သမ္မတနိုင်ငံထောင်ဖို့က သြစတြေးလျလူထုသဘောလို့ ချားလ်စ်ဘုရင်ပြော

သြစတြေးလျနိုင်ငံမှာ စည်းမျဉ်းခံဘုရင်စနစ် ဆက်ထားမလား၊ သမ္မတနိုင်ငံ ထူထောင်မလား ဆိုတာ နိုင်ငံသားတွေ ဆုံးဖြတ်ဖို့ ဖြစ်ကြောင်း တတိယ ချားလ်စ်ဘုရင်က အတည်ပြု ပြောကြားပါတယ်။

နောက်တပတ် သြစတြေးလျ သွားဖို့ ရှိတဲ့ ဘုရင့်ခရီးစဉ် မတိုင်မီ သြစတြေးလျ သမ္မတနိုင်ငံ လှုပ်ရှားမှု အဖွဲ့က ဘက်ကင်ဟမ်နန်းတော်နဲ့ စာအပြန်အလှန် ပို့ခဲ့ပါတယ်။

သြစတြေးလျ သမ္မတနိုင်ငံ ဖြစ်ဖို့ မဖြစ်ဖို့ ဆိုတာ နိုင်ငံသားတွေ ဆုံးဖြတ်ရမယ့် ကိစ္စဆိုပြီး နန်းတော်က ပို့တဲ့စာမှာ ပါရှိကြောင်း ဒေးလီးမေ သတင်းစာက ဖော်ထုတ်ပါတယ်။

သြစတြေးလျမှာ ဘုရင်စနစ် ဆက်ရှိမရှိဆိုတာ ချားလ်စ်ဘုရင်နဲ့ ကမီလာ မိဖုရားတို့ရဲ့ ခရီးစဉ်မှာ ပြောစရာ ကိစ္စ ဖြစ်လာနိုင်ပါတယ်။

ဆစ်ဒနီနဲ့ ကန်ဘာရာ မြို့တော်ကို သူတို့ သွားဖို့ ရှိပါတယ်။

နန်းတော် အရာရှိတွေဆီက လာတဲ့ စာဟာ သြစတြေးလျ စည်းမျဉ်းခံဘုရင်စနစ်နဲ့ ပတ်သက်ပြီး လက်ရှိ ရပ်တည်မှုကို ထပ်လောင်း ဖော်ပြတာသာ ဖြစ်ပြီး မူအသစ် ပြောင်းတာ မရှိပါဘူး။ ဒီစာမှာ ဘာတွေ ပါသေးလဲ ဆိုတာကိုလည်း ဘက်ကင်ဟမ်နန်းတော်က မထုတ်ပြန်ပါဘူး။

ဒါပေမဲ့လည်း ဒီလို သမ္မတနိုင်ငံ ထူထောင်ချင်တဲ့ အုပ်စုက ဘုရင့်ခရီးစဉ်အတွင်း တွေ့ဖို့ ခွင့်တောင်းရင်း စာအပြန်အလှန် ရေးကြတာက ရင်းရင်းနှီးနှီး ရှိလှပါတယ်။

ဘုရင်က သူ့ဆီ အချိန်ယူပြီး စာရေးလို့ ကျေးဇူးတင်ကြောင်းနဲ့ သူ့ကိုယ်စား စာပြန်ပေးဖို့ မိန့်ကြားကြောင်း ဘက်ကင်ဟမ်နန်းတော်ကနေ သြစတြေးလျ သမ္မတနိုင်ငံ လှုပ်ရှားမှုအဖွဲ့ဆီကို မတ်လက ရေးတဲ့စာမှာ ပါရှိပါတယ်။

သြစတြေးလျ သမ္မတနိုင်ငံဖြစ်ရေးကိစ္စ အမြင်တွေကို သေချာ မှတ်သားထားကြောင်းနဲ့ စည်းမျဉ်းခံ ဘုရင်တပါးအနေနဲ့ ချားလ်စ်ဘုရင်ဟာ ဝန်ကြီးတွေ အကြံပေးချက်ကို လိုက်နာဆောင်ရွက်သလို သြစတြေးလျ သမ္မတနိုင်ငံ ဖြစ်သင့် မဖြစ်သင့်က သူနိုင်ငံလူထုက ဆုံးဖြတ်ရမယ့် ကိစ္စဖြစ်တယ်ဆိုပြီး စာမှာ ပါရှိပါတယ်။

ဘုရင်နဲ့ မိဖုရားက သြစတြေးလျပြည်သူတွေကို လှိုက်လှိုက်လှဲလှဲ ချစ်ခင်မြတ်နိုးကြောင်းနဲ့ ဒီလို စာရေးတဲ့အတွက် ကျေးဇူးတင်ကြောင်းလည်း စာမှာ ပါရှိပါတယ်။

ဒီကိစ္စနဲ့ ပတ်သက်ပြီး သြစတြေးလျမှာ ၁၉၉၉ က ဆန္ဒခံယူပွဲ လုပ်ခဲ့ပြီး လူအများစုက စည်းမျဉ်းခံဘုရင်စနစ်ကို ဆက်ထားဖို့ မဲပေးဆုံးဖြတ်ခဲ့ကြပါတယ်။

ဒီနှစ်ဆန်းကလည်း နောက်ထပ် ဆန္ဒခံယူပွဲလုပ်ဖို့ ဦးစားပေး အစီအစဉ် မရှိကြောင်း သြစတြေးလျ အစိုးရက ပြောပါတယ်။

သြစတြေးလျ သမ္မတနိုင်ငံထူထောင်ရေး လှုပ်ရှားနေသူတွေကတော့ ဘုရင်မဖြစ်သင့်ဘဲ နိုင်ငံအကြီးအကဲဟာ နိုင်ငံသားတွေ ရွေးချယ်တဲ့သူပဲ ဖြစ်သင့်ကြောင်း စောဒက တက်ပါတယ်။

ချားလ်စ်ဘုရင် လာမယ်လို့ ကြေညာချိန်မှာ ဗြိတိသျှ ဘုရင်မိသားစုရဲ့ အခန်းကဏ္ဍကို လေးစားပေမယ့် သြစတြေးလျအနေနဲ့ နိုင်ငံအကြီးအကဲ တာဝန်ယူမယ့် ဒေသခံတယောက်ကို ရွေးကောက်ဖို့ အချိန်ကျပြီ ဆိုပြီး သြစတြေးလျ သမ္မတနိုင်ငံ လှုပ်ရှားမှုက အိုင်းဆက် ဂျက်ဖရီက ပြောပါတယ်။ သြစတြေးလျအတွက် အချိန်ပြည့် လုပ်နိုင်သူ ဖြစ်ရမယ်လို့လည်း ဆိုပါတယ်။

ချားလ်စ်ဘုရင်ကို ပုဂ္ဂိုလ်ရေးအရ လေးစားပေမယ့် သြစတြေးလျမှာ ဗြိတိသျှ မင်းမျိုးတွေရဲ့ အရေးပါမှုကို ဆန့်ကျင်တဲ့ လှုပ်ရှားမှုလည်း ဖြစ်ပါတယ်။

ချားလ်စ်ဘုရင်ရဲ့ သြစတြေးလျခရီးဟာ ဒီနှစ်ဆန်းက သူ ကင်ဆာရောဂါ တွေ့ရှိပြီးနောက်ပိုင်း ခရီးစဉ်ကြီးအနေနဲ့ သွားရောက်တာ ဖြစ်ပါတယ်။ ဒီနှစ်ထဲ သူသွားတဲ့ နိုင်ငံခြား ခရီးဆိုလို့လည်း ပြင်သစ်ကို ဒီဒေးနေ့ အနှစ် ၈၀ ပြည့် အခမ်းအနားတက်ဖို့ သွားတာပဲ ရှိပါတယ်။

ဒီခရီးစဉ်အတွင်း ဘုရင့်ရောဂါကုသမှုတွေ နားထားမယ်လို့ ယူဆရပါတယ်။ သြစတြေးလျကအပြန် ဆာမိုဝါကျွန်းကို ဝင်ပြီး ဓနဿဟာယနိုင်ငံ ခေါင်းဆောင်များ အစည်းအဝေးကို တက်ဖို့လည်း ရှိပါတယ်။

အောက်တိုဘာလ ၁၈ ရက်ကနေ ၂၆ ရက်အတွင်း ခရီးစဉ်အတွင်း ဆစ်ဒနီဆိပ်ကမ်းမှာ သြစတြေးလျ ရေတပ်သင်္ဘောစုကြီးကို စစ်ဆေးဖို့လည်း ရှိပါတယ်။ နောက်ပြီး ဒေသခံတွေနဲ့ အသားကင် စားတာ၊ ပတ်ဝန်းကျင် ထိန်းသိမ်းရေး စီမံချက်တွေကို အားပေးတာ၊ ထင်ရှားတဲ့ ကင်ဆာရောဂါဆရာဝန်ကြီး နှစ်ယောက်နဲ့ တွေ့တာတွေ ပါပါတယ်။

ဒီဇင်ဘာလမှာ ကာတာဘုရင် ဗြိတိန်ကို နှစ်ရက်ကြာ နိုင်ငံတော် အလည်အပတ် လာရောက်ဖို့ ချားလ်စ်ဘုရင်က ဖိတ်ကြားတယ်လို့လည်း ဒီအပတ်ထဲမှာပဲ ကြေညာခဲ့ပါတယ်။