Atileetonni Tigraay matii isaanii akka argan Daraartuu Tulluu tumsa gaafatte

Atileetonni Tigraay Shaampiyoonaa Atileetiksii Addunyaa 18ffaa irratti biyyaaf injifannoo argamsiisan maatii isaanii arguu akka danda'an tumsi akka godhamuuf Daraartuu Tulluu gaafatte.

Itoophiyaan Shaampiyoonaa Atileetiksii Addunyaa bara kanaa Ameerikaa Oregoonitti taasifame irratti warqee 4 meetii 4 fi nahaasa 2 walumaagalatti meedaaliya 10 argachuun Ameerikaatti aantee sadarkaa lammataan xumurte.

Seenaa dorgommichaa keessatti Itoophiyaan qabxii olaanaa akkanaa yoo argattu kun yeroo jalqabaatiifi.

Atileetonni dorgommii kanarratti hirmaatan Kamisa gara biyyaa yoo deebi'an simannaan ho'aan taasifameefi jira.

Sirna simannaa masaraa biyyaalessaa guddichatti bakka pireezidantiin biyyattii Aadde Saahilawarq Zawudee fi aanga'oonni kaan jiranitti godhameef irratti "atileetonni Tigraay hiree maatii isaanii dubbisuu hin arganne" jechuun Daraartuun kan dubbatte.

Warqee Itoophiyaan argatte afur keessa sadi kan fidan atileetota dhalattoota Tigraay ta'anidha.

Atileetonni kunneen maatii isaanii arguu akka danda'an bulchiinsi Tigraay akkasumas mootummaan federaalaa haala akka mijeessan gaafatte.

Pireezidantiin Federeeshinii Atileetiksii Itoophiyaa koloneel Daraartuu Tulluu atileetonni Tigraayitti hafan dorgommii itti aanurrattu hirmaachuu akka danda'an haalli akka mijatuufis gaafatte.

"Gammachuun keenya guutuu akka ta'u, dorgommii itti aanuufis ofitti amanamummaa guutuun akka hiriirru, atileetonni Tigraay jiran kaan achumatti akka shaakala eegalan, kaan ammoo akka as dhufan mootummaan karaa akka banu..." jechuun gaafatte.

Naannoo Tigraay waraana baatilee 20f mootummaa federaalaa fi TPLF jidduutti adeemaa jiruun guutummaatti Itoophiyaan gargar cittee jirti. Geejjibni akkasumas tajaajilawwan bu'uuraa akka ibsaafi komunikeeshinii adda citee jira.

Milkaa'ina Shaampiyoonaa Atileetiksii Addunyaa 18ffaa irratti argameen wal-qabatee hoggansa kenniteen hedduu jajamaa kan jirtu koloneel Daraartuu Tulluu, qabxii argametti akka boontu dubbatte.

Haata'u malee dorgommiin kana caalaa cimaan akka isaan eeggatu atileetotaa fi leenjistoota isaanii hubachiifte.

Meedaaliyaa Itoophiyaan argatte:

Warqee

Meetii

Nahaasa