Modakeke killings: Ilé iṣé ọlọ́pàá rọ àwọn akọ̀ròyìn láti lépa àlááfíà lórí ìṣẹ̀lẹ̀ ìṣekúpani nílùú Modakeke

Ile iṣẹ ọlọpaa ipinlẹ Osun ti rọ awọn akọroyin lati sọ otitọ lori iṣẹlẹ iṣekupani eeyan marun un to waye lọjọ Ẹti to lọ niluu Modakeke.

Alukoro ile iṣẹ ọlọpaa ipinlẹ Osun, Yemisi Opalola lo sọrọ yii fawọn akọroyin lalẹ ọjọ Abamẹta.

Opalola ni alaafia ni ipinlẹ Osun nilo lọwọ yii kii ṣe rogbodiyan.

''A gbọdọ huwa gẹgẹ bi ọmọluabi lẹnu iṣẹ wa lai ṣegbe lẹyin ẹnikan.

Bakan naa a ni lati fi ifẹ han si ilẹ wa papaa julọ ti a ba n jabọ iroyin to niiṣe pẹlu ẹlẹyamẹya tabi ọrọ oṣelu to le di wahala.

Ẹ jẹ ki a ranti pe ọmọ Oduduwa ni gbogbo wa, ẹ ma jẹ ka da epo si ina to n jo.

Mo fẹ fi da yin loju pe ko si ohun to jọ ija Ife ati Modakeke ninu ọrọ to wa nilẹ yii.

Nitori naa, ẹ jẹ ki a gba alaafia laaye lẹnu iṣẹ wa ki a maa da omi alaafia ru nipinlẹ Osun.

Ẹwẹ, ijọba ipinlẹ Ọṣun ti kọkọ ke sawọn eeyan agbegbe Ifẹ ati Mọdakẹkẹ lati maṣe fi aye gba awọn kọlọrọsi janduku laarin wọn lati da wahala silẹ nibẹ.

Gomina ipinlẹ Ọṣun, Gboyega Oyetọla funrarẹ ti pe Ọọni ti ilu ile Ifẹ, Ọba Ẹnita Adeyẹye Ogunwusi, Ọjaja keji ati Ogunṣua ti ilu Mọdakẹkẹ, Ọba Moses Oyediran Ọladẹjọ ti awọn mejeeji si ti fi daa loju pe omi alaafia laarin ilu mejeeji yii yoo pada toro.

Bakan naa ni ileeṣẹ ọlọpaa ni ipinlẹ Ọsun pẹlu ti ṣalaye pe igbesẹ ipana aawọ ti nlọ lọwọ lati ọjọ Ẹti ti iṣẹlẹ naa ti ṣẹlẹ.

Kọmiṣọnna ọlọpaa ni ipinlẹ Ọṣun, Ọlawale Olokode ni awọn iroyin kan ti tu si ileeṣẹ ọlọpaa lọwọ ti yoo ṣe okunfa mimu awọn oniṣẹ ibi naa ni kiakia.