Рамзан Қодиров: “Чеченистоннинг сўнгги амири йўқ қилинди” - Россия ва Путин, Rossiya, dunyo, yangiliklar

Рамзан Қодиров: "Чеченистоннинг сўнгги амири йўқ қилинди" - Чеченистон президентининг баёнотини расмий Кремль ҳам тасдиқлади. Рамзан Қодировнинг айтишича, "Чеченистонда ортиқ бирор бир махфий қуролли тўда қолмаган. Ҳаммаси яксон этилган".

Чеченистон раҳбари бу ҳақда ўзининг Telegram каналида маълум қилган.

Аслан Бютукаев ва яна беш жангарининг Чеченистонда ўлдирилганини айтган.

Чечен раҳбарининг баёнотини расман тасдиқлаган Россия президентининг матбуот котиби унга янада ойдинлик киритган.

У ҳам сўз "Чеченистоннинг сўнгги амири" ҳақида кетаётганини айтган.

Тергов Аслан Бютукаевни 2011 йилги Домодедово терактига алоқадор, деб кўрган.

Ҳарбий амалиёт

Рамзан Қодировнинг маълум қилишича, ҳарбий амалиёт Қатир-Юрт қишлоғи чеккасида олиб борилган.

Амалиётни марҳум отаси Аҳмат-Хожи Қодиров номидаги махсус бўлинма ўтказган.

Федерал қидирувда бўлган жами олти кишини ўлдирган.

Чеченистон президентининг айтишича, ҳарбий амалиёт режаси ўзи иштирокида ишлаб чиқилган.

Аммо ҳарбий амалиёт сатҳида унга шахсан ўзи бошчилик қилмаган.

Миллий аксилтеррор қўмитаси эса, амалиёт чоғида Бютукаев илова жами беш жангари ўлдирилганини айтмоқда.

Чечен раҳбарининг сўзларидан англашилишича, Россия президенти Владимир Путиннинг ҳам бундан хабари бўлган.

"Ҳарбий амалиёт режасига шахсан ўзи тузатишлар киритган".

Ҳарбий амалиёт ортидан эса, "унинг муваффақияти билан табриклаган".

Рамзан Қодировнинг бу сўзларини Россия президентининг матбуот котиби ҳам тасдиқлаган.

Дмитрий Песковнинг маълум қилишича, Путин Рамзан Қодировга сим қоққан.

"Чеченистон раҳбарини Бютукаев тўдаси йўл қилингани билан қутлаган".

Путин матбуот котибига кўра, ҳарбий амалиёт иштирокчиларининг барчаси давлат мукофотларига тақдим этилади.

Аслан Бютукаев

Песков ҳам Аслан Бютукаевни "Чеченистоннинг сўнгги амири", деб атаган.

Унинг "узоқ вақтдан бери қидирувда бўлган номи чиққан террорчи" бўлганини айтган.

Россия президенти матбуот котибининг сўзларидан англашилишича, Аслан Бютукаевни "Чеченистондан ташқари Ингушетида ҳам қидираётган бўлишган".

Аслан(Ҳамзат) Бютукаев ўз вақтида Россияда фаолияти тақиқланган "Кавказ амирлиги" ташкилотининг етакчиларидан бири бўлган.

Чечен исёнкорлари лидери Доку Умаровнинг энг яқин ҳамкори сифатида кўрилган.

2015 йилда эса, Аслан Бютукаевнинг "Риёд ас-Солиҳийн" худкушчилар бўлинмаси қўмондони сифатида бутун чечен жангарилари номидан ИШИД жангари гуруҳига байъат келтиргани хабар берилган.

2011 йил март ойида ҳам Бютукаевнинг Ингушетиядаги операция чоғида ўлдирилганига оид хабарлар олинган.

Аммо бу маълумотлар кейинчалик ўз тасдиғини топмаган.

Хабарларга кўра, у нафақат федерал қидирув, балкида АҚШ ва Европа Иттифоқининг санкциялар рўйхатида ҳам бўлган.

Ўтган йилнинг июль ойида Россия Федерал Қидирув Бюросининг Ингушетия бўлими ихтиёрий равишда таслим бўлса, Бютукаев гуруҳи терроризм учун жазодан озод қилиниши мумкинлиги ҳақида ҳам эълон берган.

Чеченистон Ички ишлар вазирлиги эса, 2016 йил октябрида Бютукаевнинг қаердалиги ҳақидаги маълумот учун 5 миллион рубль мукофот пули ваъда қилган. Бироқ, шунда ҳам, уни топа олишмаган.

BBCUZBEK.COM билан Telegram орқали +44 7858860002 номери билан боғланинг.

Telegram каналимиз: https://t.me/bbcuzbek