Луганскда Украинанинг Ил-76 ҳарбий учоғи уриб туширилган
Сурат манбаси, Reuters
Украинанинг Луганск туманида шанбага ўтар кечаси бўлгинчилар томонидан Ил-76 ҳарбий-транспорт учоғи уриб туширилган.
Украина ҳукумати учоқ бортида бўлган 49 кишининг барчаси ҳалок этилганини тасдиқлади.
Украина Мудофаа вазирлиги маълумотларига кўра, учоқ қўниш олди бўлгинчилар томонидан зенит-ракета комплекси ва йирик калибрли пулемётдан нишонга олинган.
Ил-76 бортида ҳарбийлар билан бирга, техника, ҳарбий анжомлар ва озиқ-овқат бўлган.
Мухбирларга кўра, аэропорт Украина армияси қўлида бўлса ҳам, Луганскни бўлгинчилар назорат қилиб туришибди.
Бироқ "Луганск халқ республикаси"нинг вакили учоқ уриб туширилганини ИТАР ТАССга тасдиқламаган.
Айни пайтда аэропортдаги кузатув камераси учоқ ҳалокатини муҳрлаган лавҳалар интернетга қўйилган.
Тегишли жавоб қайтарилади
Сурат манбаси, Reuters
Украина Президенти Петр Порошенко мамлакат шарқидаги бўлгинчиларнинг қилмишлари учун албатта жавоб қайтарилишини айтган.
"Украинага тинчлик керак. Бироқ террористлар ўз жавобларини олишади", деган президент.
Порошенко шунингдек, Миллий хавфсизлик кенгашининг мажлисини чақирган ва вазирлар маҳкамасига ҳалок бўлганларнинг оиласига ёрдам кўрсатишни топширган.
Украина ҳукумати томонидан Днепропетровск ва Луганскда 15-16 июн мотам кунлари деб эълон қилинган.
Бундан олдин бўлгинчилар Славянскда бошқа бир ҳарбий учоқни уриб туширганлари ҳақида айтганлар.
Украина кучлари билдиришича, бу ҳарбий Ан-26 учоғида кўнгиллилар томонидан инсонпарварлик юклари олиб келаётган бўлган.
Гувоҳларга кўра, учувчилар ёнаётган учоқдан парашютдан сакраб тирик қолганлар.
Май охирида Славянскда тикучар уриб туширилиши натижасида бир украин генерали дохил 14 ҳарбий ўлдирилган.
13 июнда Украина армияси Мариуполда кенг миқёсли ҳарбий амалиётларни бошлаган. Ички Ишлар вазирлигига кўра, бўлгинчиларнинг техника ва масканлари йўқ қилинган.
Миллий гвардия билдиришича, тўрт Украина аскари яраланган, бўлгинчилар бир неча жангарисини йўқотган.
Гувоҳлар ҳам ўлдирилганлар кўплигини айтишган, бироқ уларнинг қанчалиги маълум эмас. Бўлгинчилар тахминича 6дан 12 тагача жангчилари ҳалок бўлган бўлиши мумкин.
Украинанинг ағдарилган президенти Виктор Янукович 13 июнда янги мурожаат билан чиққан ва янги ҳукуматни қон тўкишни тўхтатишга чақирган.
Би-би-си Ўзбек хизмати билан Whatsapp орқали боғланишни истасангиз, телефонимиз: +44 7858 860002
