Янгиликлар: Украина Россиянинг энг заиф жойига зарба бердими, Путинни ағдармоқчи бўлаётганлар яна нима қилди ва Рамзан Қодиров ёрдамга тайёр Rossiya Ukraina Yangiliklar

Жанг жабҳасидан кутилмаган хабарлар олинмоқда.

Украина қарши ҳужумга ўтдими?

Алоқадор мавзулар:

Россия Мудофаа вазирлиги янги баёнот билан чиқди.

Донецкда Украинанинг йирик ҳужумини бартараф этганликларини айтди.

Вазирликнинг иддао қилишича, 250 украин ҳарбийсини ўлдиришган, зирҳли уловларини ҳам вайрон этишган.

Россия томони жанглар акс этганини даъво этаётган тасвирларда зирҳли уловларнинг шиддатли отишма остида қолгани акс этган.

Аммо расмий Киев бунга ҳозирча бирор бир муносабат билдирмаган.

Урушни ўрганиш институти(АҚШ) ўзининг кундалик ҳисоботида маълум қилишича эса, Украина қўшинлари 4 июнь куни Донецк ғарби ва Запорожье шарқида маълум тактик ютуқларга эришишган, қуруқликдан ҳужум қилишган.

Украинанинг қарши ҳужумга ўтиши узоқ вақтдан бери кутилади.

Аммо Киев ўзининг бирор бир огоҳлантиришсиз қарши ҳужумга ўтишини айтган.

Шу боис ҳам, бу Украина Россиядан ўз ерларини қайтариб олишни мақсад қилган ўша ҳужумларнинг бошланишими ёки йўқ - ҳозирча маълум эмас.

Ҳужум?..

Россия Мудофаа вазирлигининг баён қилишича, Украина Донецкдаги "кенг кўламли ҳужуми"ни якшанба куни амалга оширган.

"Олтита механизациялашган ва иккита танк батальонини ишга солган".

Вазирликка кўра, Украина жанг жабҳасининг ўзи энг заиф, деб билган қисмидан Россия мудофаасини ёриб ўтишга уринган, аммо "бу ишни уддалай олмаган, бирор бир муваффақиятга эришмаган".

Расмий Москванинг даъво қилишича, Донецкдаги жангларда Украина 250 нафар ҳарбийси баробарида 16 та танкидан ҳам айрилган.

Украина ўзининг қарши ҳужумини бир неча ойдан буён режалаб келади.

Қўшинларини яхшироқ тайёрлаш ва Ғарбдан имкон қадар кўпроқ қурол-яроғ олиш илинжида.

Расмий Киев "душманларига қўл келиши"ни айтиб, ўзларининг қарши ҳужумлари ҳақида турли гап-сўзлардан қочишга ундаб келади.

"Режалар жимликни ёқтиради. Шу боис ҳам, бошлангани эълон қилинмайди", - дея баён қилган Украина Мудофаа вазирлиги якшанба куни Telegram каналидаги видеосида.

Видеода ҳам ниқобли ва яхши қуролланган аскарларнинг бармоқларини лабларига тегизиб турганликларини акс этган.

Бу ҳужумларнинг аҳамияти катта.

Чунки Украина ҳукумати ўз халқи ва Ғарбдаги иттифоқчиларига Россия мудофаасини ёриб ўтиш, жанг жабҳасида ўзгариш ясаш ва ерларини қайтариб олишга қодир эканлигини кўрсатиши керак.

Бошқа жанг жабҳаларида нима гап?

Душанба куни тонгда Украинанинг Қуруқликдаги қўшинлари янги баёнот билан чиқди.

Олександр Сирский қўшинлари Бахмут томон "илгарилаётгани" ва Россиянинг шаҳар яқинидаги мавқеини вайрон этганлигини айтди.

Украина чегарасига яқин Белгородда эса, Москвага мухолиф кучлар Россия аскарларини тутқунга олганликларини иддао қилиб чиқишди.

"Россияга Озодлик" Легионининг маълум қилишича, бу баёнотни Россия Кўнгиллилар Корпуси билан бирга беришган.

Ҳар икки гуруҳ ҳам Путинни ағдаришни истайди.

Улар Россиянинг ўтган йил февралида Украинага қилган босқинига қарши.

Белгород губернатори Вячеслав Гладков эса, агар аскарлар тирик бўлишса, уларни асир олганлар билан учрашишга рози бўлганини айтди.

Аммо сўнгроқ жангчилар ўзлари билан учрашиш учун губернатор "журъат топа олмагани" ва асирларини Украинага топширишларини маълум қилишди.

Худди шу манзарада Чеченистон президенти таклиф билан чиқди, Белгородга чечен жангчиларини жўнатишга тайёрлигини билдирди.

Рамзан Қодиров бу жангчиларнинг "тинч аҳоли ва инфратузилмага зиён етказмасдан диверсантларни йўқ қила олишга қодир" эканликларини айтди.

Унинг бу таклифига Путин ва расмий Москванинг муносабати ҳозирча имконсиз.

Россия ўзининг чегара ҳудудларига уюштирилган сўнгги ҳужумларда Украина томонини айблади, аммо расмий Киев ўзларининг бунга тўғридан-тўғри алоқалари йўқлигини баён қилди.

Белгород губернатори янги дрон ҳужуми оқибатида шаҳардаги электростанцияга ўт кетганлигини маълум қилди.

Аммо мустақил манбалардан бунга ўхшаш хабарлар олинмади, Москва эса, мазкур минтақа Украинанинг мунтазам дрон ҳужумлари нишонига айланганини иддао қилади.

ttps://t.me/bbcuzbek

BBC.COM/UZBEK

Telegramda bog'lanish raqami +44 7858860002