Португалия афсонаси ФИФА президенти бўлмоқчи

42 ёшли Луиш Фигу Зепп Блаттер ўрнига кўз тикаётган навбатдаги кутилмаган номзод бўлган.

ФИФА президентлигига сайловлар шу йилнинг май ойида бўлиб ўтади.

Португалия футболи юлдузидан ташқари президент бўламан, деганлар орасида яна бир футболчи бор.

Куни-кеча Франция миллий терма жамоасининг собиқ аъзоси Давид Жинола ҳам худди шундай истакда эканини ошкора баён қилганди.

Бу йил ФИФА президентлигига сайловлар жуда қизғин кечадиган кўринади.

Чунки Зепп Блаттердан ташқари бу йил ушбу мақом учун яна Иордания шаҳзодаси Али бир Ал-Ҳусайн, ФИФА собиқ Бош котиби Жером Шампан ва Голландия Қироллик Футбол Уюшмаси раҳбари Михаэл ван Прааглар ҳам беллашишади.

Агар, яна кимдир ФИФА президенти бўлмоқчи бўлса, қаерда яшашига қараб, бунинг учун ихтиёрида саноқли соатлар қолган бўлиши мумкин.

Чунки 29 январ куни бу жараён расман ўз ниҳоясига етади.

ФИФА президентлигига сайловлар эса, шу йилнинг 29 май кунига режаланган.

1998 йилдан буён ФИФАга президентлик қилиб келаётган Зепп Блаттер бу йилгиси билан бешинчи бор сайловларда беллашмоқчи.

ФИФА Сайлов қўмитаси тартиб-қоидаларига мувофиқ, барча қайддан ўтган номзодларнинг коррупцияга қарши синовдан ўтишлари шарт бўлади.

Луиш Фиго жаҳон футболида ҳам ўз ўрни ва номига эга.

Португалия футболи юлдузи ўз карьераси давомида дунёнинг энг номдор жамоалари:

"Реал"(Мадрид), "Барселона" ва "Интер"(Милан)да ҳам тўп сурган.

"Реал" билан бирга 2002 йилда Оврўпо Чемпионлари чемпиони бўлган.

Миллий терма жамоаси сафида 127 маротаба каттаю кичик майдонларда Португалия шаънини ҳимоя қилган.

"Олтин тўп" соҳиби, ФИФА таснифида "Жаҳоннинг энг зўр футболчиси" бўлишга ҳам улгурган.

Луиш Фигунинг турли оммавий-ахборот воситаларига берган суҳбати тафсилотларидан аён бўлишича, агар, президент этиб сайланиб қолса, ФИФАнинг обрўйини яхшилашни ўз олдига мақсад қилиб қўйган.

Би-би-си Ўзбек хизмати билан Whatsapp орқали боғланишни истасангиз телефонимиз - +44 7858 860002