Олмония канслери Меркел бурқага қарши чиқди
Сурат манбаси, AFP
Олмония канслери Ангела Меркел илк бор аёлларнинг бурқа (паранжи) кийишига қарши чиқди.
Насроний демократлар иттифоқининг қурултойида сўзга чиққан Меркел хоним бу каби либосларни имкон бўлган барча жойда тақиқлаш шартлигини айтди.
"Бу бизники эмас", дейди Олмония раҳбари.
Унинг айтишича, Олмонияда инсонлар ўзаро мулоқот қилишар экан, ўз юзларини очиқ тутадилар.
"Шунинг учун бизда тана ва юзни бутунлай ёпадиган либос кийилмайди", деб айтган Меркел.
Олмония канслери 2015 йилда мигрантлар инқирози чоғи мамлакатда юз минглаб ноқонуний муҳожирлар оқиб кирганини хотирлаган.
Унинг айтишича, бу каби ҳолат ортиқ такрорланмайди.
Аввалроқ Меркел хоним бурқа кийиб юрганларга ишора қилиб, айни ҳолатни интеграция ғояси барбод бўлгани билан изоҳлаган эди.
Насроний демократлар иттифоқининг қурултойида Меркел паранжи ва ё бурқани мактаблар, маҳкамалар ва бошқа давлат идораларида тақиқлаш лозимлигини айтган.
Аксарият бурқани мутлақо тақиқлаш Олмониянинг конституциясига зид эканини айтади.
Қурултойда Ангела Меркелни яна партия лидерлигига сайлашган.
Аммо келаси йил ўтиши мўлжалланган парламент сайловларида унинг партиясига осон бўлмаслиги айтилмоқда.
"Олмония учун муқобил йўл" номли аксилмуҳожир сиёсат тарафдори бўлган партияни дастаклаётганлар сони ортиб бормоқда.
Меркелнинг рейтинги ҳам тушиб кетаётгани айтилади.
Шунга қарамай, қиёсан қараладиган бўлса Меркел хонимнинг сиёсатини қўллаб-қувватлаётганлар оз эмас.
