Igboho Ultimatum to Fulani: Ẹni bá mọ Sunday Igboho kó bá wa bẹ̀ẹ́ o, a ò mọ ibi tí a lè kó lọ, Seriki Fulani pariwo síta

Kini yoo ṣẹlẹ?

Ibeere ti ọpọ n beere lasiko yii ni yi.

Nitori pe o ku bii wakati diẹ si asiko ti gbendeke ọjọ meje ti eekan ọmọ Yoruba ni, Oloye Sunday Adeyẹmọ ti ọpọ mọ si Sunday Igboho fun awọn Fulani lagbegbe Ibarapa yoo pe.

Sẹriki Fulani ipinlẹ Ọyọ, Alhaji Abdulkadir ti ke gbajare sita pe ẹnikẹni to ba mọ Oloye Sunday Igboho ko ba awọn rawọ ẹbẹ sii ni nitori pe ko si ibi ti awọn lee ko lọ bayii mọ lẹyin aadọta ọdun.

Alhaji Abdulkadir to ba BBC News Yoruba sọrọ ṣalaye pe gbogbo ibi to yẹ lawọn n sa kaakiri lọ bayii lati wa ọna abayọ si ọrọ naa.

O ni lootọ ijọba n fi awọn lọkan balẹ pe Sunday Igboho ko ni lee ṣe ohun to wi sibẹ gbogbo awọn eeyan to ba mọọ lawọn n bẹ bayii ki wọn ba awọn pẹtu sii ninu ki wọn si le joko sọrọ naa ni itubi inubi.

Alhaji Abdulkadir to ni bi awọn aletilapa darandaran to sọ ara wọn di darandaran naa ṣe n ṣọṣẹ fun awọn ọmọ onilẹ lagbegbe naa ni wọn n ṣọṣẹ fun awọn gan an pẹlu to jẹ Fulani to tẹdo si agbegbe naa.

Seriki ni awọn ti kan sawọn agbofinro, awọn si ti kan sawọn ọbalaye lagbegbe Ibarapa lati lee wojutu si ọrọ naa to si jẹ pe wọn n fi awọn lọkan balẹ ni pe yoo lojutu laipẹ.

O ni awọn ko palẹ ẹru kankan mọ nibẹ nitori awọn ko tilẹ mọ ibi ti awọn lee dorikọ nitori pe agbegbe naa ni gbogbo awọn mọ ni ile lẹyin ti ọpọ wọn ti gbe nibẹ fun ọpọlọpọ ọdun.

Igboho, Ará ìlú ni ẹ, òó kí ń ṣe ìjọba, lọ ní sùúrù- Afenifere

Ẹgbẹ ọmọ Yoruba, Afenifere ti sọrọ lori aṣẹ ọlọjọ meje ti Oloye Sunday Adeyẹmọ fun awọn Fulani ni Oke Ogun nipinlẹ Oyo.

Ogbeni Yinka Odumakin ti o jẹ Akọwe ipolongo ẹgbẹ naa, salaye ninu ifọrọwanilẹnuwo pẹlu BBC Yoruba pe nitootọ ni ohun to n ṣẹlẹ ni Oyo n banilọkan jẹ.

O ni sibẹ Sunday Igboho kii ṣe gomina, bẹẹ ko si ninu ijọba bikoṣe ogidi ara ilu.

Ati pe gẹgẹ bii ara ilu, iwe ofin Naijiria ko faaye gba a lati paṣẹ kuro nilu fun ẹlomiran.

Odumakin ni gomina Makinde nikan lo lagbara lati paṣẹ bẹẹ gẹgẹ bi gomina Akeredolu ṣe se ni ipinlẹ Ondo.

Odumakin ni ẹgbẹ Afenifẹre ti parọwa fun Sunday Igboho lati ni suuru ki iran Yoruba fi le pa amukuru pẹlẹ ọrọ awọn Fulani ajinigbe yii.

O ṣalaye pe Gomina Makinde lo ni agbara lori eto aabo ipinlẹ rẹ.

O ni: " Ati pe iran Yoruba maa n bọwọ fun ofin " Federalism" ti a n practice ni eyi to fun Makinde lagbara lati daabo bo ara ipinlẹ rẹ"

Ǹkankan kò gbọdọ̀ ṣe Sunday Igboho - Àwọn ọ̀dọ́ Ibarapa sí Makinde, Buhari:

Àwọn ọ̀dọ́ Ibarapa kìlọ̀ fún Makinde, Buhari lórí gbèndéke tí Igboho fún àwọn Fulani

Ẹgbẹ awọn ọdọ agbegbe Ibarapa labẹ asia Ibarapa youths consultative Forum ( IYCF ) ti kilọ fun aarẹ Muhammadu Buhari ati ijọba ipinlẹ Oyo lati sọra ṣe lori ọrọ Oloye Sunday Igboho.

Ninu atẹjade ti wọn fi lede ni wọn ti sọ fun Gomina Makinde wi pe nkankan ko gbọdọ ṣe Igboho, lẹyin to fun awọn Fulani to wa ni agbegbe Ibarapa ni ọjọ meje lati kuro ni agbegbe naa.

Igboho ni tori ijinigbe ojoojumọ to n waye ni agbegbe naa ni o mu ki oun gbe iru igbesẹ bẹẹ.

Ati wi pe awọn Fulani bẹrẹ si ni jo ile ni agbegbe Igangan ni ipinlẹ Oyo, lẹyin ti Igboho ṣe ibẹwo si Sheriki awọn Fulani ni agbegbe naa, ti ọpọlọpọ ọdọ to jẹ Yoruba si farapa.

Ẹgbẹ Ibarapa Youth ninu ọrọ wọn sọ wi pe awọn wa lẹyin ọrọ ti Igbohọ sọ.

Ati wi pe ko si ọmọ Yoruba ododo ti yoo ri bi awọn Fulani ṣe dana sun ile, ti yoo si gboju kuro nibẹ.

Wọn fẹsun kan awọn Fulani darandaran lagbegbe naa wi pe awọn ni wọn n pa eniyan, ti wọn ji awọn eniyan gbe, ti wọn si n hu iwa ọdaran lagbegbe naa.

Gbendeke ti Igboho fun awọn Fulani naa ti da ọpọlọpọ rogbodiyan silẹ ni ipinlẹ Oyo, ti awọn Fulani ni agbegbe Ibarapa si ni awọn ko ni ibi kankan n lọ.

Ni ọjọ Satide, ọjọ Kẹrindinlogun, oṣu kinni, ọdun 2021 ni iroyin jade lori ayelujara pe eekan ajafẹtọ Yoruba kan, Oloye Sunday Adeniyi ti ọpọ mọ si Sunday Igboho fun awọn Fulani ni gbendeke ọjọ meje lati fi ilẹ Yoruba silẹ.

Amọ,Gómìnà ipinlẹ Oyo, Seyi Makinde ní ìjọba kò sí lẹ́yìn Sunday Igboho lórí gbèǹdéke tó fún àwọn Fulani, to si paṣẹ fun àwọn ọlọ́pàá lati ṣe iwádìí rẹ̀.

Sunday Igboho fún Fulani Oyo ní gbèǹdéke, Seriki fulani yarí, ọlọ́pàá dá síi...

Wo ohun tí a mọ̀ nípa gbèdéke ti Sunday Igboho fún àwọn Fulani ní Ibarapa àti èsì tí wọ́n fún un

Ni ọjọ Satide, ọjọ Kẹrindinlogun, oṣu kinni, ọdun 2021 ni iroyin jade lori ayelujara pe eekan ajafẹtọ Yoruba kan, Oloye Sunday Adeniyi ti ọpọ mọ si Sunday Igboho fun awọn Fulani ni gbendeke ọjọ meje lati fi ilẹ Yoruba silẹ.

Gẹgẹ bi fidio to gba ori ayelujara kan naa ṣe fihan, Sunday Igboho wọ inu awọn Gaa Fulani kan lọ lagbegbe Ibarapa nibi ti o ti fun awọn Fulani to wa nibẹ ni gbendeke ọjọ meje eleyi ti yoo pari ni ọjọ kejilelogun, oṣu kini, ọdun 2021 lati fi ilẹ naa silẹ.

O ni eyi ko ṣẹyin bi "awọn eeyan ilẹ Yoruba ṣe ni awọn ko fẹ wọn"

Ọrọ yii ti da oniruuru ọrọ silẹ laarin awọn olugbe ipinlẹ Ọyọ ati ilẹ Yoruba lapapọ.

Bi awọn kan ṣe n sọ pe awọn ti ohun to sọ lẹyin, ni awọn miran n sọ wi pe ta ni Igboho lati maa pa iru aṣẹ bẹẹ?

Ki ni Sunday Igboho sọ lori gbedeke ọlọjọ meje naa?

Ohun ti Sunday Igboho gbe igbesẹ ati ọrọ to sọ le lori ni gulegule ijinigbe to n waye lẹkun Ibarapa lẹnu lọwọlọwọ yii.

O ni laarin oṣu diẹ sẹyin awọn eekan ipinlẹ Ọyọ ati agbegbe Ibarapa ti awọn ajinigbe ti wọn fura si pe wọn jẹ Fulani darandaran ji gbe.

O ni yala ti wọn pa tabi fi gbowo gọbọi kii ṣe kekere eyi ti iwadii awọn si ti fihan pe awọn to n ṣe iṣẹ yii lọpọ igba maa n fara sinko si Gaa awọn Fulani kaakiri ti wọn kii sii foju wọn han sita.

Kinni Igboho tun sọ?

Nigba to ba ileeṣẹ iroyin BBC News Yoruba sọrọ, Oloye Sunday Igboho sọrọ ilẹ kun.

O ṣalaye iṣẹlẹ arakunrin kan to ti oke okun wale wa si ilu Igangan wa dako ṣugbọn tawọn Fulani kan da ẹran lọ jẹ oko rẹ.

O ni igba to lọ fi ẹjọ sun awọn aṣiwaju awọn Fulani naa ni wọn de e mọlẹ wọn si tẹẹ pa.

O ni eyi atawọn iṣẹlẹ miran lo faa ti oun fi woo pe ko yẹ ko ri bẹ ti oun fi ni asiko to lati kọrin O to gẹẹ.

Ki ni awọn Fulani n sọ bayii?

Amọṣa awọn alaṣẹ awọn Fulani ni ipinlẹ Ọyọ ti ṣalaye pe ko sohun to jọọ rara ati pe awọn eeyan wọn ko ni ibi kankan ti wọn n ṣi lọ gẹgẹ bi Igboho ti ṣe pa a laṣẹ.

Wọn ni ijọba lo laṣẹ ati ẹtọ lati gbe irufẹ gbedeke bẹẹ kalẹ, bẹẹ nigba ti ijọba tabi awọn agbofinro ko sọ ohun to jọ bẹẹ, ko si idi fun awọn lati gbe igbesẹ lori rẹ.

Ninu ọrọ to ba BBC News Yoruba sọ, Seriki Fulani ni ipinlẹ Ọyọ, Alhaji Yakubu Bello ṣalaye pe Oloye Igboho "mu madaru" wa saarin awọn olugbe agbegbe naa.

O ni Igboho n fa madaru laarin Yoruba atawọn Fulani nibẹ ni nitori ibagbepọ alaafia lo wa laarin awọn ẹya gbogbo lagbegbe naa.

Ninu ọrọ rẹ, Alhaji Bello ni lootọ Oloye Sunday Igboho mu ibẹru ba awọn eeyan nibẹ.

Sugbọn wọn ko ni faaye silẹ fun ohun to lee fa ipinya laarin awọn Fulani ati Yoruba nibẹ.

" Awọn ijọba ti gbe igbesẹ lori ohun to n ṣẹlẹ lagbegbe naa. Ni ipinlẹ Ọyọ, alaafia wa fun wa, Yoruba ati Fulani, ọmọ iya kan naa ni wa.

Inu oko kan naa lawọn Fulani ati agbẹ n gbe. Bi ibajẹ kankan ba si waye laarin wọn, wọn yoo yanju rẹ laarin ara wọn laisi wahala kankan."

Seriki Fulani ni ipinlẹ Ọyọ ni awọn Fulani ko lee kuro lagbegbe naa gẹgẹ bi Igboho ṣe sọ, awọn fa ọrọ naa le ijọba lọwọ nitori pe ijọba lo ni ilu, awọn lo si lẹtọ lati gbe igbesẹ lori ọrọ naa.

Ki ni awọn ọlọpaa sọ sii?

Alukoro ileeṣẹ ọlọpaa ni ipinlẹ Ọyọ, CSP Olugbenga Fadeyi ṣalaye fun BBC News Yoruba pe ọrọ naa ko ṣe ajeji si awọn ọlọpaa.

O ni yatọ si pe wọn ti da awọn ọlọpaa ati ikọ agboguntiwa ibajẹ si agbagbe naa, awọn alaṣẹ ileeṣẹ ọlọpaa ti n forikori lori ohun ti wọn yoo ṣe si ọrọ naa.

O fi kun un pe pipana rogbodiyan tabi wahala to lee fẹ ṣuyọ lawọn ọlọpaa wa fun, wọn si ti n gbe igbesẹ gbogbo lati rii pe ko si ohunkohun tabi ẹnikẹni to da omi alaafia ilu ru.