Суриядаги Ўзбек жангарилари яна видеосини эълон қилган
Интернетда Сурияда Башар ал-Ассад қўшинларига қарши жанг қилаётган Ўзбек жангариларининг янги видеоси пайдо бўлган.
11 дақиқа 54 сониялик видео Суриядаги ўзини "Имом Бухорий жамоати" деб атаган гуруҳнинг ҳарбий тайёргарлик жамлоғида олинган.
Видеонинг Ҳалаб шаҳри яқинидаги ҳарбий жамлоқда олингани хабар қилинган.
Унда юзларини ниқоблар билан ёпган, камуфляж кийимида, қўлларида автомат қуроллари бўлган 30 дан ортиқ жангари тасвирга тушган.
Видеода қуроллилар жанговор юриб ўтадилар.
Жангарилардан бири жиҳод мазмунидаги қора байроқни кўтарган.
Юзи хиралаштирилган, кўзига қора кўзойнак таққан қўмондон Ўзбек тилида ўзларининг қуролли курашлари муҳимлиги ҳақида ваъз айтади.
Видеони томоша қилганларнинг экранда бир неча кичкина "томошабин бола" пайдо бўлганига кўзлари тушади.
Шундан кейин жангарилар ўзларининг жисмоний тайёргарлигини намойиш этадиган машқларни бажаришади.
Сурияда Ўзбек жангарилари Ассад кучларига қарши жанг қилаётгани ҳақидаги хабарлар тарқалганига анча бўлди.
Айни пайтда Қирғизистон, Тожикистон ва Қозоғистон расмийлари ҳам бу мамлакатлар фуқаролари Суриядаги ҳарбий амалиётларда иштирок этаётганидан хавотирлар билдириб чиқишди.
"Имом Бухорий жамоати" деб номланган Ўзбек жангарилари гуруҳининг Суриядаги "Ал-Нусра жабҳаси"нинг иттифоқчиси экани хабар қилинган.
"Ал-Нусра жабҳаси" "Ал-Қоида"нинг Суриядаги бўлими деб кўрилади.
Бундан ташқари Сурияда асли қофқозлик жангарилардан таркиб топган "Жайши ал-Муҳажирун вал-Ансор" деб номланган гуруҳ ҳам Сурия ҳукумати армиясига қарши жанг қилаётгани хабар қилинади.
Би-би-си ўтказган текширувларда аниқлашича, айрим ўзбекистонликлар Сурияда Ассад режимига қарши урушаётганлари маълум бўлган.
Шунингдек, Туркияга муҳожир бўлиб келаётган Марказий Осиёликлар орасида ҳам Сурияда жиҳодга отланганганлар ҳам борлиги аниқланган.
Би-би-си Ўзбек хизмати билан Whatsapp орқали боғланишни истасангиз, телефонимиз: +44 7858 860002
Агар матнда имло хатоси бўлса, бизга билдиринг.
