယ်ထရမ့်က သူ့ကို စီးပွားရေးဝန်ကြီးအဖြစ် ရွေးချယ်ထားပါတယ်။

ကုန်သွယ်ရေးအခွန်အကောက်တွေကို စီးပွားကူးသန်းဌာနက တင်းတင်းကျပ်ကျပ်ကိုင်တွယ်ဖို့ အပါအဝင် ခရစ်တိုငွေကြေးတွေနဲ့ဆိုင်တဲ့လုပ်ထုံးလုပ်နည်းတွေ လျှော့ချတာ၊ ဝင်ငွေခွန် မကောက်တော့တာမျိုးလို ထရမ့်ရဲ့ စီးပွားရေးမူဝါဒတွေကို ပြတ်ပြတ်သားသားထောက်ခံထားသူလည်းဖြစ်ပါတယ်။

အခွန်ကောက်တယ်ဆိုတာဟာ အမေရိကန်က စုဖွဲ့လုပ်ငန်းတွေအတွက် မကောင်းဘူးလို့ မြင်တဲ့ သူနဲ့နယ်ပယ်တူ လူတွေထဲကနေ ချွန်ထွက်ပြီး ဒီအမြင်တွေကို လက်ခံလာသူလည်းဖြစ်ပါတယ်။

စကော့ ဘတ်ဆန့်၊ အမေရိကန် ဘဏ္ဍာရေးဝန်ကြီး

"အလက်ဇန္ဒြား ဟယ်လ်မီတန် ပြောသလိုပဲ ကျွန်တော်တို့ဟာ အမေရိကန်မိဘပြည်သူတွေရဲ့ လူမှုဘဝ တိုးတက်ဖို့နဲ့ စီးပွားရေးလုပ်ငန်းတွေ တိုးတက်ဖို့ဆိုရင် အခွန်အထုပ်ရဲ့လုပ်နိုင်စွမ်းကို လန့်နေတာမျိုးမဖြစ်သင့်ဘူး''

ဘက်ဆန့် ဘဏ္ဍာရေးဆိုင်ရာကျွမ်းကျင်သူ ဖြစ်ပါတယ်။ သူ့ကို အခုလို ခန့်အပ်တာဟာ အလုပ်လုပ်ကိုင်ဖို့ မျှမျှတတ ဖြစ်လာနိုင်တယ်လို့ Wall Street ဘက်က မှတ်ယူပါတယ်။

သူဟာ သာမန်ရိုးကျ ဘဏ္ဍာရေးနောက်ခံသမိုင်းကြောင်းကနေ ဘဏ္ဍာရေးဝန်ကြီးအဖြစ် လျာထားခံရသူ ဖြစ်လာသူပါ။ ဒါပေမဲ့ သူဟာ ဒီမိုကရက်တစ်ပါတီအတွက် အများဆုံး ငွေကြေးထည့်ဝင်သူလည်းဖြစ်၊ ထိပ်တန်းစီးပွားရေးသမားလည်းဖြစ်တဲ့ ဂျော့ဆိုးရော့စ်နဲ့လည်း ဆက်ဆံရေး ကတောက်ကဆရှိသူ ဖြစ်ပါတယ်။

ဘတ်ဆန်ဟာ ကွန်ဆာဗေးတစ်အဖြစ် လက်ရှိမှာ ခိုင်ခိုင်မာမာ ရပ်တည်နေသူဖြစ်ပေမဲ့ ဘတ်ဂျတ်ငွေတွေ ဖြတ်တောက်တာ၊ လုပ်ထုံးလုပ်နည်းတွေ လျှော့ချတာ၊ အမေရိကန်ရေနံထုတ်လုပ်မှုအပေါ် ရင်းနှီးမြှပ်နှံမှုတွေကို တိုးမြင့်ဖို့ သူ ထောက်ခံပါတယ်။

သွင်းကုန်တွေအပေါ် စည်းကြပ်ခွန်အသစ်တွေ ကောက်ခံမယ်ဆိုတဲ့ ထရမ့်ပြောဆိုချက်ကို သူလည်း ထောက်ခံပေမဲ့ ထရမ့်ဟာ ဒါကို အမေရိကန်နိုင်ငံအတွက် အခွန်ရပေါက်ရလမ်းလို့ မြင်ထားတာ မဟုတ်ဘဲ ညှိနှိုင်းစေ့စပ်ရေး လက်နက်တစ်ခုအနေနဲ့ မြင်ထားတယ်ဆိုတဲ့အမြင်ကိုလည်း လက်နစ်နည်းတူ အမြင်တူသူဖြစ်ပါတယ်။

သုံးသပ်ချက် - ထရမ့်အတွက် ဝှက်ဖဲ

အခွန်တိုးကောက်ချင်တဲ့ ထရမ့်ရဲ့ အာသီသဟာ ပျောက်သွားတယ်တော့ မရှိပါဘူး။ စီးပွားရေးသီအိုရီအရရော၊ ပြဿနာမျိုးစုံရှိနေတဲ့နိုင်ငံတွေအပေါ် မှာ ဘက်ပေါင်းစုံသုံးနိုင်တဲ့ ဖဲချပ်တစ်ချပ်အနေနဲ့ပါ အသုံးချဖို့ ရည်ရွယ်ပါတယ်။ ဒါပေမဲ့ သူ့အစီအစဥ်တွေဟာ စတော့စျေးကွက်တိုးတက်ရေး၊ ငွေကြေးဖောင်းပွမှုလျှော့ချရေးတို့လို အစီအစဥ်တွေအတွက်ဆိုရင်လည်း ဖီလာဆန့်ကျင်နေပြန်တာကြောင့် ဘယ်လောက်သတ္တိမွေးထားမလဲဆိုတာတဲ့မေးခွန်းတွေလည်း ထွက်လာပါတယ်။ ထရမ့်ရဲ့ စီးပွားရေးအဖွဲ့ဟာ သူ့အစိုးရအဖွဲ့မှာ အတွေ့အကြုံရင့် ကစားသမားအချို့ ပါဝင်နေတယ်ဆိုတာကိုလည်း ကိုယ်စားပြုပါတယ်။ သူတို့ ခေါင်းဆောင်ဖြစ်လာမယ့်သူရဲ့ စိတ်ကူးတွေကို သစ္စာခံမှာဖြစ်ပေမဲ့ အစွန်းမရောက်တဲ့သူတို့ရဲ့ နောက်ခံတွေကြောင့် သက်ဆိုင်ရာစျေးကွက်တွေအတွက်တော့ စိတ်သက် သာစရာအဖြစ်ရှိနေပါသေးတယ်။ ဒါဟာ Wall Street က ထရမ့်အပေါ် တွေးထင်ထားတဲ့စံနှုန်းနဲ့ သူ့ရဲ့ စီးပွားရေး အစီအစဥ်တွေကို သူ့ ဝိုင်းတော်သားတွေက ဟန်ချက်ညီညီ ဘယ်လိုထိန်းကျောင်း ပုံဖော် မလဲဆိုတဲ့ အချက်ပြမှုတစ်ခုလည်းဖြစ်ပါတယ်။

ခရစ်ဒစ်

ရေးသားသူ - Anthony Zurcher, Laura Blasey, James FitzGerald, Tom Geoghegan, Bernd Debusmann Jr, Natalie Sherman, Tom Bateman and Mike Wendling

ဒီဇိုင်း - Oliver Bothwell, François de Montremy and Jenny Law

တည်းဖြတ်/ထုတ်လုပ် - Tom Finn, Paul Sargeant and Dominic Bailey

ဓာတ်ပုံများ - Getty