Хитой матбуоти: терроризмда айбланган саккиз уйғур қатл этилди
Сурат манбаси, Reuters
Хитой матбуоти хабарларига кўра, Шинжон Уйғуристонида “террорчилик фаолияти учун” саккиз киши қатл қилинган.
Улардан уч нафарининг 2013 йил октябр ойидаги пойтахт Пекиннинг Тянанмен майдонидаги автомобил портлашини ташкиллаштиришда айблангани хабар қилинган.
24 август якшанба куни Хитой Марказий Телевидениеси қатл қилинган шахсларнинг маҳкамага олиб борилаётгани, полиция томонидан сўроқ қилинаётгани кадрларини ҳамда Тянанмен хиёбонидаги оломон устига ҳайдаб борилган автомобил ҳужуми тасвирларини намойиш этган.
Хитойнинг давлат назоратидаги Синхуа ахборот агентлиги хабар қилишича, қатл қилинган уйғурлар Шинжоннинг Қашғар ва Хўтан шаҳарларидаги ҳужумларда айбланган.
Уларга террористик фаолиятга алоқадорлик, ноқонуний портловчи моддаларни тайёрлаш, полиция ходимларига ҳужум, ҳукумат расмийларини ўлдириш каби айбловлар қўйилган ва Хитой маҳкамаси бу айбловлар ўз исботини топган, деган қарор қабул қилган.
Ўлим жазолари сўнгги бир неча кун давомида ижро этилгани ҳақида хабар тарқатган Синхуа агентлиги.
Хитой июн ойида Шинжондаги зўравонликларда айбланган 13 киши қатл қилингани ҳақида хабар тарқатган.
Июл ва август ойларида терроризм билан боғлиқ айбловлар билан ўнлаб уйғурлар қамоқ жазоларига ҳукм қилинган.
Сўнгги икки йил мобайнида Шинжон Уйғуристонида кузатилган зўравонликлар юзлаб инсонларнинг умрига зомин бўлган.
Шу йил март ойида Хитой жануби-ғарбидаги Кунмин шаҳри темир йўл вокзалидаги 29 инсон ўлимига сабаб бўлган ҳужумда ҳам уйғурларни айблашди.
Май ойида Урумчидаги бозордаги худкушлик ҳужуми 39 кишини ўлдиргани хабар қилинган.
Шундан сўнг Хитой ҳукумати Шинжонда терроризмга қарши курашини янада кучайтириши ҳақида эълон қилган.
Минтақада хавфсизлик чоралари кучайтирилган, автобусларга чиқаётганлардан шахсини тасдиқловчи гувоҳномалар талаб қилинмоқда, соқол қўйган эркаклар ва рўмолли аёлларнинг жамоат транспортига чиқишлари тақиқланган.
Муҳожиротдаги уйғур фаоллари Шинжон Уйғуристонида зўравонликлар кучаяётганига Хитой ҳукуматининг уйғурларга нисбатан диний, маданий босимни оширгани сабаб бўлаётганини айтадилар.
Бироқ Хитой ҳукумати бу айбловларни рад этади, зўравонликларга алоқадор деб кўрилган уйғурларни терроризм ва бўлгинчиликда айблайди.
Би-би-си Ўзбек хизмати билан Whatsapp орқали боғланишни истасангиз, телефонимиз: +44 78-58-86-00-02
