"Исломий Давлат": "Россия учоғини биз уриб туширдик"

Ўзини "Исломий Давлат" дея юритувчи гуруҳ Россиянинг "Когалимавиа" ширкати учоғини Синай узра уриб туширганлигини яна бир бор даъво қилиб чиқди.

Интернетда чоп этилган аудиобаёнотда айтилишича, 31 куни рўй берган ҳалокат "Исломий Давлат"нинг Синай ярим оролида жойлашган бўлинмаси "Вилоята Синай" томонидан амалга оширилгандир. Гўёки улар бу амални "Исломий Давлат"га байъат келтирган кунларининг бир йиллиги санасида уюштирганлар.

"Лекин буни қандай қилиб амалга оширганимизни очиқлашга бизни ҳеч ким мажбур қила олмайди", дейилади аудиобаёнотда.

А321 ҳалокатидан сал ўтмай "Исломий Давлат" масъулиятни ўз бўйнига олгани ҳақида айтганди, лекин бунинг ҳеч қандай далилларини келтиришмаганди.

Интернетда пайдо бўлган баёнотдан сўнг ўша куннинг ўзида бу каби баёнот "Исломий Давлат"нинг расмий радиостанцияси "Ал-Баян" орқали ҳам берилди.

Бу баёнотлар шунингдек, "Твиттер" ва Telegram орқали ҳам тарқатилди.

Лекин Би-би-си билан суҳбатда Миср президенти Абдулфаттох ас-Сиси "Исломий Давлат" баёнотини тарғибот дея атаб ҳалокат сабаблари ҳақида бирон хулосага келиш ҳозирча эрта эканлигини айтди.

Россиянинг "Когалимавиа" ширкатига тегишли Аirbus A321 учоғи Синай яримороли устида 31 октябр куни қулаб тушганди.

Учоқда бўлган ҳамма 224 инсон ҳалок бўлган. Бу бутун Совет Иттифоқи ва Россия тарихида бўлган энг йирик авиаҳалокат эканлиги айтилмоқда.

Ҳалокат сабабларини аниқлаш бўйича текширув жараёни ҳануз давом этмоқда.

Би-би-си Ўзбек хизмати билан Whatsapp, Telegram ва Viber орқали боғланишни истасангиз, телефонимиз: +44 78-58-86-00-02.

Instagram – BBC UZBEK

Twitter – BBC UZBEK

Odnoklassniki – BBC UZBEK

Facebook- BBC UZBEK

Google+ BBC UZBEK

YouTube - BBCUZBEK (https://www.youtube.com/user/bbcuzbek)

Skype - bbcuzbekradio