Tani Kingsley Moghalu, ọ̀dọ́ tó fẹ́ jẹ ààrẹ?

Kingsley Moghalu ni olùdíje fún ipò ààrẹ Nàìjíríà lábẹ́ àsìà ẹgbẹ oṣelu Young Progressives Party (YPP) ní ìbò ọdún 2019.

Ó jẹ́ ọ̀kan lára àwọn olùdíje fún ipò ààrẹ Nàìjíríà tó ṣe ìlérí pé òun yóò ṣe àtúntò (restructuring) orilẹ̀-èdè tó ní ènìyàn pò ní ilẹ̀ adúláwọ̀ tó bá di ààrẹ.

Ìtàn ìgbésíayé Kingsley:

Wọ́n bí Kingsley Moghalu ní ọdún 1963.

Moghalu àti àwọn òbi rẹ̀ gbé ìgboro Geneva ní orílẹ̀-èdè Switzerland àti ìgboro Washington ní orílẹ̀-èdè Amẹ́ríkà fun igba pipẹ.

Láàrín ọdún 1970 sí 1980 Moghalu kàwé ní ilé ìwé girama ìjọba àpapọ̀ tó wà ní Umuahia, ìyen Federal Government College Umuahia.

Ní ọdún 1986 ni Moghalu gba oyè ìmọ̀ ìjìnlẹ̀ àkọ́kọ́ LLB lóríi òfin ní fásitì Nììjíríà, (UNN), tó sì lọ́ sí ilé ẹ̀kọ́ agbẹjọ́rò tó wà l'Ékó, Nigerian Law School.

Moghalu gba oyè ìjìnlẹ̀ ẹlẹ́ẹ̀kẹjì ní ilé ìwé ìmọ̀ òfin Fletcher ní Fáṣitì Tufts l'Ámẹ́ríkà níbi tó ti jẹ́ akẹ́kọ̀ọ́ lá bẹ́ ètò ẹ̀kọ́ Gillespie àti olùrànlọ́wọ́ lórí ìwádìí nípa ètò ìṣúná àti ìṣèlú orilẹ̀-èdè sí orílẹ̀-èdè ní ọdún 1992.

Lẹ́yìn ìgbà náà ni Moghalu gbà oyè ìjìnlẹ̀ elẹ́ẹ̀kẹẹ̀ta (Ph.D) lórí ìṣèlú orílẹ̀-èdè sí orílẹ̀-èdè ní London School of Economics tó wà ní fásitì London.

Bákan náà ó gbà oyè olọ́kanòjọ̀kan ní fásitì Havard àti ti Pennsylvania.

Moghalu ṣe igbákejì gómìnà bánkì àpapọ̀ Nàìjíríà (CBN) láti ọdún 2009 sí 2014.

Láti ìgbà náà a kò gbọ́ nǹkan púpọ̀ nípa Moghalu mọ́ títí tó fi gbé àpótí ìbò.

Ó ní ìgbàgbó pé ètò ẹ̀kọ́ tó pé ye àti ètò ìsúná fún àwọn onísòwò ló lè tán ìṣẹ́.

Kingsley fẹ́ kí àwọn dókítà Naìjíríà má lọ ṣiṣẹ́ lókè òkun mọ́n.

Ẹ̀tò àtúntò (restructuring) tí Kingsley gbà lérò

Ó ń fẹ́ kí wọ́n pín Nàìjíríà sí ọ̀nà mẹ́fà gẹ́gẹ́ lábẹ́ ìsàkóso ìjọba àpapọ̀.

Ó fẹ́ kí wọ́n pa gbogbo ìpínlẹ̀ mẹ́rìndínlógójì tó wà ní Nàìjíríà rẹ́.

Ó fẹ́ kí gbogbo ìpínlẹ̀ kọ̀ọ̀kan nínú mẹ́fà máa bọ́ 'rarà.

Moghalu Kingsley fẹ́ kí gbogbo ìpínlẹ̀ l'ágbára lórí nǹkan àlùmọ́nì tó wà lábẹ́ wọn.

Ó fẹ́ fi òpin sí títa nǹkan àlùmọ́ọnì láì yí wọ́n padà sí nǹkan tó lówó lórí.

Ó fẹ́ kí wọ́n ya ẹ̀sìn kúrò lára ìṣẹ̀lú