အိုလက်ဆန်ဒါဘတ်- စစ်ပွဲမှာခြေထောက်တွေဆုံးရှုံးခဲ့ပေမဲ့ ယူကရိန်းပျိုမေတို့ရဲ့အသည်းစွဲဖြစ်လာသူ

အသက် ၂၆ နှစ်အရွယ် အိုလက်ဆန်ဒါဘတ်ကိုဟာ လက်နက်ကြီးကျည်ပေါက်ကွဲမှုအတွင်း ခြေထောက်နှစ်ဖက်စလုံးဆုံးရှုံးခဲ့ရလို့ ပြင်းထန်တဲ့နာကျင်မှုတွေကြောင့် အရှင်လတ်လတ် ငရဲကျနေသလို ခံစားခဲ့ရပါတယ်။

ယူကရိန်းစစ်သားတစ်ဦးဖြစ်တဲ့ အိုလက်ဆန်ဒါက ၂၀၂၂ ဩဂုတ်လတုန်းက ယူကရိန်းအရှေ့မြောက်ဘက် ကိယက်ဗ်ခရိုင်ထဲ က ယူကရိန်းတပ် တိုက်ခိုက်ခံရတဲ့အချိန် ကျူးကျော်ဝင်ရောက်လာတဲ့ ရုရှားတပ်တွေကို တန်ပြန်ခုခံခဲ့တာဖြစ်ပါတယ်။

နှစ်နှစ်ကြာပြီးတဲ့နောက်မှာတော့ သူဟာ နှုတ်ခမ်းနီမလေးတွေရဲ့ အသည်းစွဲဖြစ်နေသလို သူ့ရဲ့အချစ်ကိုရဖို့ အပြိုင်အဆိုင်လုရတဲ့ ရုပ်သံအစီအစဉ်တစ်ခုရဲ့ ကြယ်ပွင့်ဖြစ်လာပါတယ်။

အမေရိကန်ရဲ့အောင်မြင်ကျော်ကြားတဲ့စီးရီး The Bachlor လိုမျိုး ယူကရိန်းမှာ ပြသတဲ့ ရုပ်သံဇာတ်လမ်းရဲ့ကြော်ငြာတစ်ခုမှာတော့ စမတ်ကျကျဝတ်စားထားတဲ့ အိုလက်ဆန်ဒါက ပန်းတစ်ပွင့်ကို တရှိုက်မက်မက် စိုက်ကြည့်နေခဲ့ပါတယ်။

နောက်ကြော်ငြာတစ်ခုမှာတော့ အားကစားခန်းမ (Gym) တစ်ခုမှာတော့ သူရဲ့ လေ့ကျင့်မှုတွေမစခင်မှာပဲ စစ်ဝတ်စုံဝတ်ပြီး မေးခွန်းတွေကိုဖြေဆိုနေပါတယ်။

ကိယက်ဗ်မြို့ရဲ့ နှင်းဆီဥယျာဉ်ကြီးထဲမှာ ဘီဘီစီသတင်းထောက်နဲ့ တွေ့ဆုံခဲ့တဲ့အချိန် နာမည်ကျော် အိုလက်ဆန်ဒါတစ်ယောက်ဟာ တစ်ပတ်တာ အလုပ်အချိန်ဇယားတွေပြီးတဲ့နောက် ပင်ပန်းနေပေမယ့်လည်း ပျူပျူငှာငှာနဲ့ ပြောဆိုဆက်ဆံပေးခဲ့ပါတယ်။

အိုလက်ဆန်ဒါက ပြီးခဲ့တဲ့ ဇန်နဝါရီလမှာ သူ့ရဲ့ချစ်သူကောင်မလေးနဲ့ လမ်းခွဲခဲ့တယ်လို့ပြောပြပါတယ်။ သူ့အနေနဲ့ တီဗီရှိုးကနေ အချစ်စစ်ကို ရှာတွေ့ဖို့ မျှော်လင့်ထားကြောင်းနဲ့ ကြည့်ရှုသူသန်းပေါင်းများစွာ စောင့်ကြည့်နေတဲ့ရှိုးကနေ လက်တွဲဖော်ကိုရွေးချယ်ဖို့ဆိုတာကလည်း ခက်ခဲနိုင်တယ်လို့ သူကမှတ်ချက်ပြုပါတယ်။

သူ့ရဲ့ စိတ်အားထက်သန်မှုက အချစ်ရေးအတွက်ပဲမဟုတ်ပါဘူး။ သူက တီဗီရှိုးမှာ သူ့ရဲ့ပုံရိပ်ကိုကောင်းကောင်းအသုံးချပြီး အဲဒီကနေ မသန်စွမ်း ယူကရိန်းနိုင်ငံသားတွေ ရင်ဆိုင်ဖြတ်သန်းနေရတဲ့ စိန်ခေါ်မှုတွေကို ကမ္ဘာကသတိထားမိလာအောင်လုပ်တဲ့သဘောပါပဲ။

“လူသန်းပေါင်းများစွာကြည့်တဲ့ ဒီရှိုးက ကျွန်တော်တို့အပေါ် ကောင်းတဲ့အမြင်တွေပဲ ဖြစ်လာအောင်လုပ်နိုင်တဲ့ ကြီးမားတဲ့အခွင့်အရေးတစ်ခုပဲ” လို့ အိုလက်ဆန်ဒါကပြောပါတယ်။

ဒဏ်ရာရပြီး မသန်စွမ်းဖြစ်သွားတဲ့ စစ်ပြန်တွေကလည်း “အပြင်လူ”တွေမဟုတ်ဘဲ ကောင်းကောင်းမွန်မွန်နေထိုင်နေကြတဲ့ လူ့အဖွဲ့အစည်းထဲက လူတွေနဲ့တန်းတူပဲဆိုတာကို သူက သက်သေပြချင်နေပါတယ်။

“ငါ့အတွက်တော့ ဒီအခြေအနေက စစ်ပွဲကြီးမစခင်၊ ငါ့ခြေထောက်တွေမဆုံးရှုံးခင်အချိန်ကထက်ကို ပိုပြီးကျေနပ်စရာကောင်းပါတယ်” လို့ သူက ဆက်ပြောခဲ့ပါတယ်။

အိုလက်ဆန်ဒါက အမြဲလိုလို တက်ကြွနေတဲ့လူဖြစ်ပြီး မနေ့ညကလည်း သီချင်းဗီဒီယိုတစ်ခုရိုက်နေရင်းနဲ့ပဲ အချိန်ကုန်ဆုံးခဲ့တာလို့ သူကပြောပြပါတယ်။

သူ့ဘဝက အရင်ကတော့ ဒီလိုမထင်ရှားခဲ့ပါဘူး။ ရုရှားဘက်က စစ်မကျူးကျော်ခင်နှစ်တွေမှာ သူက ဂရပ်ဖစ်ဒီဇိုင်းပညာရပ်ကို လေ့လာရင်း ကိယက်ဗ်က စားသောက်ဆိုင်တစ်ဆိုင်မှာ အဖျော်ဆရာတစ်ယောက်အဖြစ် လုပ်ကိုင်နေခဲ့တာပါ။

သူ့စိတ်ကူးအိပ်မက်တွေဟာ စိတ်ကူးယဉ်မဆန်ဘဲ လက်တွေ့နဲ့နီးတယ်လို့ပြောခဲ့ပါတယ်။ ခရီးသွားတာ၊ ကမ္ဘာကြီးကိုခြေဆန့်ရင်း ပရော်ဖက်ရှင်နယ်ကျကျ အသက်ကြီးရင့်သွားချင်တာလို့ သူက ပြောခဲ့ပါတယ်။ သူက ကိုယ်ပိုင်မိသားစုရှိတဲ့ ဘဝလေးကိုလည်း တောင့်တနေခဲ့သူပါ။

ဒါပေမဲ့ အိုလက်ဆန်ဒါဟာ ပြီးခဲ့တဲ့ ၂ နှစ်က စစ်တပ်ထဲဝင်ဖို့ ယူကရိန်းတပ်သား ထောင်ပေါင်းများစွာထဲက တစ်ယောက်ဖြစ်လာခဲ့ချိန်မှာတော့ အိုလက်ဆန်ဒါရဲ့ ဘဝက လုံးဝကို ဇောက်ထိုးမိုးမျှော်ဖြစ်ခဲ့ရပါတယ်။

၂၀၂၂ ခုနှစ် ဩဂုတ်လမှာ အိုလက်ဆန်ဒါက ရုရှားရဲ့ ရှေ့တန်းစစ်မျက်နှာပြင်က သိမ်းပိုက်ထားတဲ့ အီဇီယမ်မြို့အနီးမှာ တပ်စွဲခဲ့ပါတယ်။ အီဇီယမ်မြို့ကို ရုရှားဘက်က စစ်ပွဲရဲ့ အစောပိုင်းကာလတွေမှာ ကျူးကျော်ဝင်ရောက်ခဲ့ပြီး အရှေ့ဘက်ခြမ်းက တပ်ဖွဲ့တွေကို ထောက်ပံ့ဖို့ စစ်ရေးအရ အရေးပါတဲ့အချက်အချာနေရာတစ်ခုလို့ ရုရှားက ယူဆပြီး တပ်စွဲထိန်းချုပ်ခဲ့ပါတယ်။

အိုလက်ဆန်ဒါကလည်း မြို့အနီးက ယူကရိန်းတပ်စွဲထားတဲ့နေရာ မကျအောင်ကာကွယ်ရင်း ဒဏ်ရာအပြင်းအထန်ရရှိခဲ့ပါတယ်။ တစ်လအကြာမှာတော့ အီဇီယမ်မြို့ကို ယူကရိန်းဘက်က ပြန်ထိန်းချုပ်နိုင်ခဲ့ပါတယ်။

“မြေမျိုသွားသလို ခံစားလိုက်ရတယ်။ ကျွန်တော့် ခြေထောက်တွေ သေမတတ်နာကျင်နေခဲ့သလို ခြေထောက် ၂ ဖက်စလုံးဖြတ်ပစ်ရမယ်ဆိုတာကိုလည်း သိလိုက်တယ်” လို့ သူက ဖွင့်ဟခဲ့ပါတယ်။

“နာကျင်မှုဒဏ်ကြောင့် အာခေါင်ခြစ်မတတ်အော်နေရတဲ့အချိန်ပေါ့။ လူတွေကိုလည်းလာကယ်ဖို့ ကျွန်တော် အော်ဟစ်ပြီးခေါ်ခဲ့ပါတယ်” လို့ သူက ဆက်ပြောပါတယ်။

အိုလက်ဆန်ဒါကို အသက်ရှင်ကျန်နေသေးတဲ့ သူ့ရဲဘော်တွေကပဲ မြေကြီးထဲကနေ အပေါ်မတင်ထုတ်ခဲ့ပြီး ရှေးဦးသူနာပြုစုနည်းနဲ့ အသက်ကယ်ခဲ့တာလို့ဆိုပါတယ်။ အဲဒီအချိန်မှာပဲ သူ့ခြေထောက် ၂ ဖက်စလုံး အခြေအနေမကောင်းနိုင်တော့ဘူးဆိုတာကို သူသိလိုက်ရတယ်လို့ ရင်ဖွင့်ခဲ့ပါတယ်။

“ပေါက်ကွဲပြီး ထိသွားတဲ့အချိန်မှာပဲ‌ ခြေထောက်၂ဖက်စလုံးဆုံးရှုံးလိုက်ရပြီဆိုတာကို သိခဲ့ပါတယ်၊ ၂ စက္ကန့် ၃ စက္ကန့်လောက်ကြာမှ နာကျင်မှုက ပေါ်လာတာ” လို့ သူက ရှင်းပြခဲ့တာပါ။

အိုလက်ဆန်ဒါက စစ်ပွဲကနေ အသက်ရှင်လွတ်မြောက်ခဲ့ပေမယ့် အီဇီယမ်မြို့ကတော့ မြို့ပျက်ကြီးသဖွယ် အပျက်အစီးတွေနဲ့ ပြည့်နှက်နေခဲ့ပါတယ်။ တစ်ချိန်တည်းမှာပဲ အာဏာပိုင်တွေက မြို့အနီးက သင်္ချိုင်းတွေမှာ ရုပ်အလောင်း ၄၀၀ ကျော် တွေ့ရှိခဲ့တယ်လို့ ထုတ်ပြန်ခဲ့ပါတယ်။

ဒဏ်ရာတွေကို ခက်ခက်ခဲခဲနဲ့ ကုစားခဲ့ရပေမယ့် အိုလက်ဆန်ဒါက ၆လအတွင်း ခြေအတုတွေနဲ့ လမ်းလျှောက်နိုင်ခဲ့ပါတယ်။

“ကျွန်တော့်မှာ ခြေတုတွေမရှိခင်တုန်းက ဝှီးချဲ (ဘီးတပ်ကုလားထိုင်)နဲ့ပဲ လှည့်ပတ်ခဲ့ရတယ်။ မြို့တော် ကိယက်ဗ်က လူများလွန်းတာကြောင့် ဝှီးချဲအသုံးပြုသူတွေအတွက် သွားလာရခက်ခဲသလို ရေရှည်မှာ ဘယ်လိုမှအဆင်ပြေနိုင်ဘူးဆိုတာ သိလိုက်ရတယ်” လို့ သူက ရှင်းပြပါတယ်။

“သမိုင်းဝင်မြို့ဟောင်းနေရာဆိုရင် ဘယ်ကိုမှသွားမရဘူး။ လမ်းလေးဖြတ်ကူးတာတောင် ကိုယ်တိုင်ကူးလို့မရသလို နေရာတိုင်းမှာ လှေကားထစ်တွေနဲ့မို့ အဆောက်အဦထဲဝင်လို့မရဘူး” လို့ သူက ထပ်ပြောခဲ့ပါတယ်။

ယူကရိန်းစစ်ပွဲမှာ အိုလက်ဆန်ဒါလိုမျိုး ဒဏ်ရာအပြင်းအထန်ရတာတွေက ပိုပိုပြီးများလာပါတယ်။ စစ်ပွဲအတွင်း ဒဏ်ရာရတဲ့သူအရေအတွက်ကို တရားဝင်ထုတ်ပြန်ထားတာမရှိပေမယ့် သောင်းနဲ့ချီတဲ့လူတွေရဲ့ ခြေလက်အင်္ဂါတွေ ဆုံးရှုံးနိုင်တယ်လို့ ခန့်မှန်းထားကြပါတယ်။

တစ်ဖက်မှာလည်း ဒီဖြစ်ရပ်အမှန်အခြေအနေတွေကို “ခြေထောက်ကင်းမဲ့ဇုန်” ဆိုတဲ့ ခေါင်းစဉ်နဲ့ အိုလက်ဆန်ဒါတင်ဆက်ခဲ့တဲ့ တီဗီရှိုးတစ်ခုဟာ မသန်စွမ်းဖြစ်သွားတဲ့လူတွေ ယူကရိန်းမြို့ထဲ ပြောင်းရွှေ့နေထိုင်ရင်း အခက်အခဲတွေနဲ့ ရင်ဆိုင်ကြုံတွေ့နေရတဲ့ဘဝတွေကို မီးမောင်းထိုးပြလိုက်သလိုပါပဲ။

တီဗီရှိုးတင်ဆက်တာတင်မကဘဲ အိုလက်ဟာ စာအုပ်ရေးတာအပြင် နာမကျန်းဖြစ်နေတဲ့ စစ်သားတွေနဲ့ စစ်မှုထမ်းဟောင်းတွေသာ ပါဝင်ယှဉ်ပြိုင်ကြတဲ့ “Invictus” ဂိမ်းတွေမှာလည်း ဆုတံဆိပ်တွေရရှိခဲ့သလို အမေရိကန်မှာရှိတဲ့ ဘဲလေးအကအဖွဲ့နဲ့လည်း အတူဖျော်ဖြေခဲ့ပါတယ်။ သူ့ရဲ့ ခြေထောက်ဒဏ်ရာတွေ သက်သာကောင်းမွန်ချိန်မှာပဲ သူဒီလိုပြန်ပြီး ပါဝင်ရပ်တည်ခဲ့တာပါ။

ယူကရိန်းမှာ အိုလက် အရမ်းရေပန်းစားနေချိန် ဘတ်ချလာ (The Bachelor) တီဗီရှိုးရဲ့ လာမယ့်ရာသီမှာ အိုလက်ဆန်ဒါတစ်ယောက် အဓိကအခန်းကဏ္ဍကနေ ပါဝင်သွားဖို့ လျှောက်လွှာတင်ထားတဲ့အကြောင်း ကြေညာပြီးနောက်မှာပဲ ဘတ်ချလာရဲ့ အွန်လိုင်းဝက်ဘ်ပေါ် လူအများအပြား ဝင်ရောက်ကြည့်ရှုခဲ့ကြပါတယ်။

ဘတ်ချလာရဲ့ ထုတ်လုပ်သူတွေကလည်း စစ်မှုထမ်းဟောင်းတွေအတွက် မျှော်လင့်ချက်သင်္ကေတပြယုဂ်အဖြစ် အိုလက်ကို ရွေးချယ်ခဲ့ကြပါတယ်။

“ခြေထောက်၂ ဖက်စလုံး ဖြတ်တောက်ခဲ့ရပေမယ့်လည်း အိုလက်ဆန်ဒါက စက်ဘီးစီး၊ ကားတွေမောင်းခဲ့သလို တောင်တွေလည်းတက်ခဲ့ပါတယ်။

သူက “ဘဝမှာ လုပ်ချင်တာတွေအားလုံးလုပ်ပြီး နေထိုင်သွားမှာပါ” လို့ အိုလက်ဆန်ဒါအကြောင်း ဒီနှစ်ကုန်ပိုင်းမှာ ထုတ်လွှင့်ပြသမယ့် အက်စ်တီဗီရှိုးရဲ့ တာဝန်ရှိသူ နတ်တလီယာ ဖရန်ချက်ခ် ကလည်း ပြောထားပါတယ်။

“တကယ်လို့ ရုပ်မြင်သံကြားဆိုတာက တကယ့်ဖြစ်ရပ်မှန်တွေကို ရိုက်ကူးတာဆိုရင် အခုဘတ်ချလာရှိုးရဲ့ ကြယ်ပွင့်က ဘယ်သူဖြစ်မလဲ။ စစ်ဖြစ်နေတဲ့တိုင်းပြည်က ရုန်းကန်ထွက်လာတဲ့သူထက် ဘယ်သူကများပိုပြီးသင့်တော်နိုင်မှာလဲ”