School resumption: Ilé aṣojú-ṣòfin l'Abuja dábàá kí ìjọba sún ìwọlé àwọn akẹ́kọ̀ọ́ síwájú pẹ̀lú oṣù mẹ́ta torí covid-19

Ile aṣoju-ṣofin l'Abuja ti sọ pe ki ijọba apapọ sun ọjọ iwọle awọn akẹkọọ pada kuro lọjọ Aje ọjọ kejilelogun, oṣu kinni, ọdun 2021 yii.

Ile da aba pe ki ijọba sun iwọle awọn akẹkọọ siwaju pẹlu oṣu mẹta siwaju sii nitori bi arun coronavirus ti n pọ si lojoojumọ.

Alaga ile lori eto ẹkọ, Ọjọgbọn Julius Ihonvbere lo ṣi aṣọ loju eegun ọrọ yii ninu atẹjade kan to fi sita lorukọ igbimọ rẹ.

Ọjọgbọn Ihonvbere sọ pe ijọba apapọ ko fi ọrọ iwọle awọn akẹkọọ to ile aṣofin leti ko to kede ọjọ ti wọn maa wọle pada.

Alaga igbimọ ile aṣoju-ṣofin sọ pe eeyan bi ẹẹdẹgbẹta lo n ni arun coronavirus lojumọ nigba tawọn ileewe wa ni titi pa.

Ṣugbọn Ọjọgbọn Ihonvbere ṣalaye pe o kere tan eeyan to le lẹgbẹrun kan lo n larun naa lojoojumọ bayii ti ijọba paṣẹ pe kawọn akẹkọọ pada sile iwe lọjọ kejidinlogun oṣu kinni yii.

''Kilode ti ijọba ṣe fẹ ṣe ileewe pada nigba ti ko tii si eto to mọyan lori lati rii pe ko ni ṣi ewu fawọn akẹkọọ lori ọrọ coronavirus ti wọn ba wọle pada bayii?'' Ọjọgbọn Ihonvbere lo beere bẹẹ.

Ihonvbere sọ pe ibeere to yẹ ki a bi ara wa ni pe ''ṣe a ti gbaradi fun wiwọle pada awọn akẹkọọ?''

Ẹwẹ, ijọba ipinlẹ Edo ti sun iwọle awọn akẹkọọ nipinlẹ naa si oṣu to n bọ nitori bi coronavirus ṣe n gbilẹ sii lojoojumọ ni ipinlẹ naa.