Àwọn ọdẹ àtàwọn ajínigbé rọ òjò ìbọn fúnra wọn ní Akunnu-Akoko, ẹ̀mi ajínigbé kan sọnù

Ajinigbe kan ti dero ọrun lẹyin ti awọn ẹmẹwa rẹ atawọn ọdẹ ilu Akunnu-Akoko doju ibọn kọ ara wọn ni ijọba ibilẹ Ariwa Ila-Oorun Akoko, nipinlẹ Ondo.

Iroyin ni eeyan meje to n rinrinajo lọ si oke ọya ni awọn ajinigbe ọhun ji gbe lọ lasiko iṣẹlẹ naa.

Ni kete ti iroyin iṣẹlẹ naa tẹ Adele Ọba Akunnu, Ọmọba Tolani Orogun leti, lẹsẹ kan naa ni oun pẹlu awọn ọdẹ ilu atawọn akikanju miran wọ inu igbo lọ tẹle awọn ajinigbe ọhun.

Igbesẹ naa so eso rere lẹyin ti wọn pa ọkan lara awọn ajiigbe ọhun, ṣugbọn awọn akẹgbẹ rẹ na papa bora.

Gẹgẹ bii iroyin to tẹ wa lọwọ, awọn akinkanju naa doola ẹmi awọn eeyan meje ti awọn ajinigbe naa ti kọkọ gbe lọ.

Nigba to n fidi iroyin naa mulẹ, Adele Orogun ṣalaye pe akitiyan awọn ọdẹ naa so eso rere nitori wọn mọ agbegbe ọhun daadaa.

O ni "awọn ọde wọ inu igbo lọ, wọn si doola ẹmi awọn eeyan meje ti wọn ti ji gbe ṣaaju."

Lẹyin naa lo kan sara si awọn eeyan fun iṣẹ akin ti wọn ṣe.

Ọga ọlọpaa to n ṣakoso agbegbe Ikare Akoko, ACP Razak Rauf ṣalaye pe lootọ ni wọn doola awọn meje ti ajinigbe ti kọkọ gbe lọ, awọn eeyan naa ko si ṣẹṣe rara.

Razak ni wọn ti gbe oku ajinigbe to ba iṣẹlẹ naa lọ si ile igbokupamọsi.

Alagba kan lagbegbe ọhun, Ade Aboginije ke si ijọba ipinlẹ Ondo lati ṣafinkun iye ẹṣọ alabo to wa lagbegbe naa, paapaa ilu Akunnu to sunmọ ala ipinlẹ Edo ati Kogi.

Iroyin ni pupọ awọn agbẹ agbegbe ọhun lo ti fi oko wọn silẹ nitori bi awọn ọdaran daradaran ṣe maa n ji wọn gbe, ti wọn a si maa fi ipa ba iyawo atawọn ọmọ wọn lopọ.