Siifan Hasan Atileetii cimtuu dubartii Awurooppaa bara kanaa jedhamte
Madda suuraa, European Athletics twitter
Atileetiin Neezarlaand dhalattuu Itoophiyaa taate Siifan Hasan, Olompiikii Tookiyoo ji’oota muraasaan dura adeemsifame irratti meedaaliyaa sadii argatteetti.
Gama biraan immoo atileetii Noorweey fiigicha gufachiisaa meetira 400 Olompiikii irratti rekardii waggaa 29 kan cabse Karsten Warholm atileetii dhiiraa filatamaa Awurooppaa bara kanaa taheera.
Atileetiksiin Awurooppaa tiwiitarii isaarratti akka ibsetti, Atileet Siifan Hasan wal-dorgommii Olompiikii Tookiyoo irratti fiigicha meetira 5000 fi 10,000 ‘nin warqii argachuufi dorgommii FBK Hengaloo Neezarlaanditti taasifameen riikardii meetira 10,000 cabsuun kan isheen atileetii bara kanaa Awurooppaa tahuun filatamte.
Siifan Hasan olompikii tokko irrattii gosa dorgommii fiigichaa sadiin medaaliyaa argachuun seenaa arma dura atileetonni kaan dalagan qooddachuu dandesseetti.
Atileetiin kun Olompiikii Tookiyoo irratti gosoota fiigichaa sadiin kan dorgomte yoo ta'u sadaniinuu meedaaliyaa injifatteetti.
Fiigichi meetira 5000 gulaallii marsaa tokko, kan meetira 1500 ammoo gulaallii marsaa lama qaba. Siifan walumaagalatti Olompikii Tookiyoo irratti meetira 24,500 fiigde.
Akka ''silaa Siifan Hasan Olimpiika baranaa akka garee biyya tokkootti otoo galteetti tahe, gabatee medaaliyaa atileetiksii 11ffaa tahuun xumurti turte.''
Shaampiyoon Atileetiksii Addunyaa bara 2019tti dorgomameenis meetira 1500 fi 10,000 irratti warqii mo’achuun atileetii dhiiraanis dubaraanis ishee jalqabaa taateetti.
Madda atileetota bebbeekamoo Arsiitti kan dhalatte Atileet Siifan Hasan, umurii waggaa 13 osoo jirtuu bara 2008 koolugaltuummaan gara Daach kan imalte yoo tahu, bara 2013 lammummaa biyya Neezarlaand argatteetti
